Read Karbi AMOS 8 Bible Online

AMOS 8 - Karbi bible

AMOS 8

¹Lasonsi HEMPHU Arnam nephan paklang-lo: Langtha barla ahut eton athesere dolo.

²Lapen Alangli pulo, “Amos, nang kopi thek-long-lo?” Lapen neli thak-lo, “Barla ahut eton athesere.” Ansi HEMPHU nephan pulo, “Nerat Israel aputhak kejut nangletang-lo; Ne latum aphan diyathuthelo.

³Halabangso arni kardom ahem alun chiru-charnap-heihei plangpo,” pusi HEMPHU Arnam pulo. “Kethitang abang arpum ongdungpo; halatum aphan alongtin adimta var pangsamripo .”

⁴La arjunon, nang keboidet atum aphan kedongsit, lapen keduk atum alongle kepajutdet abang,

⁵Chepulo, “Ili sok kejor longji aphan chiklo kemi mantusi dampoma? lapen thengthe kejorji pura ketirvaji aphan mantusi Kesang Arni kedam poma, lalote ili ton pabin pen lapen ador parlulongpo lapen ahok-he alin-heihei en-longpo.

⁶Anke elin arup pen keduk atum lapen keng-op echor pen keboidet atum aphan kenamthekjile lapen kenangne athengthe jorlonang?

⁷HEMPHU, Jakob anekethe pen ajok semetang-lo:” “Chenamsi Ne latum akam-heihei isita tengnenedetpo.

⁸Labangso pen apot det klemhurpo kalima, lapen la along kedo an anut-tin ningripo kalima, lapen kadokave Nil Aroi asonsi dampo lapen inglimthuchokpo.”

⁹“Lapen halabangso arni” HEMPHU Arnamsi pulo, “Nerlo-chittim apor Ne arni pachipo, lapen nerlo kethe-ang ahut pirthe pangtingsangpo.

¹⁰Nangtum rong-aje Ne ningduk paplangpo, lapen nangtum alun-heihei do-an ningri paplangpo; Ne kedo-an avan pethoila pa-umpo, lapen aphutin paphukoipo; Po epumpet asopo aphan kecharhe asonsi Ne la paplangpo, lapen la kejut ke isi hodak arni asonpo.”

¹¹“Chininon, arni vangbomlo,” pusi HEMPHU Arnam pulo, “Ne pirthe athak akhim nangtoipo; him akhim kali, lang kang-it akhimta kali, bonta HEMPHU alam-heihei karju akhim.

¹²Halatum talo pen talo an damthap-po, lapen Nirep pen Nihang anta; halatum HEMPHU alam kerijisi along kaprek kaprek dampo, bonta halatum la longledetpo.”

¹³Halabangso arni langmesen a-okarjang atum lapen arisomar atum lang kang-itsi thirengjengpo.

¹⁴Samaria a-Ashimah pen semeketang atum pulo, “Nang arnam kereng ason, O Dan,” lapen Beersheba kereng-i atovar ason, latum kreppo, lapen kaike seta thurthuthekthe detpo.