Read Karbi AMOS 2 Bible Online

AMOS 2 - Karbi bible

AMOS 2

¹HEMPHU lasonsi pulo: “Pima Moab sonthom aron kangdi apot, lapen sonphli apot, Ne aduk kepiji pavedetdelo; Pima Edom arecho arepi-heihei me pachodetsi saini paplang-lo.

²La apotsi Moab aphuthak isi ame Ne toipo, lapen la Kerioth apaisong-heihei me chodetpo, lapen Moab hurisei angbong, kehangjo angbong lapen pong-ut arki angbongsi thipo;

³Ne latum angbong pen kepangri abang pavedetpo, lapen alanglilong la arechoso an pathikoipo,” pusi HEMPHU pulo.

⁴“Pima Judah sonthom aron kangdi apot, lapen sonphli apot, Ne aduk kepiji pavedetdelo; pima latum HEMPHU aron dengdedet-lo lapen Alangli kangsai-i aron-heihei rimredet-lo, bonta latum kopu-an kechobei arnamsi latum aphan pasuipo, latum aphusar atum aphi phi kengkam chejorlo.

⁵La apotsi Ne Judah aphuthak isi ame toipo, lapen la Jerusalem apaisong me chodetpo.”

⁶HEMPHU lasonsi pulo: “Pima Israel sonthom aron kangdi apot, lapen sonphli apot, Ne aduk-kepiji pavedetdelo; pima latum kengset atum aphan rup pen chojorlo, lapen keboidet abangphan keng-op echor pen chojorlo.

⁷Latum keduk atum aphu pirthe alongle aduk along donglam lam lo lapen kedukdet atum atovar pen pasuilo; inut amonit lapen la apo inutnat a-arloso along damsi Ne kangthir amen pangthirthedet-lo;

⁸Latum keduk atum pen kevan ape limsi adovantin adung ithorlo; lapen adai ketu atum ahorlang latum a-Arnam ahem junlo.”

⁹“Tebonseta Ne latum angno Ammon aphan pavirlo. La kangtui kedar arong kangtui ason, lapen kangtang phongrong longpoh arong-heihei ason Ne la angsong athe lapen la arum angkur pavirtang-lo.

¹⁰Lapen Nesi nangtum aphan Ijip adet pen nangvanlo, Ammon atum alongle kechepahemphu-jisi lapen ningkan phlikep kejejangtang ajo jalinlo.

¹¹Lapen Ne nangsomar atum aphan manene montri atum lapen nangrisomar atum kechepanong abang Arnam aphan kekroi kechebi abang paplang-lo. O Israel arat atum, lapuhelo kalima?” pusi HEMPHU pulo.

¹²Bonta Arnam aphan kechepanong kekroi kechebi abangphan nang horlang pajuntoilo, lapen montri atum aphan nang montri-ri pusi hukum pilo.

¹³“Chininon, sok ahemkonglong sokpeng pen kesit-het ason thak-thaksi Ne nangphan arum nangberhetpo.

¹⁴Kangjar un atum prapjin pen virpo, lapen kangtang atum ajakong chelonglelo jakong kethenei abangta amethang akai chepajok thekthelo.

¹⁵Lithai kejo abang arjapthip un-edetpo lapen akeng kechat abangta amethang chepajok thekthelo,

¹⁶lapen jakong kethenei angbong aning kangtangrak abang seta halabangso arni reng angse si katjuipo,” pusi HEMPHU pulo.