Read Karbi AMOS 5 Bible Online

AMOS 5 - Karbi bible

AMOS 5

¹Ne nang phuthak keklemji ningduk alun labangso alam arjutha, O Israel akhei atum:

²“Kangthir-et Israel adet kreptang-lo thurthedetpo; Baduta kangthirjir abang avesi la alanglilong otekangbup-lo.”

³Pima HEMPHU Arnam lasonsi pulo: “Bang suri isi kedam arongsopi, bang pharo isi si rengchotji, lapen bang pharo isi kedam atum bangkep si Israel akhei aphan dochotji.”

⁴Pima HEMPHU lasonsi Israel akhei aphan pulo: “Nephan rinon lapen rengnon;

⁵bonta Bethel along rinangne, lapen Gilgal arlo lutdam nangne mate Beersheba anatta paririnon. Pima Gilgal ban damnangvekpo, lapen Bethel thangta kalidet plangpo.”

⁶HEMPHU aphan rinon lapen rengnon, kalite Alangli Joseph ahemtun angbong me asonsi klangpo mene, lapen la chopo Bethel aphan la kepamep abang avedetpo.

⁷O nangtum ahok-kangsai alar Riho pamanlo, lapen bang kelongji amar kekhang abang.

⁸Vosokpi lapen Hingchong-patherang kepinchong a-Bang lapen kangtingpik pen adap pathe-ang a-Bang lapen anerlo pangtingsi ajo pamanlo, talo alang-heihei aphan kehang a-Bang, lapen lahei pirthe athak dung-lo HEMPHU helo Alangli men.

⁹Kangtangrak aphuthak prapjin pen pavirdet a-Bang, la apotsi paisong aputhak kevir vang-lo.

¹⁰Inghap along kangchek abangphan latum hijim, lapen ahok keningje abangphan latum kehijim pen mathalo.

¹¹La apotsi keduk atum aphuthak nang chenek-ot lapen latum pen thengthe anghor nang endun nangtum kesoi a-arlong pen hem-heihei chekimtang-lo bonta lahei along nang dolonglelo nang langmesem adrakha aberi che-etang-lo bonta lahei ahorlang nang jun longlelo.

¹²Pima Ne chini nang ko-an aron-heihei ingdilo, lapen ko-an nangpap kethe, nang athikpet aphan pasungsi tangka kecho-en abang, lapen keduk aphan inghap along kelongji ajakong thi-lo.

¹³La apotsi kecherethek abang lason ahut dojoipo; pima la kehingno ahut.

¹⁴Kemele rinon lapen kehingno kali, la pen nang rengji; lasonsi HEMPHU muluk a-Arnam nangkepu asonthot, nanglong padonang.

¹⁵Kehingno hijimnon lapen akemele inghonnon, lapen inghap along ahok akangsai pathirnon; HEMPHU muluk a-Arnam Joseph akhei ahin atum aphan ingjinsoji mene.

¹⁶La apotsi HEMPHU, muluk a-Arnam, HEMPHU lasonsi pulo: “Rong adim kethe an chiru charnap dopo; lapen rongsopi tovar alongtin latum pupo, ‘ba pi anset-lo!’ latum aning padukjisi sai ketiki abangphan, lapen lunse atum aphan pachiru pacharnapjisi hangpo,

¹⁷lapen drakha aberi an hadak kechiru kecharnap dopo, pima Ne nangtum angbong damputpo,” pusi HEMPHU pulo.

¹⁸HEMPHU arni aning kehang abang paphonang! Nangtum tangte kopi athesi HEMPHU arni kenangpo? lake kangting-lo, lapen kethe-ang kali;

¹⁹inut amonit ejon ahingho pen kekat ason, lapen ejon athokvam laphan chetong-lok-lo mate hem arlo damsi arpong athak ari chevek-ling ahut lapen ejon apherui laphan archudap-lo.

²⁰HEMPHU arni kangtingkuk kalima? lapen kethe-ang kali, lapen ingtingrimsi lake la an kekhelanlelo?

²¹“Ne hijim, nang chojun Ne langremlo, lapen nangtum kangthir amei-heihei kechingrum along Ne thang Nening arong ave.

²²Nangtum Nephan me kephrin-i athok-heihei lapen sok-sang athok pi seta Ne lahei dengde detpo. Lapen nangtum kepangtu api ningkangsam athok-heihei anta, Ne langledetpo.

²³Nangtum kehangkong alun ingtonnon, nangtum akumbeleng arki Ne arju ingtungte.

²⁴Bonta lang-heihei ason ahok-akangsai palinang lapen kaike keliver alangso ason kechokpet padonang.”

²⁵Nangtum ningkan phlikep kejejangtang ajo Nephan athok ajir-heihei lapen sok-sang adan-heihei Nelong vanloma, O Israel akhei?

²⁶Nangtum arecho Sakkuth lapen Kaiwan la nangtum achiklolongso a-Arnam, la nangtum keselam akumlin-heihei rungpo;

²⁷la apotsi Ne Damaskas parai bang adet nangtum aphan ban bidampo pusi HEMPHU pulo, Alangli menke muluk a-Arnam.