Read Karbi KELAKHA 20 Bible Online

KELAKHA 20 - Karbi bible

KELAKHA 20

¹Kecheng achiklo Israel arat kedo-an Zin akejejangtang ajo nang lelo, lapen Kadesh along mukam chekimlo. Hadaksi Miriam thi-lo lapen pip-lo.

²Latum mukam kekim adim lang ave, la apotsi rat atum Moses lapen Aaron aphan kompetsi chingrumlo,

³lapen pasimulo: “Netum akorte do-an pen HEMPHU A-pehem athengno along kethi-etsi akemelo.

⁴Kopisi nangtum netum aphan laso akejejangtang ajo nekevanloma? Netum kepangreng api penpen ladak kepathi-etji aphanma?

⁵Kopisi nangtum netum aphan Ijip adet pen ladak thangnatta kereng-re adim nangkevanlo? Sok ta ave, thebota ave, drakha atheta ave, dalim atheta ave. Ladak kejunji aphanta lang ave!”

⁶Moses lapen Aaron rat atum pen cheterek-lo, lapen Pehem ajakan along arjap-lo. Longle athak latum amahang patongbak-lo, lapen HEMPHU kedo aketurbong akethe-ang latum aphan nangklang-lo.

⁷Moses aphan HEMPHU pulo,

⁸“Kechejok Asinduk athengno kedo achin pon-ra, nang lapen Aaron, do-an arat aphan pangrumnon. Hadak latum angno le hadak kedo arlong aphan ningje non, lapen hadak pen lang ingbopsi nangchonpo. Lasonsi nangtum rat aphan arlong pen lang van pipo, latum aphan lapen latum api kejunji aphanlo.”

⁹Moses damlo lapen HEMPHU ahukum ateng chin endamlo.

¹⁰Arlong athengno Moses lapen Aaron atum rat aphan pangrumlo, lapen Moses pulo, “Arjutha, nang kethurkrap atum! Netum laso arlong pen lang nangpalongpi nangjima?”

¹¹Anke Moses achin chirung-lo, lapen alangli arlong aputhak batai hini theng-lo, lapen thedung alangjeng alang nangbarlo, lapen kedo-an amonit atum lapen pi atum junlo.

¹²Bonta Moses lapen Aaron aphan HEMPHU ingchek-lo. Alangli pulo, “Pima nangtum Israel arat angno Ne kangthir ajakong aputhak kechiki dorde, akekroi kave apot, Ne latum aphan kepiji pu kechak adet along nangtum japon longlelo.”

¹³La Meribah alongplang-lo, hadak Israel arat atum HEMPHU aphan pasimulo lapen latum aphan Alangli ingthir-et pu chepaklang-lo.

¹⁴Edom arecho aphan Moses Kadesh pen pherangke atum toilo. Latum pulo, “Laso abirta ke nangli don pen, Israel akhei pen. Nelitum kesung kephonang alam nangli chini,

¹⁵kopusonsi neliphusar atum Ijip adet kedamloma, hadak nelitum ongdung aningkan dolo. Nelitum aphusar lapen nelitum aphan Ijip aso atum nechenek-lo,

¹⁶lapen nelitum kerap kelongjisi HEMPHU aphan hang-lo. Alangli nelitum kehang ase arjusi sining apherangke inut nangtoilo, alanglisi nelitum aphan Ijip adet pen nangjalo. Non nelitum Kadesh alongsi dolo, la nangli longri ahoi arong solo.

¹⁷Kanghon pen nangli longri kedongputji ahukum nelipitha. Nelitum lapen nelitum api an tovar pen suiselo, mate hidi ajo mate drakha aberi ajo damdelo, lapen nanglitum alangtuk pen lang junjelo. Nangli longri parpetik-ke nelitum tovarpisame alongsi dopo.”

¹⁸Bonta Edom aso atum thak-lo, “Netum adet angbong kedongputji aphan netum bida thothe! Nanglitum jongsi bor-ilote, nelitum vangpaksi nanglitum aphan tengkhengpo.”

¹⁹Israel arat atum pulo, “Nelitum tovarpi alongsi dopo, lapen jongsi nelitum mate pi atum jongsi nanglitum alangtuk pen lang junlote, laso anam nelitum pipo, nelitum ke damlongput antame.”

²⁰Edom aso atum puthulo, “Netum pipe!” Lapen Israel arat aphan ketengkhengjisi jakong thedung aron-armu pen barlo,

²¹pima Edom aso atum latum alongri angbong Israel atum aphan padongput longle, Israel atum chiruisi akaprek atovar anat chedamlo.

²²Israel arat atum Kadesh olo, lapen Hor Anglong along nanglelo,

²³la Edom ahoi akung. Hadaksi Moses lapen Aaron aphan HEMPHU pulo,

²⁴“Ne Israel aphan kepiji pu kechak alongle along Aaron lutdun longle lo; alangli thipo, pima nangtum banghini Meribah along Ne hukum kroikre lo.

²⁵Aaron lapen asopo Eleazar aphan Hor Anglong anat ponnon,

²⁶lapen hadak Aaron aphan kurusar achoi phlok si Eleazar aphuthak pangchoi non. Hadaksi Aaron thipo.”

²⁷HEMPHU hukum kepi atengsi Moses klemlo. Latum Hor Anglong kadokave arat angno damlo,

²⁸lapen Aaron aphan kurusar achoi Moses phlok-lo, lapen la Eleazar aphan pangchoilo. Hadak inglong athak-si Aaron thilo, lapen Moses lapen Eleazar nangchevoilo.

²⁹Aaron thitang-lo pu rat atum chinilo, lapen latum kadokave alangliphan ni thomkep chirulo.