Read Karbi AMOS 4 Bible Online

AMOS 4 - Karbi bible

AMOS 4

¹“Bangso alam arjutha, nang Bashan adet achainong api atum, Samaria Anglong kedo atum keduk abangphan kechenek abang lapen keboi abangphan keberrop abang apenan atum aphan, ‘Netum kejunjile, vannon’ pu kepu abang!

²HEMPHU Arnam methang kangthir a-ot pen seme tangsi pulo, Chininon, nangtum aphuthak ahut arni vangpo, latum arhi-heihei pen nang pondetpo, kejutsi nangtum aphan ok arhi-heihei pen pondetpo.

³Lapen kephri adim-heihei angbong abangphutin kengson pen la aphrang lapen nangtum aphan Harmon arlo varchorpo, ” pusi HEMPHU pulo.

⁴Bethel anat vang-ra aron ingdinon; Gilgal anat, lapen aron kangdi pachannon; arnivangta nang athok-heihei vannon; nang phankep pen ephan nithom pen ephong vannon;

⁵Thap ahim pen kero athok dan vannon lapen ningkehang adan-heihei pachethangra lahei paklangnon; pima nangtum lahei keklem nangning dokpik-lo, O Israel arat atum! pusi HEMPHU pulo.

⁶“Ne nangrongsopi kedo-an aputhak akhim kevan abang-lo, lapen nangtum adim an him padordelo, seta nangtum Nelong vangvedet-lo,” pusi HEMPHU pulo.

⁷“Lapen sok kerot kerim apor chiklo jonthom dolang seta Ne nangtum aphan arve pajang longledetpo; Ne isi arongsopi aphan arve pajangtoipo lapen akaprek arongsopi aphan ke arve avelo; rit ejai aphuthak arve jangpo, lapen arve kejangje ajai ke thikhraipo.

⁸La apotsi rongsopi hini kethom asor lang kejunjisi elong arongsopi dampo lapen aning kehang plengplelo; Seta nangtum Nelong vangvedet-lo.” pusi HEMPHU pulo.

⁹Ne prisam pen sok pathikhrai pen nangtum aphan pasung-lo; nangtum aberi lapen drakha aberi-heihei Ne pangsamrilo: Nangtum athebo arong lapen ajit arong-heiheita longkoi cholap-lo; Seta nangtum nelong vangvedet-lo, Pusi HEMPHU pulo.

¹⁰Ne Ijip adet asonsi Ne nangtum angbong mavur nangtoilo; Ne nokjir pen nangtum arisomar aphan pathilo; Ne nang-losei-heihei pondet-lo; lapen Ne nangtum amukam kenemthu angnim pangnimlo; seta nangtum Nelong vangvedet-lo, pusi HEMPHU pulo.

¹¹Arnam, Sodom lapen Gomorrah kepavir asonthotsi nangtum angbong ajehak aphan pavirlo, lapen nangtum me angkang pen kevungphit athengtom abeng nangnak-lo; Seta nangtum Nelong vangve det-lo. pusi HEMPHU pulo.

¹²La apotsi, O Israel, Ne lasonsi nangtum aphan klempo; Pima Ne la nangtum aphan klempo, Nang Arnam pen kechetongjile chesiknon, O Israel!

¹³Pima langtha, inglong-heihei lapen tomon kepinchong abang lapen monit aphan Alangli kematha la pachinilo; adap pen ajo kepinchong a-Bang lapen pirthe athak kangtui adim-heihei kedo a-Bang; HEMPHU, muluk a-Arnam, helo Alangli men!