Read Karbi JOEL 3 Bible Online

JOEL 3 - Karbi bible

JOEL 3

¹HEMPHU pulo, “Halabangso arni Judah lapen Jerusalem Ne keplang-kephi ingthurthuji.

²Khei atum an aphan Ne pangrumji lapen latum aphan Kangsai Arlok along vanji. Latum Nerat aphan keklem an apot hadak Ne latum aphan ingsaiji. Israel aphan latum bang adet papratseilo, lapen Ne det Israel latum thakdak-lo.

³Komatsi ban kelongjima la kepharjisi latum khadot pathulo. Beisa lapen hor anam kepijisi latum pinso lapen arlosomar ban chojorlo.”

⁴Tair, Sidon lapen Philistia alongri kedo-an atum, nangtum Nephan kopilo keklem? Nangtum Nephan pine alar ketuji putong kebor-ima? Kalang-lo pulote Ne nangtum aphan alar pithu serakji!

⁵Nangtum Ne ser lapen Ne rup pontang-lo, lapen nangtum akardomhem-heihei arlo Ne khi an pontang-lo.

⁶Nangtum Judah lapen latum aphan Grik atum along jordamlo.

⁷Non latum aphan nangtum kejordam adim pen Ne van detpo. Latum aphan nangtum keklem asonthot Ne ta nangtum aphan nangklempo.

⁸Judah arat along nangsopo lapen nang-sopimar nangpachojor-toiji; latum aphan kehelo Sabea atum along latum jorpo. Ne HEMPHU-si kepulo.

⁹“Khei atum angbong laso alam pachethang non: ‘Ron aphan chesiknon; nangron aso aphan phanon; nangron aso an pangrumra damnon!

¹⁰Nangtum alangnoi aphal kebu pen theng-ra nokjir-heihei paplangnon lapen nangtum kangprunji anokek chir pinchongnon. Ke-ainilak atum anta chedanvek nangji.

¹¹Serak-ra vangnon, nang kekompet akhei atum an, lapen arlok along chingrumnon.’ ” Latum aphan ketengkhengjile, O HEMPHU, nangron-armu nangtoinon.

¹²Khei atum chesikvek nangji lapen Kangsai Arlok along vangvek nangji. Hadak kekompet akhei atum aphan kangsaijisi Ne ingnipo.

¹³Latum akehingno thepik; sok-kerot ahut kerotpet asonle; latum aphan rotpetnon; drakha alang plengpletik drakha kesor asonle latum aphan sornon.

¹⁴Suri suri atum Kangsai Arlok along dolo. Hadaksi HEMPHU Arni vang dapprangpo.

¹⁵Arni lapen Chiklopi ingtingkuk-lo, lapen chiklolongso atur khelanledet-lo.

¹⁶Zaion anglong pen HEMPHU hang-lo; Jerusalem pen Alangli se pathelo, pirthe lapen sining-inghun klemhurlo. Bonta Alangli rat aphan raipo.

¹⁷“Ansi, Israel, Ne HEMPHU, nang Arnam lo pu chinipo. Ne Zaion athak, Ne inglong kangthir si do. Jerusalem ke isi kangthir arongsopi plangpo; la aputhak bang akhei atum puthot nang cheraidetdelo.

¹⁸Halaso ahut inglongpi-heihei drakha aberi si dipthip-po, lapen inglong alongtinta chainong thek-longpetpo; Judah adang bithe alangroi alangjeng dorphlup alang dopo. HEMPHU a-Kardomhemthepi pen eroi alangjeng lipo. lapen la Akasia Arlok aphan lang padorpo.”

¹⁹“Ijip isi kejejangtang ajo plangpo, lapen Edom isi keruhup akeningjoino plangpo. pima latum Judah adet tengkheng-lo lapen la adaikave arat aphan pathilo.

²⁰Bonta Judah along ke kaike ta monit doverji, lapen Jerusalem alongta a-ove ove anta doji.

²¹Kethitang atum apot Ne alarhuiji , adai apot Ne pajokje. athema Zaion along HEMPHU do.”