Read Karbi KELAKHA 28 Bible Online

KELAKHA 28 - Karbi bible

KELAKHA 28

¹Moses aphan HEMPHU hukum pilo,

²lapen Israel atum Arnam aphan akenangsot akecho adan-heihei kevanji aphan papinkhat toilo, atheke alangliphan la aning pangsamlo.

³HEMPHU aphan kepi nangji kephrin athok lahei helo: Kaike kephrin athok aphan, ningkan isi arta abiresak alo jonni, lahei akehingno avepin nangji.

⁴Ejon ke adap lapen ajon kaprek ke arnikangsamsi pinangji,

⁵ajontin along elin ahim aduk, akemenei ajit ajangthu elin pen kepangvui asok-asang adan pidun nangji.

⁶La ke kaike kepinangji athok-lo, lapen la phrin-et nangji, la ke Sinai Anglong along kepi akecho athok asonlo, laso angnim HEMPHU aphan aningpangsamlo.

⁷Kepicheng abiresak athok along kepidun adrakha ahorlang athok ason, dovan along elin adrakha ahorlang dungnon.

⁸Adap kepi athok asonthotsi ajon kaprek abiresak alo arnikangsam pinangji, laso along drakha ahorlangta dung dunpo. La ta isi kecho athok-lo, la angnim HEMPHU aphan aningpangsamlo.

⁹Kesang arnita ningkan isi arta abiresak alo jonni pi nangji, lapen lahei akehingno avepin nangji, linni ahim aduk jit ajangthu pen kepangvuitang asok-asang adan lapen drakha ahorlang adan pidun nangji.

¹⁰Laso akephrin athok ke kaike kepi athok along drakha ahorlang penpen kepi athok apar Kesang arnitin pi nangji.

¹¹Chiklo kecheng arni HEMPHU aphan kephrin athok pajir nangji: Chainong aloso jonni, biresak alo ejon, biresak aloso jon throksi, kadokaveta hingnonepin nangji.

¹²Sok-sang athok aphan, jit ajangthu pen kepangvuitang ahim aduk pinangji: la along chainong alo ejon, him aduk linthom; biresak aloso penpen, linni ahim aduk;

¹³lapen ajontin abiresak aloso along, elin ahim aduk. Lahei kephrin athok ke kechoji athok-lo, la angnim HEMPHU aphan aningpangsamlo.

¹⁴Ahokpet adrakha ahorlang athok ke, linni masi, la chainong alo ajontin along pidun nangji; ajontin abiresak alo along elin-ra powahini pidun nangji lapen biresak aloso ajontin along elin adrakha ahorlang pidun nangji. Ningkan angbong chiklo kecheng arni kepi nangji kephrin athok aron la helo.

¹⁵Arnivang kephrin athok kepi la drakha ahorlang adan penpen kepi abat pap athok aphan bi alo ejon pinangji.

¹⁶HEMPHU aphan aman kepiji la Kejok Amei kecheng achiklo krephli arni padonon.

¹⁷Krepho arni isi dhorom arong-aje cheng ponsi la ni throksi an doponpo, laso ahut esek ke thap kavepin ahim si chochotnangji.

¹⁸Rong-aje kecheng arni nangtum karchoji aphan chingrum nangji, lapen thangnat akamta klemlongle.

¹⁹HEMPHU aphan kecho adan kepijile kephrin athok pajirnon; Chainong aloso jonni, biresak alo ejon, lapen ningkan isi arta abiresak aloso jon throksi, hingnonepin van-nangji.

²⁰Ahokpet asok-sang adan jit ajangthu pen kepangvuitang ahim aduk pinon: Ajontin achainong aloso along linthom biresak alo along linni,

²¹lapen biresak aloso ajontin along elin lin.

²²Lapen pap athok aphan ejon abi alo pajirnon, lapen lasonsi rat atum aphan aron ateng pen kepangthir nangji akam klempo.

²³Laso athok ke adapvang kepi kephrin athok abat-lo.

²⁴Lasonthotsi, ni throksi HEMPHU aphan kecho athok pinon, la angnim HEMPHU aphan aningpangsamlo. Laso athok ke kaike kepi kephrin lapen drakha ahorlang athok abat pinangpo.

²⁵Karchoji aphan throksi arni chingrumnon lapen kam klemri.

²⁶Sokkerot Arong-aje kecheng arni, HEMPHU aphan nangtum sangkemi kepajir ahut, karchoji aphan nangtum chingrum nangji, lapen thangnat akamta klemri.

²⁷Kephrin athok pajirnon, la angnim HEMPHU aphan aningpangsamlo: Chainong aloso jonni, biresak alo ejon, lapen ningkan isi arta abiresak alo jon throksi hingnonepin nangji.

²⁸Ahokpet asok-sang adan pajirnon, la jit ajangthu pen pangvui nangji: chainong alo ajontin along linthom, biresak alo along linni,

²⁹lapen biresak aloso ajontin along elinlin pi dunnon.

³⁰Lapen pap-athok aphan ejon abi alo pajirnon, lapen lasonsi aron ateng pen rat atum aphan kepangthirji akam klempo.

³¹Lahei pajirnon lapen drakha ahorlang athokta pinon, lahei ke arnivang kepi kephrin athok lapen sok-sang athok-heihei abat-lo.