Read Karbi KELAKHA 27 Bible Online

KELAKHA 27 - Karbi bible

KELAKHA 27

¹Mahlah, Noah, Hoglah, Milkah, lapen Tirzah atum ke Hepher asopo Zelophehad asopimar atumlo. Hepher ke Gilead asopo, la Makir asopo la Manasseh asopo, la Joseph asopolo.

²Latum damsi Moses, Eleazar lapen jalin lapen rat atum angno HEMPHU kedo A-pehem ajakan along arjapsi pulo,

³“Pinsopomar pamomepin pen nelipo atum ha kejejangtang ajo thi-et-lo. Alangli ke Korah aphi kedun abang kali, Korah ke HEMPHU abe kethur abang-lo; alangli thi-lo, pima amethang apap apot-lo.

⁴Nelipo asopomar kavedet pen ajok Israel angbong nelipo amen virdet nangjima? Nelipo adon-arap angbong pen nelitum aphan longle nethaknon.”

⁵Latum alam HEMPHU aphan Moses pachinilo,

⁶lapen alangliphan HEMPHU pulo,

⁷“Zelophehad asopimar atum kechoningri alam ke ahok-lo; apo adon-arap angbong pen latum aphan longle thak pinon. Latum along apo kelongji amar padonang.

⁸Israel arat atum aphan thannon, atheke inut amonit jongsi asopomar avepinpen thilot-lo pulote, asopimar atumsi alangli khi chepahemphupo.

⁹Alangli jongsi asopimar ave pulote, la akorte atumsi la chepahemphu longpo.

¹⁰Alangli jongsi akorte ave pulote, la apo akorte atumsi chepahemphu longpo.

¹¹Alangli jongsi akorte mate apunu ave pulote, alangli kechephosap adun abangsi la chepahemphu longpo lapen la amethang amar ason chekrong longpo. Israel arat atum laso aron akenangsot aronlo pu Ne, HEMPHU nangtum aphan hukum nangkepi asonthot talon nangpo.”

¹²Moses aphan HEMPHU pulo, “Abarim anglong arludamnon lapen Ne Israel atum aphan kepiji pu alongle hadak pen langnon.

¹³La nang langdet aphi, nang thipo, nang ik Aaron keklem ason,

¹⁴pima nangtum banghinita Zin akejejangtang ajo Ne hukum abe thurlo. Meribah along kadokave arat atum Nephuthak kepasimu ahut, latum angno Nejakong kangthir nangtum kechinijimolo.” (Meribah ke Zin akejejangtang ajo Kadesh along alangjeng-lo.)

¹⁵Moses ardomlo,

¹⁶“HEMPHU Arnam, kadokave achethe atiri, nangli phan neli ardomlo, atheke rat aphan kejajile inut amonit batnon,

¹⁷lapen halatum aphan ron kechedanji hukum pi-unpo, anke Nangli rat kevi abang kavedet abiresak ason kalidetpo.”

¹⁸Moses aphan HEMPHU pulo, “Joshua, Nun asopo aphan ponnon, la inut keklem un abang-lo, lapen nangri labangpo aphuthak batnon.

¹⁹Eleazar kurusar angno lapen rat atum laphan parjapnon, lapen hadak kadokave angno nangdularlo pu laphan pachethang non.

²⁰Laphan ajehak nangjakong pinon, anke kadokave Israel arat atum laphan kroipo.

²¹Alangli ta Eleazar kurusar aphan chikipo, la Urim lapen Thummim a-arlong kerim pen Nening kehang kopima chinipo. Lasonsi Eleazar ke Joshua aphan lapen Israel arat aphan halatum akam an aputhak tovar thanpo.”

²²HEMPHU Moses aphan hukum kepi atengsi alangli klemlo. Alangli Joshua aphan Eleazar kurusar lapen rat atum angno parjap-lo.

²³Moses aphan HEMPHU hukum kepi ateng ari Joshua aphu athak bat-lo, lapen laphan alangli dularlo pu pachethang-lo.