Read Karbi KELAKHA 17 Bible Online

KELAKHA 17 - Karbi bible

KELAKHA 17

¹Moses aphan HEMPHU pulo,

²“Nangliphan krehini achin nangkepijile Israel arat aphan thannon, akheitin ajalin pen isi si. Achintin alongta amen pachetok-repnon,

³lapen Levi ahin pen kechetoi aphan Aaron amen toknon. Abangphutin akhei ajalin atum arideng chin isi donangji.

⁴Lahei Ne kedo A-pehem along ponnon, lapen lahei Kechejok Asinduk, Ne nangliphan kechetong adimle binon.

⁵Lapen Ne kangvai amonit achin la ke chingjokpo. Lasonsi nangtum aphan Israel arat atum kaike kepasimu akam pangtonkokpo.”

⁶Lasi Israel atum aphan Moses pulo, lapen abangphutin ajalin atum alangliphan ehonghong achin pirep-lo, isi pen ehong, kadokave hong krehini, lapen lahei along Aaron achinta bi dunlo.

⁷HEMPHU Kechejok Asinduk athengno Moses lahei achin do-an Pehem arlo pilo.

⁸Puthot arni, Moses Pehem arlo kelutdam ahut, Levi akhei pen ketoi Aaron achin ke chingjoktang-lo la alangli thek-long-lo. La chingjok-lo, lapen pangpharlo lapen badam athe mentang-lo!

⁹Moses kadokave achin an ponsi Israel atum aphan lahei paklangdamlo. Kopi plang-loma latum thek-long-lo, lapen abangphutin ajalin atum amethang achin che-enthulo.

¹⁰Moses aphan HEMPHU pulo, “Aaron achin puthot Kechejok Asinduk athengno bi damthunon. La ke Israel arat aphan isi kepacheretoilo, latum kepasimu ingtonte tangte latum thikoiji.”

¹¹HEMPHU hukum kepi atengsi Moses klemlo.

¹²Israel arat atum Moses aphan pulo, “Langtha la ke netum aphan kevirlo!

¹³Badutame Pehem adung kevang aling thiveknangji, pu netum kadokaveta thi-et nangjima?”