Read Karbi KELAKHA 19 Bible Online

KELAKHA 19 - Karbi bible

KELAKHA 19

¹Moses lapen Aaron aphan HEMPHU hukum pilo,

²lapen Israel atum aphan lahei aron pathantoilo: Moses lapen Aaron along ake-ang achainong api la kam paklemklepinlang lapen thangnat akehingno ta ave achainong vannon,

³lapen latum Eleazar kurusar aphan pinon. La mukam ingtan pondet si alangli ingno pathi nangji.

⁴Anke Eleazar abang la ajehak avi ensi Pehem anat batai throksi arichimun pen arsipo.

⁵Pi abang arpum kangthim, areng, a-ok, avi lapen aphek-angthin penpen kurusar angno phrinpo.

⁶Anke alangli ajehak kedar athengpi, thengprang abap epeng, arri ke-er, ejeng ensi halahei me arlo varchui nangpo.

⁷Laso aphi alangli pe-ri chechok nangji lapen abang lang chedung masi, ansi alangli mukam lutdam longji; bonta arnikangsam an alangli aron ateng pen ingthirthelang.

⁸Chainong kephrin abangta ape-ri chechok nangji lapen abang lang chedung masi, bonta alangli jokta arnikangsam an aron ateng pen ingthirthelang.

⁹Anke aron ateng kangthir abangphu si chainong amepun pangrumpo, lapen mukam angtang, aron ateng pen kangthir adim, aron ateng pen kangthirthe ason kepakakji le Israel arat ke-enjile kopipi kesik alang kedo adimsi lahei bi po. Laso aron ke pap kepakakji aphanlo.

¹⁰Thek-lo kepangrum abang ape-ri chechok nangji, bonta la ha arnikangsam anta ingthirthelo. Laso aron ke mo kevangji arni an aphantalo, Israel lapen latum along kedo bang adet amonit atum aphan ta lo.

¹¹Komatma kethi arpum ke-ot abang aling la aron ateng pen ni throksi an ingthirthelo.

¹²Alangli kethom arni lapen throksi arni kechepangthir alang pen amethang aphan chepangthir nangji, la ansi alangli ingthirpo. Bonta jongsi kethom lapen throksi arnita alangli chepangthrithelang pulote, la ingthirthelo.

¹³Badutame kethi arpum ot-lo, lapen amethang chepangthirthe pulote la ingthirthe si dolang, pima kepangthir alang la aphuthak dungdelang. Alangli HEMPHU A-pehem pasa-urlo, lapen alangliphan Arnam arat angbong pen inut-lo pu lakhakhelo.

¹⁴Mane jongsi pehem arlo thilot-lo, lapen kethi ahut pehem along kedo abang mate hadak kelut abang aling ni throksi an aron ateng pen ingthirthelo.

¹⁵Pehem arlo kedo Adip alangbong lapen aphule tin ingthirthetang-lo.

¹⁶Mane jongsi kepathitang amonit aphan ot-lote, mate kethi nangji aron pen ingtan thilot mate monit arrepi thiri along ot-lote, alangli ni throksi an ingthirthelo.

¹⁷Kangthirthe kepavedetji aphan, pap kepakak aphan kephrin ake-ang achainong amepun ajehak ponsi phule arlo thap nangji lapen la along aroi alang kemi dung nangji.

¹⁸Aphrangsi ke, mane aron ateng pen kangthir-et abang thengphrang abap abu ensi lang along la nim nangpo, lapen pehem, la arlo kedo amar an lapen hadak kedo amonit an aputhak arsi nangji. Adunthu ke, mane aron ateng pen kangthir-et abang si monit arrepi mate kethi arpum mate thiri ke-ot amonit abangphan laso alang arsi nangji.

¹⁹Kethom lapen throksi arni kangthirthe abangphu aphuthak aron ateng pen kangthir abangsi lang arsi po. Throksi arni kepho abang ape-ari chechok-et lapen lang abang chedung et aphi alangli la aphan pangthirpo, arnikangsam apor alangli aron ateng pen ingthirpo.

²⁰Badutame aron ateng pen ingthirthelang pulote, lapen amethang chepangthirthe-lang pulote, ingthir-et-elang, pima kepangthir-i alang alangli phuthak dungdelang. Alangli HEMPHU A-pehem pasa-urlo, lapen alangliphan Arnam arat angbong inut-lo pu lakha ponpelo.

²¹Nangtum lahei aron mo kevangji arni anta talonbom nangji. Kepangthirji alang karsi abang amatta alangli pe-ri chechok nangji; badutame lang ke-ot aling abangta arnikangsam an ingthirthelo.

²²Kangthirthe amonit ke-ot amar aling ingthirthelo, lapen lahei ke-ot abang aling arnikangsam an ingthirthe lo.