Read Karbi AMOS 6 Bible Online

AMOS 6 - Karbi bible

AMOS 6

¹“Zaion along sungsepin pen kedo atum paphonang, lapen Samaria anglong along kephere avelo pu kematha atum paphonang, Det atum angbong aphrangsi amonit atum latum along Israel akhei vang-lo.

²Kalneh arong damra, lapen langtha; lapen hadak pen Hamath Kethe damnon, lapen Philistia atum Gath along hir damnon. latum bangso adet-heihei apar memuma? Mate nangtum alongle apar halatum alongle themuma?

³Kehingno aron kedengmo abang, O nangtum, lapen kevir arni kevan kepatebok atum?”

⁴“Ingnar aso ahongplang-heihei athak ke-ithor abang, lapen api ahur pen biresak chainong aso kecho abang paphonang;

⁵Kumbeleng arki pen langmeme alun kelun abang, lapen David ason amethang aphan lun kelun ajohton keselam atum;

⁶Harlung-heihei ahor kejun abang lapen kemenei ajangthu-nempru-heihei pen amethang chehi bonta Joseph kevir aputhak aning duk-dunde!

⁷La apotsi latum helo ban kedam nangji atum angbong kedam nangcheng atum plangpo. Lapen aning arong kechepisi chephajeng atum avedetpo.

⁸HEMPHU Arnam amethangsi seme tang-lo (muluk Arnam HEMPHU-si pulo!)” “Jakob anekethe Ne hijimlo, lapen la apaisong-heihei ta hijimlo lapen rongsopi lapen la along kedo-an Ne hodaipo.”

⁹Lapen bangkep amonit jongsi ehumpet ahem along dorappet seta latum thipo.

¹⁰Lapen Edom amonit, la me kephrin abang, hem pen areppi kevanjisi laphan angsong ponpo, lapen hem arlonei kedo abangphan pupo, “Nanglong anut kaprek dolangma?” Alangli thakpo, “ave;” lapen alangli pupo; “Dojoinon! HEMPHU amen etum parno nangne.”

¹¹Pima chininon, HEMPHU hukum pilo, lapen hem thepo parusi pabeng-lo lapen hemso pachet-ilo.

¹²Losei-heihei longpak-heihei athak ingplong ma talo athak chainong pen haibai ma? Bonta nangtum ahok-akangsai bikar lapen athe riho pamanlo,

¹³Lodebar along ning cheparong atum, “Etum methang ajakong pen Karnaim etum aphan endet lo kalima?” pu kepu abang,

¹⁴“Pima chininon, Ne nangbe pathurjisi isi akhei ingthurpo, O Israel akhei” pusi muluk a-Arnam HEMPHU pulo; lapen latum Hamath kecheng pen Arabah alangso anta nangtum aphan nangchenekpo.