Read Karbi KELAKHA 15 Bible Online

KELAKHA 15 - Karbi bible

KELAKHA 15

¹Moses aphan HEMPHU

²lahei aron Israel arat atum aphan Alangli kepiji pu alongle along kepatalonji aphan pilo.

³Chainong alo ejon, biresak alo ejon, biresak mate bi ejon, HEMPHU aphan kephrin athok mate kechechak chepachok akarkli mate ningkehang athok mate dhorom arong-aje along kaike kepibom athok pi tame; lahei ahim athok angnim HEMPHU aphan aningpadok-lo.

⁴HEMPHU aphan kephrin athok biresak ejon mate bi ejon kepi ajontin api along elin ahim jit ajangthu pen kepangvuitang sok-sang adan

⁵elin adrakha ahorlang pen pen van nangji.

⁶Biresak alo kepi ahut, linni ahim aduk along elin-ra powahini ajit ajangthu kepangvuidun isi asok asang adan ason van nangji.

⁷Laso along elin-ra powa hini adrakha ahorlangta vanrap-pet nangji. Lahei akarkli athok angnim HEMPHU aphan aningpadok-lo.

⁸Chainong alo ejon HEMPHU aphan kephrin athok kepajir ahut, mate kechechak kechepachok athok kepi ahut, mate kejelang athok kepi ahut,

⁹isi linni ajit ajangthu pen kepangvui linthom ahim aduk asok-sang athok,

¹⁰linni adrakha ahorlang penpen pinangji. Laso athok angnim HEMPHU aphan aningpangsamlo.

¹¹La helo ajontin achainong alo, abiresak alo, abiresak mate abi along kepinangji lo.

¹²Ejon pen apar api kepi ahut, laso along kepidun nangji amar pachelonchit pensi pidun nangji.

¹³Abangphutin arong aso a-Israel atum him athok kepi ahut keklem nangji akamlo, laso angnim HEMPHU aphan aningpadok-lo.

¹⁴Nangtum angbong kedo bang aso amonit atum aling ahut aphanle do seta, malomso aphan tame kedoverji aphan tame, him adan pilote, HEMPHU aphan aningkepadok angnim aphan Alangli aron-heihei ateng pen klemnangpo.

¹⁵Kevangji arni an setame, nangtum aphuthak lapen nangtum along kedo bang adet aso atum aphuthak seta lahei aron pensi nangrak-het-tang-lo. Nangtum lapen halatumta HEMPHU angno ke isinat-lo.

¹⁶Nangtum aphuthak lapen halatum aphuthak ta isinat aron lapen atang pensi klemnangpo.

¹⁷Moses aphan HEMPHU lahei aron,

¹⁸Alangli latum aphan kepiji alongle along Israel arat atum kepatalonji aphan aron pilo.

¹⁹Hadak kelong thesere kecho ahut, halaso angbong ajehak ke HEMPHU aphan panong si dan bi pivet nangji.

²⁰Nangtum him kepaplang ahut sangkemi pen kepaplangcheng ahim aplang ke HEMPHU aphan panong si pinangpo. Lasonsi nangtum kesi asok pen kepiji pu kepanong adanta pinangpo.

²¹Kevangji arni anta, nangtum kepaplang ahim pen panongsi HEMPHU aphan dan pinangji.

²²Bonta Moses aphan HEMPHU kepi aron-heihei angbong mane abang jongsi aningkehanghe binong kali pen talon thekthe det-lote,

²³lapen mo aphi, Moses aphan HEMPHU kepi aron-heihei an asontinta rat atum talon thekthe det pulote,

²⁴rat atum kechinine pen lapen kechokche klemlote, latum chainong alo ejon kephrin athok pinangji, laso angnim HEMPHU aphan aning padok-lo, lahei sok-sang adan lapen drakha ahorlang adan pen pen pinangji. La abat, latum bi alo pap athok pinangji.

²⁵Rat aphan kurusar si aron atengpen kepangthir akam klempo, lapen latum aphan diyadetpo, pima kechokche ke aningkehanghe pen kali lapen latum halatum apap athok isi kecho athok HEMPHU along vantang-lo.

²⁶Israel arat kedo-an lapen bang adet aso nangtum angbong kedo an atum aphanta diya-etpo, pima abangphutinta kechokche along cheto dunlo.

²⁷Mane abangphu apap jongsi mathakrang pen klemlote, alangli ningkan isi arta abi api pap athok pinangji.

²⁸Dovan along kurusar halabangso amonit apap kepangthirji aphan aron ateng pen kepangthir akam klempo, lapen alangliphan diya detpo.

²⁹Lasonthotsi mathakrang pen pap keklem atum aphan lason aron dolo, Israel amethang amonit tame mate bang adet aso tame.

³⁰Bonta badutame, det arlo abangphu mate bang adet aso tame pap chinilor pen klembom pulote, HEMPHU aphan kelangplot apot adai dolo, lapen alangliphan pathilot nangji,

³¹pima HEMPHU kopisi kepuloma alangli dengmolo, lapen alangli hukum angbong isi chinilor pen ingditang-lo. alangli methang kethi apot alangli si adai dolo.

³²Ehut isi, Israel atum kejejangtang ajo kedo ahut inut amonit aphan Kesang-arni theng-kere thek-long-lok-lo.

³³Alangliphan Moses, Aaron lapen rat kedo-an along pondet-lo,

³⁴lapen la aphan pahonding lo, pima alangliphan kopisi inghoi nangjima la chinidakde.

³⁵Anke Moses aphan HEMPHU pulo, “Bangso amonit aphan pathilot nangji; mukam angtan bangso amonit aphan rat atum arlong pen varbop nangji.”

³⁶La apotsi rat atum do-an la aphan mukam angtan ponsi HEMPHU hukum kepi ateng arlong pen varbop-lo.

³⁷Moses aphan HEMPHU hukum pilo,

³⁸lapen Israel aphan laso alam paputoilo: “Nangtum ape ano abu bu nangji lapen abutin along akelu ahon ari kokdun nangji. Laso akam ke nangtum mo kevangji arni anta klem nangji.

³⁹Pe-abu ke isi kechemathaji aphanlo, aphongtin nangtum la kechelang ahut nangtum ne hukum-heihei chematha dampo, lapen lahei kroinon; anke nangtum Ne pen suiselo, lapen nangtum aningkehang lapen kar-i aling klemklelo.

⁴⁰Pe abu ke Ne hukum an kebiji aphan si pachematha po, lapen nangtum Ne mar binong plangpo.

⁴¹Ne ke nangtum Arnam HEMPHU lo; Ne nangtum aphan nangtum a-Arnam keplangjisi Ijip adet pen nangvanlo. Ne HEMPHU-lo.”