Read Karbi KELAKHA 22 Bible Online

KELAKHA 22 - Karbi bible

KELAKHA 22

¹Israel atum dambomlo, lapen Jeriko angno, Jordan anihang Moab athoi along mukam chekimlo.

²Israel atum Amor aso aphan kopisi keklemloma lapen Israel atum ko-an ake-ong-loma laso alam Moab arecho, Balak, la Zippor asopo, lahei arjulongsi,

³alangli lapen alangli rat atum pherepik-lo.

⁴Midian ajalin atum aphan Moab atum pulo, “Laso ahur ke elitum adung arei kopi doma pavir-etpo, bap ajole chainong alo kechopan asonpo.”

⁵Lasi Balak recho, Beor asopo Balaam aphan kepahangjisi pherangke atum toilo, alangli ke Pethor, la Euphratis Aroi adung. Amaw adet si kedo. Alangliphan Balak pen lason abirta si vanlo: “Ijip adet pen isi akhei vang-lo laso alam nangli pachiniji neli ingtung, laso akhei atum bitheta chehijikthip, lapen nelitum adetta kecheraidetji aphan isi kephere dolo.

⁶Latum aphai netum aphan nelit-lo, lasi kanghon pen vang iktha, lapen neliphan ajok latum aphan ahirjuno pitha. Anke netum latum aphan parem unjimene lapen latum aphan det pen phlung unjimene. Neli chinilo, nangli jongsi ahirjume hang-lote rat atum ahirjume longpo, lapen nangli jongsi ahirjuno hang-lote, latum ahirjuno phopo.”

⁷Lasi Moab lapen Midian ajalin atum ahirjuno kepi anam che-ponsi Balaam along damlo, lapen alangliphan Balak abirta pilo.

⁸Latum aphan Balaam pulo, “Ningve dak-le dokoknon, lapen HEMPHU neliphan kopisi nethanjima penap nanglitum aphan neli nangthanpo.” Lasi Moab atum Balaam along dokok-lo.

⁹Balaam along Arnam vangsi arjulo, “Lahei nanglong kesakok amonit atum komat-lo?”

¹⁰Alangli thak-lo, “Neliphan kepathanjisi Moab arecho Balak, latum aphan nelilong nangtoilo.

¹¹Ijip adet pen isi akhei vang lo lapen det adang bithe dothip-lo si pu. Alangli phan ajok latum aphan neli ahirjuno hangpi nangji si pu, anke alangli latum pen chedan unpo, lapen latum aphan phlung unpo.”

¹²Balaam aphan Arnam pulo, “Lahei amonit atum along dun-ri, lapen Israel arat aphuthak ahirjuno hangpiri, pima latum Ne hirjume dotang-lo.”

¹³Puthot arni Balak apherangke atum along Balaam damlo, lapen pulo. “Hem chedamnon, Arnam nephan nanglitum along nepadun longle.”

¹⁴Lasi latum Balak along chevoilo, lapen latum along Balaam nangkedunji molo pu alam thanlo.

¹⁵Anke Balak ongdung ajalin atum aphan nangtoilo, latum ke aphrang apar arleng themuchot atumlo.

¹⁶Latum Balaam along damlo, lapen alangliphan Balak pen laso abirta pilo: “Kanghon pen nelilong kevangji aphan thangnatta pakhang longrinon!

¹⁷Nangliphan neli thedung anong-e nangpipo, lapen nangli kepu aling klempo. Kanghon pen vang iknon, neli pharman lahei rat aphan ahirjuno hangnon.”

¹⁸Bonta Balaam thak-lo, “Balak jongsi neliphan alangli rechohem pen ser lapen rup kedo-an nelipi seta neli ne Arnam HEMPHU ahukum patepek un-e, chersonat alam seta un-e.

¹⁹Bonta kanghon pen ningve dokoknon, akaprek atum kedo ason, anke neli nangdun nangjima nangdun nangnema HEMPHU kopitong nekepujine chinipo.”

²⁰Halaso aningve Balaam along Arnam vang-lo lapen arjulo, “Lahei amonit atum along dun nangji pu nangpulote, kedunjile chesiknon, bonta ne kopima nangphan nangkethan lale klemchotnon.”

