Read Karbi JOEL 2 Bible Online

JOEL 2 - Karbi bible

JOEL 2

¹Zaion along athak pong-ut but non; Ne inglong kangthir athak kepachere arki padonon! Judah arat atum, ok klemhurnon, pima HEMPHU arni nangtebok-het-lo.

²Lake isi kangtingkuk lapen ke-ik-kui arni, isi inghun ke-op lapen kangting ik arni, kethedung aron-armu asonsi longvur kevang, inglongpi-heihei athak-le kangting kedipthip ason thakthak. Lason aphrang penta avepinlang, lapen mo nonphita avedetji.

³Me ason si latum thengpi arong-heihei cho, latum angno, longle ke Eden a-Beri asonlo, bonta latum anung ke kangthaidang ajo plang-lo, latum pen thangnat-ta chepajok un-e.

⁴Latum losei atum ason, ron alosei asonsi latum kat.

⁵Inglong-heihei athak latum kechon ahut latum ronhemkonglong ason arki padolo; latum kekreng abap me kecho arki ason. Latum ron kechedanji kechesik-koi isi kethedung aron-armu karjap-ren ason.

⁶Latum damlote anut-tinta pherelo; abangphutin amahang ikkuilo.

⁷Latum kechedan atum asonsi tengkheng-lo; ron aso atum asonsi latum paisong arlulo. Latum kadokaveta aphrang pakengson si dambom lapen kedam atovar chelarle mate akaprek atovar suise.

⁸Keraikom anat latum dampak lapen thangnatta latum aphan khang un-e.

⁹Rongsopi anat latum dampak; latum paisong athak kat-lo; hem-heihei angsong latum arlu lapen kanghu atum asonsi inghapso pen lutdamlo.

¹⁰Latum kedam ahut longle klemhur; sining-inghun klemhurlo. Arni lapen chiklopi ingtingkuk-lo lapen chiklolongso-heihei turte det-lo.

¹¹HEMPHU ase kethe pen si ron-armu aphan hukum-heihei pilo. Alangliphan kekroi asong ongdung lapen jakongthepik. Komatsi kereng-longpo? HEMPHU arni ko-an kepherememe!

¹²Tebonseta non, HEMPHU pulo, “Ning chiruipamenon lapen an-kehum, kechiru-kecharnap pen Ne nat nangchiruinon.

¹³Nangtum aning ke-oi chepaklangnon; nangpe kechingsek chot ke chokche.” Nang Arnam HEMPHU along chevangthunon. Alangli pi, inghon lapen kangjinso plengset; Alangli aningding-o lapen kechechak ason chebi; Alangli kaike kediyajisi chesik lapen aduk pipe.

¹⁴Mat chini HEMPHU aning chelar tahai lapen dorphlup asok-asang pen nangpahirjumeji mene! Anke nangtum Alangliphan sok-sang lapen drakha-ahorlang adan pi-unpo.

¹⁵Zaion anglong athak pong-ut butnon; isi an-kehum lapen dhorom akechingrum aphan kepha ahukum-heihei pinon!

¹⁶Rat pangrumnon; latum aphan isi kangthir amei sikpinon; arleng kesar atum aphan vannon; osomar lapen osothi-i atum pangrumnon. Kechepangri mirak atum ta angdeng che-o-si pavangveknang.

¹⁷Dovan lapen Kardomhemthepi ajakan adak HEMPHU aphan kangduk akurusar atum kechiru pen ardomvek nangji: “Nangrat aso aphan ingjinsotha HEMPHU. Akaprek akhei atum nelitum aphan palangrop lapen pachongthuirop long nangne. ‘Nangtum a-Arnam konat-lo?’ pu papu longledet nangji.”

¹⁸Ansi HEMPHU amethang alongle aphan chelang-lo; arat aso aphan Alangli ingjinsolo.

¹⁹Latum aphan Alangli thak-lo: “Non nangtum aphan Ne, sok, drakha-ahorlang lapen jit ajangthu nangpiji, lapen nangtum nangning ingsamjin po. Akaprek adet atum nangtum aphan nangpinremrelo.

²⁰Nirep pen kevang longvur aron-armu Ne pavedetpo lapen kejejangtang ajo latum aphan ajehak ne phlung-lo. Halatum aphrang aren atum aphan Kethi a-Talo anat phlungjuipo, Latum aphi aren atum aphan ke ha Mediterran atalo anat toijuipo. Latum kethi abang-arpum nemthuprungpo. Ne latum aphan pavirklungpo pima latum nangtum aphan klempik-lo.”

²¹“Hidi-heihei phereri, bonta ning cheparong-ra chehoknon pima nangtum aphan HEMPHU kadokave nangkeklempi apot.

²²Pi atum phereri, kechopan adim lirseng-lo; thengpi-heihei athe pathelo, lapen dorphlup athebo lapen adrakha dolo.”

²³“Zaion arat atum, chehoknon, nangtum aphan HEMPHU nang Arnam nang keklempi apot chehoknon. Nangtum aphan Alangli kecheng arveta nangpilo, lapen nangtum aphan ningkreng arve nangpilo, lapen aphrang asonsi kepadu arveta nangpilo.

²⁴Sok kesi achetai sok plengsetji; tebuk thepo-heihei drakha alang lapen jit ajangthu si plengsetpo.

²⁵Nangtum asok longvur kecho aningkan kevir an Ne nangpithudetji. Laso aron-armu Ne si nangtum anat nangtoilo.

²⁶Non nangtum kechoji aphan dorphlupji, lapen ingkranglingpo. Nangtum aphan manghumeme akam nangkeklempi HEMPHU nang Arnam aphan nangtum roji. Ne rat atum aphan puthot pinrem abang avedetpo.

²⁷Anke Israel, Ne nangtum angbong do pu chinipo, lapen Ne helo nangtum a-Arnam HEMPHU lo; lapen akaprek baduta avelo pu chinipo. Ne rat aso aphan puthot baduta pinremre detpo.”

²⁸Laso aphi abangphutin aphan Ne karjong dungpo; nangsopomar lapen nangsopimar atum Ne birta montripo; nang arleng-kesar atum mang hemanpo, lapen nang riso atum akethek-long thek-longpo.

²⁹Halabangso arni Ne ban atum aphuthak Ne karjong dungpo! Pinso, arlo aphanta.

³⁰“Halabangso arni sining-inghun angsong lapen pirthe athakta Ne kepacheretoi angthek-heihei paklangji. Halaso ahut vi buji, me lapen tokmon amehi doji.

³¹Arni ingtingkukji, lapen vi asonsi chiklopi prung-angji, thedung lapen pherememe HEMPHU arni kevang aphrang lahei plangji.

³²Bonta HEMPHU aphan kerap kechohang abang jokji. HEMPHU kepu asonsi, ‘Jerusalem along ajehak atum jokji; Ne kangvaitang atum rengji.’ ”