Read Karbi KELAKHA 31 Bible Online

KELAKHA 31 - Karbi bible

KELAKHA 31

²“Israel arat aphan keklem apot Midian asor aphan adukpinon. La klemdet aphi nang thipo.”

³Lasi rat atum aphan Moses pulo, “Ron aphan chesiknon, anke nangtum Midian atum aphan tengkheng unpo lapen latum HEMPHU aphan keklem apot adukpi-unpo.

⁴Israel akheitin pen ron aphan suri isi si pinso amonit nangtoidunnon.”

⁵Lasi akheitin pen suri isi si amonit ingvaisi, kadokave bang suri krehini apinso amonit atum ron aphan chesik-lo.

⁶Eleazar kurusar asopo Phinehas ron kepajaji aphan Moses latum aphan toilo, lapen Phinehas ke kangthir amar-heihei lapen kepachesikji aphan kepabutji apong-ut-heihei kechepahemphu arputa pilo.

⁷Moses aphan HEMPHU hukum kepi atengsi latum Midian atum aphan tengkheng lo, lapen pinsomar an aphan pathilap-lo.

⁸Midian bangpho arecho atum aphanta pathilo: Evi, Rekem, Zur, Hur, lapen Reba. Latum Beor asopo Balaam aphanta pathilot-lo.

⁹Israel arat atum Midian a-arloso atum lapen asomar atum aphan nep-lo, lapen halatum achainong, api ahur, akhi thisi ponlo,

¹⁰lapen halatum arongsopi lapen amukam-heihei kedo-an me keilo.

¹¹Latum kethipon amar an ponlo, keneppon amonit lapen api anta pon lo,

¹²lapen Moses, Eleazar lapen kedo-an Israel arat angno vanlo, atheke latum Moab athoi Jeriko pen Jordan parai amukam alongsi do.

¹³Ron-armu atum aphan kechetong-dunjisi Moses, Eleazar, lapen rat ajalin atum barlo.

¹⁴Moses ke ron pen nangkechevoi a-saihemphu atum aphan lapen asong anokbe atum aphan aningthilo.

¹⁵Latum aphan alangli arjulo, “Kopisi nanglitum arloso atum an aphan akereng kebilang?

¹⁶Chemathatha, atheke arloso atumsi Balaam kepinkhat alam arjusi Peor along rat atum aphan HEMPHU anat pakroikrelo. Laso pen ajoksi HEMPHU arat aphuthak avur kevangnang-lo.

¹⁷Lasi non abangphutin apinsomar lapen a-arlosomar atum vi chepapho an aphan pathilapnon,

¹⁸bonta arlosomar lapen okarjang atum an ke nangtum aphan chebinon.

¹⁹Lapen nangtum angbong mane jongsi kethi arpum ke-ot atum anke ni throksi mukam angtan donangji, nithom arni lapen throksi arni nangtum lapen nangtum keneptang a-arloso atum aphan pangthirnon.

²⁰Nangtum pe apaktin, lapen ok-reng pen, bi angmi pen mate thengpi pen keselam amar an ta pangthirvek nangji.”

²¹Ron pen nangkechevoithu apinso amonit atum aphan Eleazar kurusar pulo, “Moses aphan HEMPHU kepi aron lahei helo.

²²Ser, rup, bitoi, ingchin, ting, lapen ingchin-kangduk,

²³me kechoche ason an ke nangtum me angkang varnangji, lapensi la ingthirji. Jonghe seta kepangthir iji alang pen pangthir nangjilang; lapen kopi-pima me kecho amar an ke lang along var nangji.

²⁴Throksi arni nanglitum ape-ari chechokvek nangji; ansi nanglitum aron ateng pen ingthirji, lapen mukam arlo kelutji aphan ahukum longpo.”

²⁵Moses aphan HEMPHU pulo,

²⁶“Nang lapen Eleazar, akaprek rat ajalin atum penpen, kevantang an amar lakhanon, keneptang a-arloso lapen api setame.

