Read Karbi KELAKHA 14 Bible Online

KELAKHA 14 - Karbi bible

KELAKHA 14

¹Jopangthang rat atum aning runsi hangjolo.

²Latum Moses lapen Aaron aphan pasimulo, lapen pulo, “La Ijip along kethilotsi akemeji mate ladak kejejangtang ajole thiseta chok!

³Kopisi HEMPHU halaso alongle along ekepon nangjilangma? Ron along netum thinang-etpo, netum apiso-aso aphan nep-etpo. La Ijip adet chedamthujuisi akemelo kalima?”

⁴Lasi latum lahin lahin chepuseroilo, “Etum aphan keja abang ingvaira Ijip chedamthujui lonang!”

⁵Anke Moses lapen Aaron aphu longle patongbak-lo rat atum angno.

⁶Lapen Joshua, la Nun asopo lapen Kaleb, la Jephunneh asopo, kelangjoi atum banghini aning oisi ape chingsek-lo,

⁷lapen rat atum aphan pulo, “Netum kelang alongle ke mepik.

⁸HEMPHU jongsi elitum aphan aningdok pulote, Alangli elitum aphan hadak eponpo lapen elitum aphan longle keme lapen ho-or kedo alongle epipo.

⁹HEMPHU abe thur-rinon lapen hadak kedo arat atum aphan phereri. Elitum joike pen latum aphan hai-unji. HEMPHU-ke elitum alongsi dolo lapen latum aphan kerai a-arnam-heihei atum aphan paremtang-lo; la apotsi phereri.”

¹⁰Rat atum kedo-an latum aphan arlong pen kevarbopji pusi paphere lo, bonta pehem athak HEMPHU kedo keturbong kethe-ang kecheklang rat atum thek-long-lo.

¹¹Moses aphan HEMPHU pulo, “Ni ko-ansi laso arat atum Nephan Nedengmobomji langma? Ni ko-ansi latum nephan chikike bomjilangma, ne latum angbong ongdung manghumeme akam-heihei klemkle-langma?

¹²Isi avur Ne toipo, lapen latum aphan pavirdetpo, bonta latum apar ke-ongmuchot lapen kangtangmuchot akhei apo nangphan nangpaplangpo!”

¹³Bonta HEMPHU aphan Moses pulo, “Nangjakong pensi lahei arat aphan Ijip adet Nang vanlo. Nang kopima Nang rat atum aphuthak keklemtang alam Ijip aso atum arjulong-lote,

¹⁴latum ladak kedo arat atum aphan pupo. Latum ke nang, HEMPHU netum along do, lapen netum aphuthak inghun sa-lo pu kethek-long alam arjulong-lo, lapen netum aphrang Nang anerlo inghun archok ason lapen ajo ke me archok pen damlo pu alam arlong-lo.

¹⁵Non Nang jongsi nangrat aso an aphan pathilote, nangnong karjulong akhei atum

¹⁶puhurpo, la arat aphan kejejangtang ajo pathi-et-lo, pima latum aphan kepiji pu kechak alongle along latum aphan van un-edet-lo.

¹⁷Lasi, HEMPHU, non nangphan ne ardomlo, nangjakong netum aphan paklangnon, lapen nang kechechak ason klemnon, nang pulo,

¹⁸‘Ne HEMPHU, neke ningthidapde lapen ne ke thedung akanghon lapen kekroithirklong lapen pap kediya, lapen kethurkrap aputhak paklang. Seta ne asomar atum aphan lapen asumar atum aphan ove kethom ovephli anta latum apo atum apap apot aduk pipedetji lapu kali.’

¹⁹Lapen non, HEMPHU, nang chelarlepin akanghon kethe ateng pen, diyatha, pusi lahei arat apap apot ne choningrilo, nangle latum aphan Ijip adet odet ta kediyabom ason.”

²⁰HEMPHU thak-lo, “Latum aphan Ne diyapo, nang kehang ateng.

²¹Bonta Ne chechak-lo Ne kerenglang ason lapen Ne kedo pirthe keplengset ason,

²²badutame laso arat atum halaso adet lut long-le-detji. Latum Ne kedo aketurbong akethe-ang lapen Ijip along lapen kejejangtang ajo ne keklem manghumeme akam latum thek-long-lo, bonta latum nening ko-an dingma abatai abatai asat Nelang-lo lapen Nephan kroimolo.

