Read Karbi KELAKHA 3 Bible Online

KELAKHA 3 - Karbi bible

KELAKHA 3

¹Sinai Anglong along Moses aphan HEMPHU kepu ahut Aaron lapen Moses ahem asangho atum lahei helo:

²Aaron asopomar bang phli do: Nadab, la aklengsilo, Abihu, Eleazar, lapen Ithamar.

³Latum aphan jangthu patipsi kurusar akam kepaklemji aphan bat-lo,

⁴bonta Nadab lapen Abihu atum Sinai akejejangtang ajo HEMPHU aphan kangthirthe ame kepi apot thilot-lo. Latum asomar ave, lasi Aaron akai isi along Eleazar lapen Ithamar si kurusar akam ingduk-lo.

⁵Moses aphan HEMPHU pulo,

⁶“Levi akhei vannon lapen latum aphan Aaron kurusar aban keplangjile kam pinon.

⁷Ne kedo A-pehem along kenangji akam latum klempo lapen kurusar atum aphan keklempi nangji akam klempo lapen rat aphanta klempipo.

⁸Pehem ajohton an latumsi langpo lapen Israel aso apharman keklem nangji akam latumsi klempipo.

⁹Levi atum keklem-veknangji arpu ke Aaron lapen la asopomar atum aphan kangduk.

¹⁰Aaron lapen asopomar atum aphan kurusar akam kepaklemjile nang akam pinon; mane jongsi la keklemji bor-ilote pathi lotpo.”

¹¹Moses aphan HEMPHU pulo,

¹²“Langtha, Israel arat aso akleng angbong pen en-esi Israel arat angbong pen ne Levi atum aphan enlo. Levi atum ke Nemar cheplangpo,

¹³athema sokleng an ke Nemarlo; Ijip adet sokleng an aphan Ne kepathi arni; Israel along sokleng an Nephansi Ne chepanong-lo, monit tame lapen pi tame; latum Ne mar plangpo: Ne HEMPHU-lo.”

¹⁴Sinai kejejangtang ajo Moses aphan HEMPHU pulo.

¹⁵“Levi asomar atum aphan, aphusar atum ahem-heihei pen, lapen ahem asangho atum-heihei pen lakhanon; pinsomar chiklo ejon pen dang-lok ha arleng-kesar an.”

¹⁶HEMPHU alam atengsi lapen alangliphan hukum kepi atengsi Moses lakhalo.

¹⁷Lapen Levi asomar atum amen lahei helo: Gershon lapen Kohath lapen Merari.

¹⁸Lapen Gershon asomar atum amen lahei helo, latum ahemtun-heihei ateng-lo: Libni lapen Shimei.

¹⁹Lapen ahemtun-heihei ateng pen Kohath asomar amen la helo: Amran, Izhar, Hebron, lapen Uzziel.

²⁰Lapen Merari asomar latum ahemtun-heihei ateng amen lahei helo: Mahli lapen Mushi. Lahei helo Levi atum halatum aphusar atum ahem-heihei ateng-lo.

²¹Gershon aro ke Libni lapen Shimei ahemtun-heihei pen plang-lo.

²²Pinsomar aphai chiklo ejon pen arlengkethe an amen kechethap bang suri throksira pharopho.

²³Labangso aro ke Pehem anung nichi anatsi mukam chekim nangji,

²⁴Eliasaph la Lael asopo si laso aro pen arlengkesar mate ajalinlo.

²⁵Latum ke Pehem arpu en nang-lo. La arlo aden lapen athak aden, kelut anghap kebeng ape,

²⁶Pehem lapen dovan komchen atikup kebeng ape arpu enlo. Latum ke lahei pen kecherap akam arpu an klemnang-lo.

²⁷Kohath aro ke Amran, Izhar, Hebron, lapen Uzziel ahemtun-heihei pensi keplang-lo.

²⁸Pinsomar aphai chiklo ejon pen sosechot an bang suri nerkep-ra pharothrok amen thap-lo.

²⁹Laso aro ke Pehem anitur anatsi mukam kimnang-lo.

³⁰Elizaphan, la Uzziel asopo si aro asarlo.

³¹Latum ke Kechejok Asinduk, tebul, melur archok, dovan-heihei, Kangthir Adim kurusar kerim ajohton-heihei lapen Kangthirnei Adim kelut akebeng ape an kelang arpu enlo. Latum ke lahei an kecherap amar arpusi enlo.

³²Levi atum angbong akethenei ke Eleazar, la Aaron kurusar asopo. Alangli ke Kangthir Adim akam-heihei arpu keklem abang-lo.

³³Merari aro ke Mahli lapen Mushi ahemtun-heihei pen si plang-lo.

³⁴Pinsomar aphai chiklo ejon pen sosechot an amen kethap bang suri throk-ra pharohini.

³⁵Laso aro ke Pehem nirep anatsi mukam chekimnang-lo, Abihail asopo Zuriel si asar plang-lo.

³⁶Latum akam arpu ke Pehem ahop, arlan-heihei, anujok-heihei, aklong aden, lapen asonson. Lahei amar pen kecherap akam an arpu latum klemnang-lo.

³⁷Nujok-heihei, aklong aden-heihei, kesak akhuti-heihei, lapen ingtan atikup ari-heihei akam arpu latum klemnang-lo.

³⁸Moses lapen Aaron lapen la asomar atum Pehem athengno nihang anat si mukam chekimnang-lo. Latum Israel arat aphan Kangthir Adim akam arpu si dengnang-lo. Mane jongsi laso akam keklemji bor-ilote pathi lotpo.

³⁹HEMPHU hukum kepi ateng, kadokave Levi aso pinso atum chiklo ejon pen sosechot an aro ateng Moses bang suri ingkoira hini aphai amen thap-lo.

⁴⁰Moses aphan HEMPHU pulo, “Israel arat aso akleng pinso an aphai lakhanon, chiklo ejon pen arlengkethe an Israel atum aso-akleng abangphutin amen thapnon.

⁴¹Bonta halatum alar Ne kadokave Levi atum an Nemarlo pusi enpo; Nesi HEMPHU; kadokave achainong kechingthokcheng aso alar Ne Levi atum achainongsi enpo.”,

⁴²Lasi Moses Israel angbong sokleng an aphai lakhalo, alangliphan HEMPHU hukum kepi ateng-lo.

⁴³Kedo-an sokleng aphai amen ateng, chiklo ejon sose chot atum an bang suri ingkoira hinira throksi kep-ra kethom.

⁴⁴Moses aphan HEMPHU pulo,

⁴⁵“Nonke Israel pinso asokleng alar Levi atum aphan nehodainon, lapen Israel arat pi asokleng alar Levi atum kepangreng kechingthokcheng api nehodainon.

⁴⁶Israel asokleng atum Levi atum aphan bang pharohinira throksi kep-ra kethom lang kelit. Ahin asopomar atum aphan nangtum chenamthuvek nangji.

⁴⁷Abangphutin aphan rup dum pho, halaso ahut kejor-kelang ador ateng pinangpo,

⁴⁸lapen laso atangka Aaron lapen asopomar atum aphan pinon.”

⁴⁹Moses kroilo lapen

⁵⁰alangli dum suri isira pharo kethom ra throkkep-ra pho arup ponlo,

⁵¹lapen lahei Aaron lapen la asopomar atum aphan pilo.