Read Karbi HOSEA 4 Bible Online

HOSEA 4 - Karbi bible

HOSEA 4

¹HEMPHU alam arjunon, O Israel arat-atum; pima det asor pen HEMPHU eson alam kechihiliji do. Det angbong kekroithirklong mate kangjinso lapen Arnam aphan kechini abang avedet-lo;

²Semeketang, kechobei, kepathi, kechonghu lapen mek-langno akamsi plengset-lo; latum kerak an phrinlo lapen pran-karmut pangdunron lo.

³La apotsi det ningduknang-lo, lapen hadak kedo atum an chungkreng-marjeng-lo, lapen marat api lapen kangjar avo anta lapen talo alang-ok anta pondet-lo.

⁴Badu seta lam pachedan longlenang, lapen baduta pabokbe-detnang, pima nang pensi nening kepleng, O kurusar .

⁵Anerlo nang patekungji, montrita nang pen ajo patekungpo; lapen nangpei aphan ne pavirpo.

⁶Nerat aso kechini kave apot virtang-lo; athe nangtum kechini alam dengdetang-lo, Ne kurusar keplangji pen Ne nangphan dengdelo. Lapen nang nang Arnam aron tengnedet apotsi, Ne ta nangsomar aphan tengnedetpo.

⁷Halatum chan-ong; Nephan pap klem-ong; halatum adak-atur larsi patherakpo.

⁸Nerat aso apapsi halatum chobom halatum kehingno adai aphan kelongji aninghang.

⁹Lapen kurusar asonsi rat ta plangpo; Ne halatum aphan halatum atovar apot adukpipo lapen halatum akam apot halatum aphan alarhuipo.

¹⁰Halatum chopo, bonta aningplengple halatum akhat-kave akam klempo, bonta chanchelo; pima akhat-kave aning parongjisi halatum HEMPHU aphan obup-lo.

¹¹Drakha alang aban lapen akemi alang ta kemathathek ajakong pakak-lo.

¹²Ne rat atum thengpi pen kepaklang kelongjisi arju! Lapen latum achin latum aphan thak-lo. Pima inut a-arloso akhat kave abang kecheplang asonsi latum Nephan olo, latum akaprek a-arnam aphansi chepidet-lo.

¹³Inglong-heihei aphuchong along latum arkli lapen inglongso-heihei athak keding-o lapen kechan-o athengpi along athok athengpi arum athok thok pima lahei abin me-o. La apotsi nangsopi atum akhat-kave akam klemlo, lapen nangmunpi atum bang pen irap-lo.

¹⁴Latum akhat-kave akam klembom ahut seta Ne nangsopi atum aphan adukpipe mate nangmunpi atum bang pen irap-rap ahut setalo, pima nangmethang amatta akhat-kave atum along damlo, lapen latum pen prekjam ase karkli athok pilo, lapen isi kebuiklui arat akevirdoji.

¹⁵Nangtum akhat-kave akam klemseta O Israel, Judah atum lasonthot apot ado padodenang. Gilgal lapen Bethaven along karchoji aphan vangri, lapen HEMPHU kereng amen pen semetangri.

¹⁶Karjuthekthe chainong animso ason Israel atumta bang alam arjuje; biresak aso bap adangpi ajo kepachopan ason kosonsi HEMPHU latum aphan pangkrangpoma?

¹⁷Ephraim asor kumlin pen cherap-het, la aninghang aling paklemnang.

¹⁸Hor kejun ingripik aphi latum mek-langno akam keklemji ning cheparong-lo. Latum man mute ketherak-nangsi aninghang-lo.

¹⁹Latum aphan tomon kejap asonsi jappondetpo, lapen latum kumlin karcho apot therak-nangpo.