²³Latum aphusar atum aphan Ne kepiji pu kechak alongle latum kai seta lutdam longlelo. Badutame Nephan kedengmo atum an la lutdam longlelo.

²⁴Bonta Neban Kaleb ke kematha prekjek lapen Nephan kroithipver apot alangli kelang alonglelo. Badutame nephan kedengmo atum an la lutdamlonglelo.

²⁵lapen non Amalek lapen Kanaan aso atum kedo arlok-heihei alangliso-asu atum chepahemphu longji. Penap chiruira longle komchen Akaba atalo anat kedo akejejangtang ajo anat lut damnon.”

²⁶Moses lapen Aaron aphan HEMPHU pulo,

²⁷“Nephuthak ko-ansi lahei kehingno arat atum pasimubom poma? Lahei kepasimu alam Ne arjudak-lo!

²⁸Non latum aphan laso alam thaknon: ‘Ne semetang-lo, Ne rengtik an, nangtum kehangtang asonthotsi Ne klempo. Ne, HEMPHU-si kepulo.

²⁹Nangtum thiji, lapen nangtum abang arpum laso kejejangtang ajosi hijikchoji. Pima nangtum nephuthak pasimulo, nangtum angbong badu seta arta ningkan ingkoi apar kelit atum an ke lutdun longle detji.

³⁰Ne nangtum aphan hadak kepado longji aphan chechak-lo, bonta Kaleb lapen Joshua pen apar inutbakta dunde detpo.

³¹Nangtum pulo, nangsomar atum aphan nepchekpo, bonta nangtum kedomo alongle along Ne latum aphan vanji, lapen hala ke latum ahem plangpo.

³²Laso akejejangtang ajosi nangtum ke thi-etpo.

³³Nangsomar atum kejejangtang ajo ningkan phlikep damtappo, nangtum angbong kethi padu abang thithetik an, nangtum kekroithekthe apot kesung chechaknangpo.

³⁴Nangtum apap athe apot nangtum ningkan phlikep chechak nangji, nangtum longle kelang ni phlikep, arnisi apharman ningkan isi chechak nangpo. Nebe thur lote kosonma la nangtum chinipo!

³⁵Nebe kethurjisi kechingrum kehingno arat aphan Ne la klemvekji pu ne semetang-lo. Laso akejejangtang ajo, abangphutin ta thiji. Ne HEMPHU-si ningjelo.’”

³⁶Lapen Moses longle kepalangjoitoi amonit atum, kechevoitang atum, longle kehingno alam than si rat atum alangliphan pasimu apot,

³⁷longle hingno pu alam kethan atum an, HEMPHU angno avur pen ajok thi-et-lo.

³⁸Bonta Joshua, la Nun asopo lapen Kaleb, la Jephunneh asopo atum ke renglang, latum longle kelangjoi atumlo.

³⁹HEMPHU keputang alam Israel aso aphan Moses thandet aphi, latum chirupik-lo.

⁴⁰Puthot adap latum inglong ajo ketengkhengjisi barlo, lapen pulo, “Nonke netum aphan HEMPHU damnon pu kepu alongle along kedamji aphan chesik-lo. Netum pap klemtang-lo pu netum chechini lo.”

⁴¹Bonta Moses pulo, “Tangte kopisi nangtum HEMPHU aphan non kekroikrebomlang? Nangtum pachun-un-e!

⁴²Nangtum dam nangne. HEMPHU nangtum along ave, lapen nang hotur atum nangtum aphan parempo.

⁴³Amalek lapen Kanaan atum aphan nangtum kechetong ahut, nangtum ron along thipo; HEMPHU nangtum along dodundelo, pima nangtum alangli phi phi kedunjimolo.”

⁴⁴Tebonseta latum inglong ajo karlu damji aphan angthin chepathe lo, HEMPHU Kechejok Asinduk lapen Moses atum mukam o-edet seta latum damlo.

⁴⁵Anke hadak kedo Amalek lapen Kanaan aso atum aphuthak tengkheng-lo lapen latum remdet-lo, lapen Hormah an latum aphan phlungdunlo.