Read Karbi KELAKHA 10 Bible Online

KELAKHA 10 - Karbi bible

KELAKHA 10

¹Moses aphan HEMPHU pulo,

²“Rat kehangpetji aphan lapen mukam kephriji aphan rup apong-ut hini selamnon.

³Pong-ut hini pen kebut ajirding-lote, Ne kedo A-pehem ajakan along nangdung rat atum kompet chingrum nangpo.

⁴Bonta isi apong-ut si arki dochot-lo pulote, arotin ajalin atumsi nangdung komchen pen chingrumchotpo.

⁵Kebut arki thihek lote, nihang kedo akhei atum amukam chephrisi thurnangpo.

⁶Phongni abatai kebut arki thihek lote nitur kedo akhei atum si mukam chephri si thurnangpo. Lasonsi mukam kephriji aphan kebut arki pathihek nangji,

⁷bonta rat kehangpetji aphan ke, kebut arki ajir padinglen nangji.

⁸Pong-ut-heihei ke Aaron, kurusar asopo atumsi but nangji.” Kevangji arni anta bangso ketok aron-heihei si talon nangji.

⁹Nangdet along jongsi nangtum ron kedo ahut, nangtum aphan nang-ketengkheng ahotur pen kechedan ahut, lahei apong-ut penle butnon. Ne, nang Arnam HEMPHU-si nangrappo lapen hotur arideng pen nangpajokpo.

¹⁰Lapen ke ning-arong asek ahut nangtum Chiklo Kemi Arong-aje-heihei lapen nangtum akaprek dhorom, arong-aje-heihei ahut nangtum kephrin athok-heihei lapen kejelang athok-heihei kepi ahut nangtum pong-ut but nangpo. anke Ne nangrappo. Ne nang Arnam HEMPHU-lo.

¹¹Rat atum Ijip ke-o hini aningkan, hini achiklo ingkoi arni, HEMPHU kedo A-pehem aputhak anghun chirungtang-lo,

¹²lapen Sinai Asangti ajo pen Israel atum kebar pangcheng-lo. Paran akejejangtang ajosi inghun salo.

¹³Moses pen ajok HEMPHU ahukum atengsi latum kedam pangcheng-lo,

¹⁴lapen latum aphongtin kecheterek ahut, latum kai atengthotsi adeng angthun ateng chedamrep-lo. Judah akhei keja aber kedo asong an bar paphrangpo, asong pen asong, Nashon, la Amminadab asopo si ja ponpo.

¹⁵Nethanel, la Zuar asopo, ke Issakar akhei asong aphan ja ponpo,

¹⁶lapen Eliab, la Helon asopo ke Zebulun akhei ajalinlo.

¹⁷Anke Pehem ke phri parunhuppo, lapen la kepon atum Gershon lapen Merari aro pon si bar paphrangpo.

¹⁸Adunthu, Reuben akhei pen keja aber kedo asong atum barpo, asong pen asong barpo, Elizur, la Shedeur asopo si ja ponpo.

¹⁹Shelumiel, la Zurishaddai asopo ke Simeon akhei aphan japonpo.

²⁰lapen Eliasaph, la Deuel asopo ke Gad akhei ajalinlo.

²¹Anke Kohath a-Levi aro atum kangthir ajohton an pon si barpo. Alanglitum adunthu amukam along nangkele ahut ke Pehem ke puthot parjap et nangpo.

²²Adunthu, Ephraim akhei pen keja aber kedo asong an barpo, latum asong asong si barpo, Elishama, la Ammihud asopo si ja ponpo.

²³Gamaliel, la Pedahzur asopo ke Manasseh akhei ajalinlo,

²⁴lapen Abidan, la Gideoni asopo ke Benjamin akhei ajalinlo.

²⁵Padusi ke, Dan akhei pen keja aber kedo asong atum ke do-an asong aphan aphi kehon atumlo, latumta asong pen asong barpo, Ahiezer la Ammishaddai asopo, si songjalinlo.

²⁶Pagiel, la Okran asopo ke Asher akhei asongjalinlo,

²⁷lapen Ahira, la Enan asopo ke Naphtali akhei ajalinlo.

²⁸Lason helo kebar nangji adeng-lo, asong pen asong, Israel atum mukam phri lote barpo.

²⁹A-ongsar Hobap, la Jethro Midian asopo, aphan Moses pulo, “Nelitum aphan HEMPHU nekepiji adimsi nelitum kebarpo. Israel atum aphan alangli pachingthurji pusi chechak-lo, la apotsi nelitum along nangdunnon, lapen nelitum akechingthur nanglitum pen chethakpo.”

³⁰Hobap thak-lo, “Kali, neli rong methangsi ne chedampo.”

³¹Kanghon pen nelitum aphan o-ri non, “Moses pulo.” Nangli chini, nelitum kejejangtang ajo mukam kekim unji adim, lapen nanglike nelitum aphan japon unpo.

³²Nangli jongsi nelitum along nangdunlote, HEMPHU nelitum aphan nekepi ahirjume an nanglithakpo.

³³Rat atum Sinai, inglong kangthir, ke-o ahut, latum nithom damlo. Latum mukam kechekimji adim kelongji aphan, HEMPHU Akechejok Asinduk latum aphrang si kaita damlo.

³⁴Latum amukamtin pen kedambom ahut anerlo ke latum aphuthak HEMPHU anghun si binlo.

³⁵Kechejok Asinduk kebar ahut, Moses pupo, “Thurnon, HEMPHU; nanghotur atum aphan papratsei non lapen nangphan kehijim atum aphan pabephlung non!”

³⁶Lapen la kesangkok ahut, alangli pupo, “Nang-chevoithu non, HEMPHU, Israel asuri suri ahemtun along.”