Read Karbi KELAKHA 18 Bible Online

KELAKHA 18 - Karbi bible

KELAKHA 18

¹Aaron aphan HEMPHU pulo, “Nang, nangsomar lapen Levi atum. Ne kedo A-pehem along kam keklem kechokche an adai ale phonangji, bonta kurusar kangduk akam adai ke nang lapen nangsomar atumsi phochotji.

²Nangtum adon arap, Levi akhei an nang lapen nangsomar atum Pehem along kangduk ahut nangparapdunjile hang petnon.

³Latum nangphan adeng an lapen Pehem along kam arpu an papleng nangji, bonta latum Kangthir Adim amar mate dovan along kangthir-et amar ot-edet nangji. Latum ot-lote, latum lapen nangtumta thirappet nangji.

⁴Latum nangtum pen kam klempo, lapen Pehem along akam an arpu latum papleng nangji, bonta a-ot kave abangphu atum ke nangtum pen kam klemkledetpo.

⁵Nang lapen nangsomar atumsi Kangthir Adim akam arpu papleng unchotji, anke Ne ning kethi Israel arat aphuthak puthot kloklelo.

⁶Ne si nang chephochero Levi atum aphan Israel atum angbong pen kangvai abang-lo, la nangtum aphan isi kepanong adan asonlo. Latum Nephan nehodaitang-lo, anke latum Pehem along akam latum adeng cheklem unpo.

⁷Bonta dovan along kecherap lapen Kangthir Adim along kurusar akam an arpu ke nang lapen nangsomar atumsi klemnangji. Lahei ke nangtum arpulo pima Ne nangtum aphan kurusar adan nangpilo. Badutame kangthir-et amar adung kevang abang aling aphan pathilotpo.”

⁸Aaron aphan HEMPHU pulo, “Chema-thanon, kadokave Nephan kechirung prekjek athok kephrinphre ason an Ne nangtum aphan nangkepilo. Lahei Ne nang, lapen nangso-nangsu aphan isi kethaktang amar asonsi kaike aphan nangpilo.

⁹Dovan along kephrinphre kangthirnei athok, lahei ke nangpharmanlo: sok-sang adan-heihei, pap athok-heihei, lapen preng kechetu athok-heihei Nephan kepajir kangthir-et athok anke nang lapen nangsomar atum apharmanlo.

¹⁰Lahei nangtum kangthir adimsi chonangji, lapen pinsomar atumsi la cholongchotji; lahei ingthir-et pura mathanon.”

¹¹La apar, Israel atum kevan kepa-nong adan an ke nangtum apharmanlo. Ne lahei nang, nangsomar lapen nangsopimar atum aphan kaike mo kevangji arni an aphan nangpitang-lo. Nanghemtun angbong badutame aron ateng pen kangthir-et aling abang lahei pachotame.

¹²Aningkanvang Israel atum kepathecheng adan kevan akeme an ke nangtum aphansi Ne nangkepilo: Jit ajangthu, drakha ahorlang, lapen sok.

¹³La kadokaveta nangtum apharmanlo. Nanghemtun angbong badutame aron ateng pen kangthir-et abang aling la pachonang.

¹⁴Israel atum ke-en kertang amar Nephan kehodai an ke nangtum amarlo.

¹⁵Anut-tin asokleng, mate pi keching-thokcheng aso Nephan Israel atum nekepi anke nangtum amarlo. Bonta sokleng kechenamji anam ke nangtum dengvek nangji, lapen aron ateng pen kangthirthe kechingthokcheng pi aso kechenamthuji anam nangtum dengvek nangji.

¹⁶Kejor-kelang anam ateng sokleng chiklo ejon arta ahut rup dumpho kepathik anam ateng pen chenamdunthu un.

¹⁷Bonta Kechingthokcheng achainong aso, abiresak aso, lapen abi aso ke chenamthu nangnelo; lahei ke Nemarlo lapen arkli vek nangji. Lahei avi dovan anat dungnon, lapen athu ke kecho athok aphan phrinnon, laso angnim Nephan ningpangsamlo.

¹⁸Lahei along a-ok-ke nangtum apharmanlo, la ke aningthang lapen aphi akeng kepanong athok asonlo.

¹⁹Nephan Israel atum kepanong pen kevan athok an ke Ne nang, nangsopomar, lapen nangsopimar atum aphan kaike aphansi nangkepilo. La ke nang lapen nangso-nangsu atum pen Ne kephri un-epin akechejok-lo.

²⁰Aaron aphan HEMPHU pulo, “Kedoji aphan nangtum thangnat alongle ta chepahemphuphe-detpo, lapen Israel along alongle nangphlaksi nangpipe detpo. Ne helo HEMPHU nangtum kenangji anlo.”

²¹HEMPHU pulo, “Nephan Israel atum nekepi aphan kep pen ephan an Levi atum aphansi Ne pilo. La ke Ne kedo A-pehem along latum keklem akam anamlo.

²²Kaprek a-Israel atum ke Pehem along vang-ra latum aphuthak kethi chohang nangnelo.

²³Non penke Levi atumsi Pehem aputhak lanapo lapen la arpu an klempo. La ke nangso-nangsu atum aphan seta kevangji arni anta kepathik aronlo. Israel along Levi atumta kedover amar chepahemphu longlelo,

²⁴pima Israel atum kepanong pen Nelong kevan kechirung ason adan aphan kep pen ephan latum kechepahemphu-jisi Ne pitang-lo. La apotsi Ne latum aphan pulo, latum Israel along kedover amar longlelo.”

²⁵Moses aphan HEMPHU hukumpilo,

²⁶lapen Levi atum aphan papulo: “Nangtum kechepahemphuji aphan Israel atum HEMPHU along kevan phankep pen ephan kedeng ahut, HEMPHU aphan kepanong adan la angbong pen phankep pen ephan pinangji.

²⁷Laso kepanong adan ke saiketiki atum sok-kemi lapen drakha ahorlang kemi kepi athok pen chingbarchit pusi lakhalo.

²⁸Lasonsi nangtumta Israel atum pen kedeng aphan kep pen ephan an pen HEMPHU amar pen kepanong adan pinangji. Lason kepanong adan nangtum Aaron kurusar alongsi HEMPHU aphan pipo.

²⁹Nangtum kelong pen akemeneile pinon.

³⁰Kemesen apharman nangtum pilote, ahin ke nangtum chebitamelo, la ke sai ketiki abang dan pi-et aphi amethang ahin an kechebi ason lo.

³¹Nangtum lapen nanghemtun abang-phu atum nahoktame chodamtame, pima la ke nangtum Pehem along kam keklemdun anamlo.

³²La kecho ahut nangdai avelo, nang akemenei angkleng HEMPHU aphan pibomtik ke. Bonta chinipamenon, akemenei angkleng Israel atum kepi adan kecho pen ajok kangthir adan pasa-urri; nangtum jongsi la klemlote nangpa thilotpo.”