Read Karbi AMOS 7 Bible Online

AMOS 7 - Karbi bible

AMOS 7

¹Lasonsi HEMPHU Arnam nephan paklang-lo: Chininon, Alangli aphi adihu kechingjokcheng ahut longvur-heihei pacheplang-lo; lapen chininon, lake recho apharman rotdet aphi kechingjok-thu-heihei abap-lo.

²Latum det abap chodet ahut ne pulo, “O HEMPHU Arnam, diyatha, ne nang choningrilo! Kosonsi Jakob arjapthek poma? lake bihek!”

³HEMPHU bangso alam aning cheruilo; “La plangpledetpo,” pusi HEMPHU pulo.

⁴Lasonsi HEMPHU Arnam nephan paklang-lo: Chininon, HEMPHU Arnam me pen kangsaijisi hang-lo, lapen la lang-lom kethe me chodet-lo lapen longle adang ta chodet-lo.

⁵Ansi ne pulo, “O HEMPHU Arnam, pasangnon, ne nangchoningrilo! Kosonsi Jakob arjuthek-poma? Pima alangli bipik”

⁶HEMPHU bangso alam aning cheruilo, “La plangpledetpo,” pusi HEMPHU Arnam pulo.

⁷Alangli nephan paklang-lo: Chininon, HEMPHU pholong arri pen kekim apaisong adungsi arjapding-lo, Alangli rideng isi apholong arri do.

⁸Lapen HEMPHU neliphan pulo, “Amos, nang kopi thek-long-loma?” lapen neli pulo, “Isi pholong arri.” ansi HEMPHU pulo, “Chininon, Ne isi apholong arri Nerat Israel atum angbong bilang; Ne latum aphan puthot diyathuthelo;

⁹Isaak akangtui adim-heihei rongman paplangpo lapen kangthir-et adim-heihei pangsampo, lapen Ne nokjir pen Jeroboam ahem abe thurpo.”

¹⁰Ansi Amaziah Bethel akurusar Jeroboam, la Israel arecho anat toisi pulo, “Amos nangbe thursi Israel akhei angbong bidi klemlo, det alang lam an chechak un-edet-lo.

¹¹Pima Amos lasonsi pulo, ‘Jeroboam nokjir pen thipo, lapen Israel atum methang alongle pen kehelo ban damnangpo.’”

¹²Lapen Amaziah, Amos aphan pulo, “O sangkelang abang, damra ha Judia adet kehelole damnon, lapen hadak-le him chonon, lapen hadak-le montrinon,

¹³Dak Bethel along mo nonphi seta montri-ri, lake recho karcho adim, lake det a-Kardomhemthepi lo.”

¹⁴Ansi Amos, Amaziah aphan thak-lo, “Ne montri kali, lapen montri asopota kali; bonta ne inut pi ahur kevi abang, lapen inut ingle arong-heihei kangprun abang,

¹⁵lapen HEMPHU nephan pi ahur kevi pen nepondet-lo, lapen HEMPHU nephan pulo, ‘Damnon, Nerat aso Israel aphan montrinon.’ ”

¹⁶Non la apotsi HEMPHU alam arjunon. Nang pulo, “Israel aputhak montrinon, lapen Isaak ahem aphan than pachethang nangnelo.”

¹⁷La apotsi HEMPHU lasonsi pulo: “Nangpiso rongsopi along abang chejorpo, lapen nangsopo lapen nangsopi atum nokjir pen klicheipo, lapen nang longle adak pen phlakdak-dak po; nangmethang ke kangthirthe adetsi thipo, lapen Israel atum methang adet pen kehelosi ban dam nangvekpo.”