Read Karbi KELAKHA 13 Bible Online

KELAKHA 13 - Karbi bible

KELAKHA 13

¹Moses aphan HEMPHU pulo,

²“Khei krehini akheitin pen inut ajalin ingvainon lapen Kanaan adet kepalangjoiji aphanle toinon, laso alongle si Ne Israel atum aphan kepipo.”

³Lasi HEMPHU ahukum atengsi, Paran akejejangtang ajo pen latum aphan toilo, abangphutinta Israel arat ajalin atumlo.

⁴Latum amen lahei helo: Reuben akhei pen Shammua, la Zaccur asopo;

⁵Simeon akhei pen Shaphat, la Hori asopo;

⁶Judah akhei pen Kaleb, la Jephunneh asopo;

⁷Issakar akhei pen Igal, la Joseph asopo;

⁸Ephraim akhei pen Hoshea, la Nun asopo;

⁹Benjamin akhei pen Palti, la Raphu asopo;

¹⁰Zebulun akhei pen Gaddiel, la Sodi asopo;

¹¹Joseph akhei pen (la ke Manasseh akhei aphanlo) Gaddi, la Susi asopo;

¹²Dan akhei pen Amiel, la Gemalli asopo;

¹³Asher akhei pen Sethur, la Mikael asopo;

¹⁴Naphtali akhei pen Nahbi, la Vophsi asopo;

¹⁵Gad akhei pen Geuel, la Machi asopo.

¹⁶Lahei helo longle kepalangjoiji aphan Moses ketoi pinso amonit atum amenlo. Moses Nun asopo Hoshea aphan amen lar si Joshua pu irlo.

¹⁷Latum aphan Moses ketoi ahut, latum aphan alangli pulo, “Nirep anat dak pen damra Kanaan adet anitur anat lutdammon lapen laso aphi inglong alongle anat lutdamnon.

¹⁸Langdam non la kopi adetma, ko-an amonit ke-ongsi hadak kedoma lapen latum ko-an ingtangma?

¹⁹Longle mesenma mate hingnodakma langnon, lapen rat atum kedo rongsopi arpong cheparpongpe ma mate cheparpong-chen pen tong kedoma langnon.

²⁰Longle aho-or doma lapen thengpi dothipma langnon. Lapen chenamsi hadak kepathe athesere ajehak nangtum kevang ahut vanvektu, “ (halaso ahut ke drakha arikang athe kemen pangcheng ahut-lo.)

²¹Ansi pinso atum nirep anat damlo, lapen Rehob atovarsoding nitur anat Zin akejejangtang ajo anat pen longle lang-lo, la nirep anat Hamath atovar akrong adung-lo.

²²Latum kechengsi ke nitur ahin alongle anatsi lutdamlo lapen Hebron anat vang-lo, hadak Ahiman, Sheshai, lapen Talmai, lake Anakim pu kethe-keding aro asu-aso atum kedo adimlo. (Hebron ke Ijip along Zoan aphan ningkan throksi aphrang si kimlo.)

²³Latum Eskol pu arlok anat vang-lo, lapen hadak latum drakharikang ethik chorpet-lo, la lapu-an kardik banghini amonit atum phangki pen charchongsi van-nang-lo. Lapen latum ajehak dalim athe lapen thebo atheta vanlo.

²⁴(Laso adim amen ke Eskol Arlok pusi amen irlo pima Israel atum hadak drakharikang athik chorlo.)

²⁵Ni phlikep longle langdet aphi, kelangjoi atum

²⁶Moses, Aaron lapen Israel arat kedo-an ha Kadesh, la Paran akejejangtang ajo along chevoilo. Latum kopisi kethek-long-loma thanlo lapen latum kevan athesere rat aphan paklang-lo.

²⁷Latum Moses aphan pulo, “Nelitum longle langdamlo, lapen la mepik lapen aho-orta do-o netum thek-long lo; ladak ajehak athesere do.

²⁸Bonta hadak kedo arat atum ingtangrak lapen latum arongsopi-heiheita thepikpak, lapen parpong-chenchan. La apar kehingnonei ke akrom kethepikpak akhei nelitum thek-long-lo.

²⁹Amalek atum ke det anitur anatsi kedo; Hitti atum, Jebusi atum, lapen Amor atum ke inglong ajo si kedo; lapen Kanaan aso atum ke Mediterran Atalo akung-kungsi kedo lapen Jordan Aroi sodingsi kedo.”

³⁰Moses aphan kethak arat atum aphan Kaleb padojoilo, lapen pulo, “Eli non tengkhengdam nangpo lapen longle cherainangpo; la aputhak kehaidetji aphan eli dorphlup ajakong do.”

³¹Bonta Kaleb along kedun amonit atum pulo, “Kali, latum aphan etum ketengkhengji ajakong ave; hadak kedo amonit atum etum apar ajakong themu.”

³²Lasonsi latum kelangtang alongle alam aputhak kalile alamsi Israel angbong pachethang-lo. Latum pulo, “Halaso alongle ke hadak kedo arat aphanta kechoji asok pador un-e. Hadak kedo abangphutin amonit ta ajon ding-o-a,

³³lapen netum akrom kethepikpak amonit aphan thek long-lo, latum Anak aso atumlo. Netum ke phelong asonsi chemathalo latum angno, lapen lapusonsi latum aphan eli lang nangji.”