Read Karbi HOSEA 7 Bible Online

HOSEA 7 - Karbi bible

HOSEA 7

¹Nerat Israel atum aphan kepameji lapen puthot pachingthurji pu ahut latum aphan Ne latum ajat-kelangno lapen latum akehingno keklemsi thek-long. Latum lahin lahin chobei seroi, latum phangnosi hem lut lapen chonghu; latum tovar dampri-dampro arat aphan thidun.

²Ne la kedo-an kehingno akam lakhalo pu latum aphu-heihei arlo lut-le; bonta latum apap-heihei si latum aphan kompet-lo. lapen Ne latum aphan longledet un-e.

³HEMPHU pulo, “Rat atum recho lapen alangli keja atum aphan latum kechobei pen aningparung-lo.

⁴Latum do-an bang apiso pen irap-rap-lo; latum kedang kepasotang aphule ason, la kedang abang him menmetik an la me hoijokphlot.

⁵Recho ketalon arni recho lapen jalin atum aphan latum hor pangri si palulo.

⁶Kedang kepasotang aphule asonsi latum aning kehingno kemang sodak jopangthang latum aningkethi angthek ave seta adap la me kekar-ang asonsi ade thepo.

⁷Latum do-an kedang-kepasotang aphule nangnaksi sodak, lapen aning so si latum amethang kechari atum aphan pathi. Latum arecho inut aphi inut thilo seta baduta kerap kelongji aphan Ne choningrire det-lo.”

⁸HEMPHU pulo, “Israel arat atum ke isi kemenhoi ahim asonlo. Latum kekompet adet atum aphansi aningchethe.

⁹Lapen labangso bang adet atum aphan aning kechethe ke latum ajakong latum ajakong chonghutang-lo pu chechinine. Lapen latum arni lakha et seta latum chechinine.

¹⁰Israel arat atum ane chepathesi latum abe thursi hang-lo, keplangtang an alar apot, seta latum a-HEMPHU a-Arnam, Nelong vangve.

¹¹Israel atum keludet avothung ason latum kerap kelongjisi Ijip anat dam lapen aphi Assiria anat kat.

¹²Bonta latum kedam un ahut ne lan pursi vo kangjar ahut kenep ason latum aphan neppo. Latum kehingno keklem apot Ne latum aphan adukpipo.”

¹³“Latum virpo! Latum Nephan olo, lapen Nebe thurlo, latum aphan pavirdetpo Ne latum aphan pajokji ingtung seta latum akarcho ke ahok ave.

¹⁴Latum aning aklong pen nechoningrire bonta kekroikre atum asonsi latum arum chepaklo pen amek chepado. Kopu-an latum nebe thurloma!

¹⁵Ne si latum aphan pathe-pading-lo lapen latum aphan pangtangrak-lo, seta Nebe-thursi latum kehingno akam mang-lo.

¹⁶Latum kaita Ne pen chepahelosi ajakong kave a-arnamso anatsi dam. Latum kekekdang athai aso ason ning chetheno. Pima latum ajalin atum anekethe pen lam ningje, latum kephangno akethi pen thiji, lapen Ijip atum ingnekchoipo.”