Read Karbi JONAH 1 Bible Online

JONAH 1 - Karbi bible

JONAH 1

¹Arnisi HEMPHU alam Amittai asopo Jonah along vangsi pulo,

²“Thurra Nineveh rongsopikethe along damnon, lapen laso aputhak asekethe pen hangnon, pima halatum ajat kelangno Ne ingno klangtang-lo.”

³Bonta Jonah thursi Tarshish anat HEMPHU angno pen kat-lo. Alangli Joppa anat damsi lapen Tarshish anat kedamji pu atelongpi thek-long-lo; lasi alangli kedam-i anam pisi HEMPHU angno pen halatum pen pen Tarshish anat kedamjisi telong chethap-lo.

⁴Bonta HEMPHU talo athak tomon pathepik-lo, lapen talo athak jasemetsi tomon tipri vang-lo, lasi telong chebengrai na pu phere nang-lo.

⁵Telong kevek atum pheresi anut-tinta amethang a-arnam aphan chehang-rep lo; lapen halatum aphan keparjang muchotjisi telong arlo kedo amar-atar talo arlo varchuilo . Bonta Jonah ke telong arlonei angdeng damtang-lo lapen i-joi-lo, lapen amek jangphit-lo.

⁶Lasi songjalin abang vangsi alangliphan pulo, “Nang kopi athesi nangmek kejang-lo? Thurra arnam aphan hangnon! Arnam etum kevirvedetji aphan isi mathaji mene.”

⁷Lapen halatum lahin lahin chethan-seilo, “Vangnon komat abang pen apotsi ili bangso akesung kephonang-loma, la kechinijile ili khadot pathulonang.” Lasi latum khadot pathulo, lapen khadot along Jonah amen klang-lo.

⁸Ansi latum alangliphan pulo, “Nelitum aphan nethantha, komat abang pen apotsi ili bangso akesung phonang-loma? Nangli kam kopi? Lapen konat pensi nangli kevang? Nangli det konat? Lapen nangli khei kopi?”

⁹Lapen alangli latum aphan thak-lo, “Neli ke Ibri; lapen neli sining a-Arnam talo lapen longle kepinchong abang HEMPHU aphan pherelo.”

¹⁰Anke halabangso amonit atum pherepik-lo lapen alangliphan pulo, “Nangli la kopisi keklemporloma !” Pima alangli HEMPHU angno pen kat-lo pu halabangso amonit atum chinilo, pima alangli halatum aphan thantang-lo.

¹¹Anke halatum alangliphan pulo, “Talo nelitum aphan kehamjile nangliphan nelitum kopilo nang keklem nangji?” Pima talo atomonpi thethubomlang.

¹²Alangli halatum aphan pulo, “Neliphan neponra talo along nevarchuinon; anke talo nanglitum aphan hamdetpo; pima neli chini, la tomon tipri nanglitum aphuthak kevang lake neli pen apot-lo.”

¹³Jonghesetta puthot telong longle anat kevangthuji aphan monit atum jasemetsi vek-lo, bonta halatum un-e pima halatum aphuthak tomon thethubomlang.

¹⁴La apotsi latum HEMPHU aphan hang-lo, “Nelitum nang choningrilo, O HEMPHU, laso amonit akai pen apot nelitum aphan nepavir longri, lapen adai kave amonit avi nelitum aphuthak bat-ri, pima nangli O HEMPHU, nanglining kehang alingsi keklem.”

¹⁵Ansi latum Jonah aphan ponlo lapen talo varchuilo; lapen talo la lang adihu pen hamdet lo.

¹⁶Anke monit atum HEMPHU aphan pherepik-lo, lapen halatum HEMPHU aphan karkli athok pilo lapen seme-heihei tang-lo.

¹⁷Lapen Jonah aphan kepajoilutjisi lang-okthepi HEMPHU pathik tang-lo, lapen Jonah jothom-nithom lang-ok apok arlo donang-lo.