Read Karbi KELAKHA 24 Bible Online

KELAKHA 24 - Karbi bible

KELAKHA 24

¹Nonke Balaam chinipamelo, HEMPHU-ke Israel arat aphansi kepahirjume ji aninghang, lasi akaprek angtar kelongji aphan aphrang ason alangli dundedet-lo, alangli mek kejejangtang ajo anatsi lang-lo,

²lapen Israel atum akhei akhei mukam kechekim thek-long-lo. Alangliphan Arnam Akarjong si jalo,

³lapen laso kemontri alam alangli ningjelo: “Beor asopo Balaam abirta lahelo, Kethek-longdak amonit kepu alamthe,

⁴Arnam kopima kepu karjulong abang. amek-rengjeng pen ne pine kethek-long Jakongkethe Arnam pen isi akethek-long.

⁵Israel atum amukam-heihei langmepik,

⁶Sotele aren arenle kedinglen ason Mate langkung apaiberi ason, HEMPHU-le ke-e athengpi arong-heihei ason Mate langkung ajo a-Kedar athengpi ason.

⁷Latum ongdung arve longji Lapen latum langkedo pame ahidi-heihei ajo chili varlongji. Latum arecho Agag apar themuji, Lapen la heloving lapen ajamkethe adim anta pangriji.

⁸Arnam latum aphan Ijip pen nangvanlo; Chainong alo asonsi latum aphan Alangli chedanpilo. Latum ahotur aphan latum pavirlo, Halatum arrepi parop-lo lapen athai aso ingdilo.

⁹Laso akhei ke ejon kangtangrak ahingho ason; La amek kejang ahut, laphan baduta ingthur haihe. Israel aphan ahirjume kepi abang ahirjume doji, Lapen Israel aphan ahirjuno kepi abang ahirjuno doji.”

¹⁰Anke Balak jasemetsi aningthihak-lo, lapen Balaam aphan pulo, “Neli hotur aphan ahirjuno kepapijisi neli nanghang-lo, bonta non pen batai kethomlo nangli latum aphan ahirjume kepi.

¹¹Non hem chedamnon! Neli nangliphan nong-e kepijisi chechak-lo, bonta nangli nong-e kelongji pen HEMPHU nangliphan nangkhang-lo.”

¹²Balaam thak-lo, “Nangli nangketoi apherangke atum aphan neli thanlo ke, atheke

¹³rechohem kedo-an aser lapen arup nangli neliphan nangpi-et seta nelining kehang ateng keklem pen ajok neli HEMPHU ahukum patepek un-e. Neliphan kopisi HEMPHU neli kepathantoima lasi neli than unchotji.”

¹⁴Balak aphan Balaam pulo, “Non nelirong neli chedampo, bonta neli kedam aphrang, Israel arat atum mo kevangji arni kopisi nangli rat atum aphan keklempoma nangliphan neli than pacheretoilo.”

¹⁵Anke alangli laso alam montrilo: “Beor asopo Balaam abirta lahelo, Amek pen kethek-longdak amonit alam lahelo,

¹⁶Arnam kepu alam komatsi arju unji Lapen Kangtuinei Abang pen kevang agian komatsi dengpo? Mek-rengjeng pen neli eson thek-long-lo La ke Theparpik Arnam pen kevang akethek-long.

¹⁷Mo kevangji akai aphan neli lang-lo, Lapen Israel akhei aphan neli thek-long-lo. Inut arecho, keklarbong achiklolongso ason laso akhei pen nangklangji. Kedamvoi achiklolongso asonsi Israel pen la vangpo. Moab ajalin atum aphan alangli arbupo Lapen Seth arat kedo-an aphan alangli sappo.

¹⁸Edom along alangli hotur aphan haidetpo Lapen halatum alongle amethang amar paplangpo, Israel atum ke haithorbompo.

¹⁹Israel akhei atum ke dong patekungbompo Lapen padusi kerenglang aphanta pavirdetpo.”

²⁰Anke Balaam akethek-long along Amalek atum aphan thek-long lo, lapen alangli laso alam montrilo: “Kadokave akhei angbong pen Amelek atum ke kangtangnei akheilo, Bonta kejutsi ke latum kaike aphan virdetpo.”

²¹Alangli akethek-long along Ken aso atum aphan thek-long-lo, lapen lason alam alangli montrilo: “Nangtum kedo adim ke jokvan, Kangtui a-arlong athak avotar ason jokvan,

²²Bonta nangtum ken aso atum virdetji Assiria atum nangtum aphan ban nangkepon ahut.”

²³Balaam laso kemontri alam ningjelo: “Nirep anat komat arat atumsi kechingrumpet-lo?

²⁴Saipras pen ketengkhengji atum vangvekpo, Latum Assiria lapen Eber aphan haidetpo, Bonta latumta, alar kaike aphan virklungpo.”

²⁵Anke Balaam chesik-lo, lapen ahem chevoijuilo, lapen Balakta atovarsi chedamlo.