Read Karbi KELAKHA 23 Bible Online

KELAKHA 23 - Karbi bible

KELAKHA 23

¹Alangli Balak aphan pulo, “Neliphan dovan throksi nebuipinon, lapen neliphan chainong jonthroksi lapen biresak alo jonthroksi nevanpinon.”

²Alangliphan kepu ateng pen Balak klemlo, lapen Balaam pen alanglitum banghini, chainong ejon lapen biresak ejon alongtin adovan along athok pajirlo.

³Anke Balak aphan Balaam pulo, “Nangli kephrin athok pen ladak-le arjapthernon, neliphan HEMPHU nangchetongjine nangchetongtelone neli kedam ahut ladak donon.” Lason alangli kangtuinei anglong aphuchong athak inutvet damlo,

⁴lapen Arnam alangli pen chetong-lo. Alangliphan Balaam pulo, “Neli throksi adovan buitang-lo, lapen alongtin along chainong ejon lapen biresak ejon bilo.”

⁵Balaam kopisi keningje nangjima HEMPHU thanlo, lapen alangli birta Balak aphan kepathanjisi toithuphit-lo.

⁶Lasi alangli chevoi thulo, lapen Balak amethang kephrin athok pen Moab ajalin atum penpen karjapther thek-long-lo.

⁷Laso kemontri alamsi Balaam ningjelo: “Moab arecho Balak si nephan nevanlo Siria pen, nihang anglong anat pen nevanlo. ‘Vang-ra neliphan ningjetha’ pusi alangli kepu. ‘Israel arat aphuthak ahirjuno hangnon.’

⁸Kosonsi ne pahirjunopo, Arnam ta kepahirjunonele, Mate kevir alam kepupoma, Arnam ta kepupele?

⁹Arlong-heihei akangtui adim pen ne latum aphan thek-long; Inglong-heihei pen ne latum aphan lang-lo. Latum ke latumdetsi kedo isi akhei; Latum chechini akaprek akhei apar latum ahirjume longmu.

¹⁰Israel aso-asu ke longle aduk ason Latum aphai kelakhaji aphai ongpik. Arnam arat atum ason nekai pajangnang; Dhoromi atum ason nephan pathilongnang.”

¹¹Anke Balaam aphan Balak pulo, “Neliphan nangli kopisi keklemloma? Neli nangliphan ladak kevan ke ne hotur atum aphan ahirjuno kepiji aphansi nangkevan, bonta nanglike latum aphan ahirjumesi pilo.”

¹²Alangli thak-lo, “Neliphan HEMPHU kopisi nepaningjetoima lasi neli ningje un chot.”

¹³Balaam aphan Balak pulo, “Nelong along kaprek nangdunnon, hadak pen nang Israel atum aphan ajehaksi thek-longchotji. Hadak penle nepharman latum aphan ahirjuno hangnon.”

¹⁴La alangliphan Zophim ahidi aphuchong lake Pisgah Anglong athak ponlo. Hadakta alangli dovan long throksi builo, lapen alongtinta chainong ejon lapen biresak ejon athok pilo.

¹⁵Balak aphan Balaam pulo, “Nangli athok-heihei adungle nangli arjapthernon, hadak neli Arnam pen chetong dampo.”

¹⁶Balaam aphan Arnam chetong-lo, lapen kopima kepu nangji la aphan Alangli thanlo, lapen alangli birta Balak aphan kepathan jisi toithujuilo.

¹⁷Lasi alangli chevoithujuilo, lapen Balak aphan alangli kephrin athok adung Moab ajalin atum penpen karjapther thek-long-lo. HEMPHU kopisi kepuma Balak arjulo.

¹⁸Balaam laso kemontri alam ningjelo: “Vangnon, Balak, nang Zippor asopo, Lapen ne kopisi kepujima arjutha.

¹⁹Arnam ke monit ason kali, monit ke pachobei; Alangli ke monit ason aning chelarvoive. Alangli kechechak aling, la klemlo; Alangli ningjelo, lapen la klemtang-lo.

²⁰Ne pahirjumeji aphansi pinkhat-lo, Lapen Arnam pahirmelote, ne pachevoi un-elo.

²¹Israel atum mo aphi akai ne thek-long-et-lo, La akopai palangnonelo mate pasungselo. Latum a-Arnamsi latum along dolo; Alangli ke latum arecholo pu latum pachethang-lo.

²²Arnamsi latum aphan Ijip adet pen vanlo, Chai asonsi latum aphan Alangli chedanpilo.

²³Ladak mekbin ave lapen thek-kere amonit ave, Lahei pen ajok Israel akhei aphan keklem unji ave. Non rat atum Israel aphuthak pupo, ‘Langtha, Arnam kosontong keklempilone!’

²⁴Israel akhei lake jakongkethepik ahingho ason; La ingsek lapen cholongletik ke sangse. La kepathitang avi junlongletik ke sangse.”

²⁵Anke Balaam aphan Balak pulo, “Israel arat aphan nangli ahirjuno kepiji molo, seta ahirjume anke pi rinon!”

²⁶Balaam thak-lo, “HEMPHU kepu alingsi neli ningje chotji pu nangliphan nangthanthe langma?”

²⁷Balak pulo, “Nelilong nangdunnon, lapen neli nangliphan along kaprek nangponpo. Hadak Arnam nelijoine halatum aphuthak nanglipen ahirjuno papilong tahai mene.”

²⁸Lasi alangli Balaam aphan Peor Anglong aphuchong ponlo, lapen ha sangtimili ajo anta checharlo.

²⁹Alangliphan Balaam pulo, “Neliphan dovan throksi nebui pinon, lapen jon throksi achainong alo lapen jon throksi abiresak nevanpinon.”

³⁰Alangliphan kepu atengsi Balak klemlo, lapen adovan alongtin along chainong ejon lapen biresak ejon athok pilo.