Read Karbi KELAKHA 21 Bible Online

KELAKHA 21 - Karbi bible

KELAKHA 21

¹Atharim atovar pen Israel atum nitur a-Kanaan ahin anat vangtang-lo pu Kanaan arecho Arad arjulongsi, latum aphan alangli tengkheng-lo, lapen latum ajehak aphan nep-lo.

²Anke Israel atum HEMPHU along isi chechak-lo: “Nang jongsi laso arat aphuthak netum aphan pahailong-lote, latum aphan thangthe pen netum nanghodaipo, lapen latum arongsopi-heiheita nanghodaipo lapen latum aphan pavirdetpo.”

³Latum aphan HEMPHU arjulo, lapen latum aphan pahaipamelo, lapen latum arongsopi-heiheita pavirlo, lapen Hormah pusi adim amen irlo.

⁴Israel atum Hor Anglong olo, lapen Akaba atalo chetok anat kedam atovar pen ajok damsi Edom ahoi akung-kung damlo. Bonta tovar angbong rat atum chepaningding un-edet-lo,

⁵lapen Arnam aphan lapen Moses pasimulo. Latum pasimusi, pulo, “Nangtum netum aphan kopi apotsi Ijip adet pen vansi laso asangtimili ajo nepathijile nekevanlo, ladak an ta ave mate lang ta kave adim nekevanma? Lason keningjoino a-an pen netum arjap pathir un-elo!”

⁶Anke rat atum angbong HEMPHU abi ketan apherui toi lo, lapen ongdung a-Israel atum aphan archulo lapen pathilo.

⁷Rat atum Moses along vang-lo lapen pulo, “Netum HEMPHU lapen nangliphan kepu ahut pap klemlo. Non HEMPHU aphan laso apherui kepondetji aphan si choningrilo.” Lasi rat aphan Moses ardom pilo.

⁸Anke tasam pen bitoi apherui paselam pen archok athak kepavek-lokjisi Moses aphan HEMPHU pulo, anke karchulong abangphutin la lang longpo lapen me detpo.

⁹Lasi Moses bitoi apherui selamlo lapen la archok athak vek-lok-lo. Karchu kepholongtang atum an bitoi apherui aphan langpo lapen medetpo.

¹⁰Israel atum dambomlo, lapen Oboth along mukam chekimlo.

¹¹Laso adim odet aphi, latum Abiram keru-heihei anat, la ke Moab alongri nihang akejejangtang ajo along mukam chekimlo.

¹²Anke latum Zered Arlok along mukam chekimlo.

¹³Hadak pen latum puthot cheterekthusi Arnon Aroi anirep anat mukam chekimlo, Amor alongri anat keledam akejejangtang ajo anat-lo. (Arnon lake Moab lapen Amor atum angbong ahoilo.)

¹⁴La apotsi HEMPHU Kechedan Aloh kepu do; “...Suphah alongri along Waheb arongso, lapen Arnon Arlok-heihei;

¹⁵lapen arlok-heihei ajeng kele ha Ar arongso lapen Moab ahoi anat an.”

¹⁶Hadak pen latum dambomsi Beer pu alanghe adim lelo, hadaksi Moses aphan HEMPHU pulo, “Rat atum an aphan vanpetnon, lapen latum aphan Ne lang pipo.”

¹⁷Halaso ahut Israel atum laso alun lunlo: “Chon-kang-kangnon! O langhe-heihei, La lunnon, Nangli lang palong-lo; Lapen nelitum Nangliphan lun pen ardomlo-

¹⁸Recho atum kehut alangtuk Lapen rat ajalin atum ketuk, Recho achin pen ketuk Lapen halatum chin-heihei pen tuk-lo.” Latum kejejangtang ajo pen cheterek si Mattanah along damlo,

¹⁹lapen hadak pen latum dambomsi Nahaliel an damlo, lapen Nahaliel pen Bamoth an,

²⁰lapen Bamoth pen Moab ahoi arlok an, Pisgah anglong aber, hadak pen sangtimili ajo checharlo.

²¹Anke Israel arat atum Amor arecho Sihon aphan kepathanjisi pherangke atum aphan toilo;

²²“Nelitum aphan nanglitum adet padam longput tha. Nelitum lapen nelitum achainong tovar pen suiselo, lapen nanglitum ahidi mate drakha aberi bithe damdelo, lapen nanglitum alangtuk-heihei pen lang junjelo; nanglitum adet parpetik ke nelitum tovarpi pen suiselo.”

²³Bonta Sihon ke Israel arat aphan alangli det angbong padamput longledet-lo. Alangli methang aron-armu pangrum lo lapen ha kejejangtang ajo Jahaz anat damlo, lapen Israel atum aphan tengkheng-lo.

²⁴Bonta ron kechedan along Israel atum ongdung ahotur atum aphan pathilo lapen halatum alongle Arnon Aroi pen Jabbok anirep an cheraidet-lo, la Ammon atum ahoi an, pima Ammon atum kecherai pangtangthip-lo .

²⁵Lasi Israel atum Amor atum arongsopi an cherailo, Heshbon lapen la komchen arongso an lapen hadak kedo pathir lo.

²⁶Heshbon ke Amor atum arecho Sihon, det arongsopi akut-lo, la aphrang Moab arecho pen chedansi la adet Arnon Aroi an kecherai abang lo.

²⁷La apotsi lunse atum lunlo, “Heshbon along vangnon, Sihon Recho arongso along! Netum la kekimthu lapen kepamethu kelangji ninghang;

²⁸La Moab along Ar arongsopi pavirlo Lapen Arnon athak anglong-heihei cho-et-lo.

²⁹Nangphan ko-an kepherememe loma, Moab arat atum! Nang Kemosh aphan karcho atum an nang pavirtang-lo! Nang arnam ke monit atum along kapreksi pachepachong-toilo, Lapen so arlo atum ke Amor arecho arideng abanpi plang-lo.

³⁰Bonta non la aso-asu anta pavirtang-lo, Heshbon pen Dibon atovar-sodingta, Nashim pen Nophah, la Medeba adung an.”

³¹Lasonsi Israel atum Amor alongri ajo do pathirlo,

³²lapen Moses ke Jazer arongsopi ketengkhengji akemenei atovar keparijisi monit toilo. La Israel atum cheraidet-lo, lapen la kekomchen aron-aso kedo-anta, lapen hadak kedo Amor atum aphan phlung-et-lo.

³³Anke Israel atum nangchiruilo, lapen Bashan anat atovar enlo, lapen Bashan arecho Og, Edrei along latum aphan ketengkhengjisi alangli aron-aso atum penpen bar-lo.

³⁴Moses aphan HEMPHU pulo, “La aphan phereri, la aphuthak kehaidetji aphan Ne nangphan nangpidetpo, la arat kedo-an lapen alongle anta nangpidetpo. Laphan nang kosonsi Sihon aphuthak keklemloma lasonthot-le klemnon. Sihon ke Amor arecholo, la Heshbon along kepangri abang-lo.”

³⁵Lasonsi Israel atum Og aphan pathilot-lo, asopomar aphanta pathilo, lapen la arat atum hadak kereng lang atum avedet-lo, lapen latum la adet cheraipidet-lo.