Read Karbi KELAKHA 12 Bible Online

KELAKHA 12 - Karbi bible

KELAKHA 12

¹Kushpi a-arloso aphansi Moses chepangrilo, lapen Miriam lapen Aaron laso alam apotsi bok-lo.

²Latum pulo, “Moses pen-tong HEMPHU lam ningjechotjima? Alangli netum pen lam ningjejema?” Latum kopima kepu HEMPHU arjulong-lo.

³(Moses ke inut asotdut amonit, pirthe athak kedo-an amonit apar chepabimu.)

⁴Menmen Moses Aaron lapen Miriam aphan HEMPHU pulo, “Ne kedo A-pehem along nangtum vang nangji.” Latum damlo,

⁵lapen inghun archok along HEMPHU nanghirsi Pehem ajakan along arjap-lo, lapen hang-lo, “Aaron! Miriam!” Latum banghinita angno patekbok-lo,

⁶lapen HEMPHU pulo, “Ne non kopisi kepujima arjutha! Nangtum angbong montri atum kedo ahut, Ne latum aphan akethek-long-heihei pen chepaklangpo lapen latum aphan mang-heihei along ningjepo.

⁷Neban Moses pen kechingki ahut ke la prekpo; laphan Nerat Israel kedo-an aputhaksi kelang abang bat-lo.

⁸Lasi laphan ke Ne chepangnolorsi ningjeji, pachinidakji lapen tomo-chepatar ason kali; Ne arje alangli thek-long-lo! Kosonsi nangtum Neban Moses abe thursi lam keningjehailo?”

⁹Latum aphan HEMPHU aningthilo lapen Alangli ke-o pen,

¹⁰inghun ta Pehem olo, Miriam areng menmen si-i keso bonloksi banghamlo, lapen herai asonsi lokphlanlo. Bangpi aphan Aaron cholangphlilo, lapen bangpi aphan keso kebonham thek-long-lo,

¹¹Moses aphan alangli pulo, “Kanghon pen, akehai, nelitum akelu apap pen apot laso aduk neli papholongrinon.

¹²Labangpi aphan mahang kethek ahut-le a-ok ebeng an kechotang kethitang abang paplangplenang.”

¹³Ansi HEMPHU aphan Moses ardomlo, “O Arnam, bangpi aphan pamenon!”

¹⁴HEMPHU thak-lo. “Bangpi apo jongsi bangpi amahang along ingthokplak lote, bangpi ni throksi an si ketherak chechak nangchotpo. Lasi erui bangpi aphan mukam angtan inghap-hetnon, lapen laso aphile bangpi aphan arlo vanthunon.”

¹⁵Miriam aphan ni throksi mukam angtan si padolo, lapen bangpi aphan arlo vanvetik-ke rat atum cheterek-relo.

¹⁶Anke latum Haxeroth olo lapen Paran akejejangtang ajo mukam chekimlo.