²¹Lasi puthot adap Balaam amethang agadha athak charthang-lo, lapen Moab ajalin atum along dunlo.

²²Balaam kedun apot Arnam ke aningthilo, lapen Balaam agadha athak charthangsi dambomlo, alanglilong aban atum banghinita dunlo alangli tovar kekhangpet jisi tovar along sining apherangke arjap-lo.

²³Hadak nokjir otsi sining apherangke karjapther gadha thek-longsi, la tovar suilo, lapen hidi ajo anat damlo. Balaam gadha aphan arbulo, lapen puthot tovar anat vanthudet-lo.

²⁴Anke pherangke abang tovarso ajamkebi drakha arong rongni adak arjap-lo, lapen pu pu ahin ta arlong arpong dolo.

²⁵Pherangke aphan gadha thek-longsi la arpong anatsi suilo, lapen Balaam akeng padairop-lo. Balaam puthot gadha aphan arbulo.

²⁶Puthot aphong pherangke abang aphrang nangcheterek chot-lo; alangli hihi kechingkinnei adim arjap-lo, hadak ahin kaprek anat kesuiji atovar avepin.

²⁷Pherangke aphan gadha kethek-long laso aphong ke, la domjoilo. Balaam aning chekhang un-edet-lo lapen alangli chin pen gadha aphan karbuji pangcheng-lo.

²⁸Anke Gadha aphan keningje ajakong HEMPHU pilo, lapen la Balaam aphan ningjeserlo, “Nangliphan neli kopi kehingnosi keklemloma? Kopi apotsi nangli neliphan phongthom aphong neketheng-loma?”

²⁹Balaam thak-lo, “Pima nang nephan nechongthuilo! Ne jongsi nokjir do pulote nangphan nangpathilotji apot-lo.”

³⁰Gadha thak-lo, “Nanglikai isi angbong nangli kardonbom agadha neli kalima? Nangliphan lason neli aphrang klemloma?” Klemkle, alangli thak-lo.

³¹Anke Balaam aphan pherangke nokjir ke-otdong pathek-long-lo; lapen longle athak Balaam amahang patongbaksi ardomlo.

³²Pherangke hang-lo, Lason kopi chonghoisi nangli gadha aphan phongthom aphong ketheng-lo? Nangli tovar kekhangjisi neli vang-lo, pima nangli laso atovar dam de det nangji.

³³Bonta nangli gadha neliphan nangthek-long-lo, lapen batai kethom suilo. La suise pulote, ne nangliphan pathilotji apot-lo lapen gadha aphan ke pajokvongpo.

³⁴Balaam thak-lo, “Neli pap klemtang-lo. Nangli neliphan kekhangji si tovar along arjapding-lo pu neli chinine; seta non neli kedambom nangli kematha ateng hingnodak pulote, neli hem chiruijuipo.”

³⁵Bonta Pherangke thak-lo, “Lahei amonit atum pen pen dambomnon, bonta neli nangkethan alamsi thanchot nangji.” Ansi halatum penpen Balaam dambomlo.

³⁶Balaam vangbomlo pu Balak arjulongsi, Ar along alangli la aphan kechetongdunji damlo, Ar ke Arnon Aroi akung arongsopi, Moab ahoi.

³⁷Alangliphan Balak pulo, “Neli nangpahangcheng ahut nangli kopisi nangdunde det-loma? Neli nangliphan dorphlup anong-e nangpi un-e putong nangli kemathama?”

³⁸Balaam thak-lo, “Neli vang-lo, kalima? Bonta non neli kopi ajakong doloma? Arnam neliphan kopisi neli kepuma la si neli than unchot ji.”

³⁹Lasi Balak along Balaam Huzoth arongsopi,

⁴⁰along dunlo, hadak si Balak ke chainong lapen biresak-heihei thulo, lapen ajehak a-ok Balaam aphan pilo, lapen alanglilong kedo ajalin atum aphanta pilo.

⁴¹Puthot adap Balaam aphan Balak ha Bamoth Baal pu adim ponlo, hadak pen Israel arat aphan ephar Balaam thek-long-lo.