²⁷Phanni thakdaknon, ephan ke ron-aso atum lapen aphan kaprek ke rat atumlo.

²⁸Ron-aso apharman pen HEMPHU aphan isi amidu asonsi bang pharopho keneptang amonit atum angbong pen inut ke HEMPHU aphan khangnon. Lasonsi, chainong, gadha, biresak, lapen bi-heihei pen isinat aphan endunnon.

²⁹Lahei Eleazar kurusar aphan HEMPHU aphan isi kepanong adan pinon.

³⁰Rat atum aphan kepi apharman pen bangphokep akeneptang amonit angbong pen inut lapen lasonsi chainong, gadha, biresak, lapen bi-heihei penta ennon. Lahei HEMPHU A-pehem kechepahemphu a-Levi atum aphanle pinon.”

³¹HEMPHU hukum kepi atengsi Moses lapen Eleazar klemlo.

³²Non ron along nangkethi amar atheke ron kechedan atum kevan lahei helo biresak jon suripharothrok ra throksi kep ra pho abiresak lapen abi,

³³chainong jon suri throksi kep-ra hini,

³⁴gadha jon suri throk-kep ra isi,

³⁵lapen bang suri thomkep ra hini kangthir-et a-okarjang atum dolo.

³⁶Lapen achitim ke, ron kechedan kedun atum apharman kelong jon suri pharo kethom ra suri thomkep ra throksi ra pharopho abiresak,

³⁷lapen HEMPHU apharman jon pharothrok ra throksi kep ra pho abiresak,

³⁸chainong jon suri thomkep ra throk, lapen HEMPHU apharman ke jon throksi kep ra hini achainong,

³⁹Gadha jon suri thomkep ra pharo pho, lapen HEMPHU apharman ke gadha jon throk-kep ra isi,

⁴⁰okarjang bang suri krethrok ke ron kechedan atum apharmanlo, laso angbong HEMPHU apharman ke bang thomkep ra hini.

⁴¹Lasi HEMPHU kepinkhat ateng Moses Eleazar kurusar aphan HEMPHU aphan isi prekjek dan amidu asonsi pilo.

⁴²Israel arat atum achitim kelong amar atheke ron kechedan kedun atum pen Moses kethak dun aphai lahei helo.

⁴³Non rat atum apharman ke suri pharo kethom ra suri thomkep ra throksi ra pharo pho abiresak lapen abi long-lo,

⁴⁴chainong jon suri thomkep ra throk,

⁴⁵gadha jon suri thomkep ra pharopho,

⁴⁶okarjang bang suri krethrok,

⁴⁷Israel arat atum achitim kelong angbong HEMPHU apharman Moses kekhangdunke phokep angbong pen inut mate ejon, monit seta pi seta khangdunlo, lapen lahei HEMPHU A-pehem kechepahemphu a-Levi atum arideng, Moses aphan HEMPHU hukum kepi ateng hodailo.

⁴⁸Anke ron-armu aphan hukum kepi a-saihemphu atum Moses along damlo,

⁴⁹lapen thanlo, “Akehai, nelitum aber kedo ron-aso aphai lakha lo, lapen inutta ingbobe.

⁵⁰Lasi nelitum ser adorson, Tai aroi, lek, arnan, nojangsai, lapen chethok alek-heihei nelitum abangphutin kelong ason an vanlo. Lahei nelitum HEMPHU aphansi hodailo, atheke nelitum apran alar kechetu lo, anke alangli nelitum aphan neraipo.”

⁵¹Moses lapen Eleazar atum ser amar, atheke kadokaveta kechingthang adorson amar saide dengdunlo.

⁵²Saihemphu atum kepi adan ardi lin pharohini plengkeilo.

⁵³Saihemphu kali atum ke latum nangkethi amar an chebijoilo.

⁵⁴Lasi Moses lapen Eleazar latum Pehem arlo ser ponlo, anke Israel arat aphan HEMPHU raipo.