Read Karbi HOSEA 8 Bible Online

HOSEA 8 - Karbi bible

HOSEA 8

¹HEMPHU pulo, “Pacherejile pong-ut butnon! Hotur atum takun asonsi Nedet inghulo! Ne rat atum Nephan latum angbong kechechak ason ingdilo lapen Ne kethan alam abethurlo.

²Latum Nephan latum a-Arnamlo pu nehang lapen Nerat lo pu chekrong lapen Nephan chini pu,

³Seta latum kopima akeme ason vartang-lo, Laso apot latum ahotur latum aphi phi hungdunpo.

⁴Latum recho bat-lo tebonta la Nepen kali. Latum keja atum chebat, tebonta Nephan pachinine pin pensi keklem amethang kevirji aphansi latum ser lapen rup pangjir si kumlin selam.

⁵Samaria arongsopi asor arat atum ser achainong karcho Ne hijim par. Latum aphan Ne ning thipik. Kumlin karcho ke-oji ko-an arni enpoma?

⁶Inut a-Israel kumlin soilo lapen lake arnam kali binong! Samaria along ser achainong karcho pabeng-ipo.

⁷Latum tomon kejap ahut rik lo te latum arve-herai ahutsi rot longpo athe kememe ahidi thangnat ahim paplang thekthe. Lapen la plang seta, bang adet aso atum vangsi cho-etpo.

⁸Israel atum kaprek adet atum asonlo lapen kephuktang atibuk asonsi rimnotang-lo.

⁹Ingnam agadha api asonsi chingkinotang-lo. Israel arat atum amethang aning kehang atovarsi damlo. Latum kerap kelongjisi Assiria adet damlo, lapen kaprek adet atum keparaijisi aman pilo.

¹⁰Bonta non Ne latum aphan pangrum rappetsi latum aphan adukpi rappet po lapen latum aphan Assiria arechokethe kechenek ahut latum keso si hangjopo.”

¹¹“Israel arat atum pap kesaiji aphan ko-an dovan kimloma, la ansi pap keklem adimta dopo!

¹²Rat atum aphan lakha un-epin ekethan Ne tok-lo, Bonta lahei kechininedet pen prekjam asonsi latum varchorlo.

¹³Latum karkli athok Nephan pilo, lapen karkli a-ok cholo. Bonta Ne HEMPHU, lahei ningdokde lapen non Ne latum apap lakha dampo, lapen la apot latum aphan adukpipo, Ne latum aphan Ijip toithupo.

¹⁴Israel arat atum recho ahem-heihei kimlo, bonta latum amethang kepinchongvek abang aphan tengnedet-lo. Lapen Judah arat atumta kethirklong rongsopi apaisong kimlo, bonta Ne me toisi latum arechohem lapen rongsopi me pachodetpo.”