Read Karbi AMOS 9 Bible Online

AMOS 9 - Karbi bible

AMOS 9

¹HEMPHU dovan akung karjapther ne thek-long-lo, lapen Alangli pulo: “Hongthu klemhurhetik an det akut kethe-heihei arbunon, lapen rat kedo-an aphu-heihei theng-rop rop-non; lapen latum ahin an Ne nokjir pen pathipo; latum inut bakta kat longlelo, latum inut bakta jok longlelo.”

²“Halatum chom arlo hut seta hadak Ne ri si latum aphan vandetpo; latum sining arlu seta hadak pen ne ri si latum aphan vandetpo;

³Latum ongsi Karmel anglongpi along chepatu seta, Ne latum aphan riji lapen nepchekji. Latum ongsi talo along arlo chepatu seta Ne talo alang api aphan hukum pisi latum aphan parchutoipo.

⁴Lapen latum latum ahotur along ban dun-et seta hadak Ne nokjir aphan hukum pipo lapen la latum aphan thupo; lapen akeme aphan kali, kehingno aphansi Ne latum aphuthak nemek bilorpo.”

⁵HEMPHU muluk a-Arnam, longle paphosi lapen la pangjirdet abang, lapen la along kedo atum an ningduk lapen la kedo-an Nil aroi ason thurpak lapen inglimthupo, Ijip a-Nil ason;

⁶Alangli sining angsong-heihei kangtui kedo adim kechikim abang, lapen pirthe athak longle arlo ahem chepinchong abang; talo alang-heihei kehang abang lapen pirthe athak halahei dung-lo, HEMPHU helo Alangli men.

⁷Ne ingno nangtum Ethiopia atum ason kalima, O Israel arat atum, HEMPHU pulo. “Israel aphan Ne Ijip adet pen vanvelangma, lapen Philistia atum Caphtor pen lapen Siria atum Kir pen kalima?

⁸Chininon, HEMPHU Arnam amek ke papi arat atum aphuthak, lapen la Ne longle athak pen pavirdetji; Muthe Ne Jakob akhei pavirdet khangjangje,” HEMPHU-si pulo.

⁹“Pima chininon, Ne hukum pipo, lapen det kedo-an angbong Ne Israel akhei aphan inut ingkrung pen sok kepajang asonsi hijukpo, bonta longkoiso imuta pirthe athak klokledetpo.

¹⁰Ne rat papi atum an nokjir pensi thipo, komatsi pulo, kehingno atum aphan phophe mate vangve detji pu.”

¹¹Halabangso arni kekreptang lapen kedak-heihei la keselamthuji aphan David ahem Ne ingthurji, lapen la kerutang an ingthurji, lapen hako ahut asonsi la kimthumipo;

¹²Anke latum Edom ahem chepahemphu longpo lapen Ne men pen kehang adet anta lo, la keklem abang HEMPHU-si kepulo.

¹³Chininon, arni nanglebomlo, HEMPHU si pulo, “Hai kebai abang kerot abang phopo lapen drakha athe kedonglam abang chili chili kerik abang phopo; inglong-heihei pen drakha alang klo dopdop po lapen inglongso an la pen ingbakpo.

¹⁴Ne rat Israel akopai-heihei Ne parengthupo, lapen latum kerutang arongsopi chekimthusi dopo: latum drakha arikang epo lapen lahei alang junpo, lapen latum beri choklemsi lapen lahei athesere chopo.

¹⁵Ne latum adet aputhak e-po, lapen latum aphan kaiseta Ne kepitang alongle pen kaike seta phujokje detpo,” HEMPHU nang Arnamsi kepulo.