Read Karbi KELAKHA 11 Bible Online

KELAKHA 11 - Karbi bible

KELAKHA 11

¹Rat atum akesung alam HEMPHU aphan than pasimulo. Latum alam HEMPHU arjulongsi, latum aphuthak alangli aningthilo, lapen rat aphuthak me toilo. Latum aphan la cholo lapen mukam ehin kejut anat pavirlo.

²Kerap kelongjisi rat atum Moses aphan hangjolo; alangli HEMPHU aphan ardomlo, lapen me hamlo.

³La apotsi adim amen Taberah pulo, pima hadaksi latum angbong HEMPHU-si me pacholo.

⁴Israel atum along ajehak bang adet aso atumta dunlo. Latum ok kecho kehungpik atum do, lapen Israel atum amethang amatta pasimu pangcheng-lo: “Netum jongsi ajehak a-ok cholong asonte!

⁵Ijip along ke netum lang a-ok ninghang aling cholong, lapen netum aphan thangnatta sungse. Thoithe lapen thoithebonghom, arking, jirlang aharsun, harsun ke-er, harsun kelok etum kelong alam chemathadamtha?

⁶Bonta nonke etum ajakong damphak-lo. Non thangnatta kechoji ason ave-jatta ave bonta arnivangta manna le manna!”

⁷(Manna ke chili amu ason, arong kelok-op pen etjo.

⁸Rat atum barpo lapen la humpo, lapen kor along koipo mate long pen tokpo, lapen la phule along uppo, lapen ke la pen him selampo: lapen la chomat lote jangthu pen keselamtang ahim asonpo.

⁹Ajo apor ar-e keklo ahut si manna ta nangklo dunpo.)

¹⁰Rat atum amethang apehem-heihei ajakan along asong asong kecharjap-rep ahut, latum kepasimu alam Moses arjulong-lo. Alangli mathasungpik-lo, pima latum aphuthak HEMPHU aning thipik-lo,

¹¹lapen HEMPHU aphan alangli pulo, “Kopi apotsi nangli neliphan pu-an chenek-loma? Neliphuthak nangli kopi athesi ning kedokde loma? Kopisi nangli neliphan lahei arat arpu nekebat-loma?

¹²Nele latum aphan kepinchong kali mate latum aphan mahang kepathek kali! Kopisi kelana abangphu ason neliphan paklemtoi loma lapen latum aphan aso ason arbaksi aphusar atum aphan nangli kechak alongle anat soding nepapontoi loma?

¹³Lapen HEMPHU aphan alangli pulo, ‘Kopi apotsi nangli neliphan pu-an chenek-loma’ Neliphuthak nangli kopi athesi ning kedokdeloma? Kopisi nangli neliphan lahei arat arpu nekebat-loma?

¹⁴Neli methang ke lahei arat arpu en-un-e; lake neliphan the-ong-lo!

¹⁵Lasonsi nangli neli phuthak klembomjilang pulote, neliphan jinsora nelipathilot non, anke neli nangli kechenek chechak jokphlotpo.”

¹⁶Moses aphan HEMPHU pulo, “Bang throksi kep aman kedo, rat ajalin atum pangrumnon, lapen latum aphan Ne kedo A-pehem along vannon, lapen latum aphan nangdung keparjapjile thannon.

¹⁷Ne nanghirsi hadak nangpen chingkipo, lapen nangphan ne nangkepitang ajehak akarjong nang pen ponsi latum aphan pipo, anke lahei arat arpu ke-en unji aphan latum nangphan nangrapdun unpo, lapen nang inutnat arpu en nangnelo.

¹⁸Non rat atum aphan thannon, ‘Penap aphan chepangthirnon; nangtum kechoji aphan ok longji. Nangtum kechiru HEMPHU arjulo lapen nangtum kechoji aphan ninghang-lo lapen Ijip adet ke long-o pusi nangtum pulo. Nonke nangtum aphan ok HEMPHU nangpipo, lapen nangtum la chonangpo.

¹⁹Nangtum la arnisi, mate nini mate nipho, mate nikep mate ni-ingkoi ansi chochot nangji lapu kali,

²⁰bonta chiklo ajon kangthim, nangtum ano pen la nangbarbetik, kecho milihak-hetik chonangji. La plangji pima nangtum HEMPHU aphan dengmolo, alangli nangtum angbong dolo lapen nangtum Ijip o-edet nangji pusi pasimulo.’”

²¹HEMPHU aphan Moses pulo, “Ladak neli bang suri pharothrok arat aphan jalo, lapen nangli pulo latum aphan chiklo ejon dorphlup a-ok piji?

²²Latum aphan kepangkrang jile dorphlup achainong lapen abiresak pathi unjima? Talo along kedo alang-ok latum aphan dorphlupjima?”

²³Nejakong ahoi doma? HEMPHU thak-lo. “Ne kopima kepu tang alam plangjima plangplema nang thek-long dapprangpo!”

²⁴Ansi Moses damjuilo lapen rat aphan kopima HEMPHU keputang alam thanlo. Alangli bang throksi kep ajalin atum aphan pangrumlo lapen Pehem komchen padolo.

²⁵Anke HEMPHU inghun along nanghirlo lapen alangliphan ningjelo. Alangli Moses aphan kepitang ajehak akarjong enlo lapen bang throksi kep ajalin atum aphan la pilo. Latum aphuthak karjong nangkehir ahut, latum montri atum asonsi kehang ase pathelo, bonta ajirdingde.

²⁶Bang throksi kep angbong banghini ajalin abang ke Eldad lapen Medad, latum mukam arlo sakok-lo lapen Pehem along damdelo. Hadak mukam along amat karjong latum aphuthak vang-lo, latumta montri atum asonsi kehang ase pathelo.

²⁷Inut ariso Eldad pen Medad kopisi klemloma katvirsi Moses aphan thanlo.

²⁸Anke Joshua, la Nun asopo, Moses along kedodun abang, bihek penta Moses along kecherap dun abang-lo, alangli ningjelo lapen Moses aphan pulo, “Latum aphan khangnon, akehai!”

²⁹Moses thak-lo, “Nangli nelining kehang aputhak mathama? Nelining kehangke HEMPHU arat atum an aphuthak akarjong papinang lapen latum kedo-anta montri atum ason pahangjonang!”

³⁰Ansi Moses lapen Israel ajalin bang throksi kep atum mukam anat chevoilo.

³¹Menmen amat HEMPHU tomon nangtoisi kadokave ahin atalo pen vo-ut pavanpak-lo, longle athak ingrup-hini angsong lahei ingjarlo. Latum mukam along inghulo lapen la komchen heloving akilomitar anta inghuthip-lo.

³²Lasi halaso arni kedo-an atumta, jopangthangta, lapen puthot arni anta, rat atum vo-ut chonep-lo; baduta lin suri isi plengpletik ke pangrumbomlo. Kepakrengjisi latum mukam komchen sang-lo.

³³Kechoji aphan dorphlup a-ok-ke dolang ahut rat atum aphan HEMPHU aningthilo, lapen latum aphuthak keso avur padolo.

³⁴Halaso adim ke Kibroth Hattaavah (laso alam-athe ke “Jongboho Athiri,”) pima hadaksi latum ok kechoboho atum aphan pip-lo.

³⁵Ladak pen rat atum chetereksi Hazeroth pu adimsi latum mukam chekimlo.