Read Karbi KELAKHA 32 Bible Online

KELAKHA 32 - Karbi bible

KELAKHA 32

¹Reuben lapen Gad akhei atum kepangreng api dopik. Jazer lapen Gilead alongle chainong kepangreng aphan mesen thek-longsi latum

²Moses, Eleazar, lapen rat ajalin atum along damlo, lapen pulo,

³“Ataroth, Dibon, Jazer, Nimrah, Heshbon, Elealeh, Sebam, Nebo, lapen Beon,

⁴Israel atum angno HEMPHU erapsi ekepi alongle ke chainong aphan mepik; lapen nangliban atum chainong do-o.”

⁵Lapen latum pulo “Nanglitum amek angden nelitum kangjinso long-lo pulote, lahei along le nangliban atum kechepahemphujile paplanglongtha; nelitum aphan Jordan parai nelipon nangnelo.”

⁶Moses thak-lo, “Nangkorte Israel atum ron kechedan kedamji ahut nanglitum ladak do ingtungma?

⁷Nanglitum kopusonsi Israel atum aphan HEMPHU kepiji pu alongle along kedamji aphan Jordan Aroi kehatji ahut aning parundunhai-loma?

⁸Lasonthotsi nangpo atum aphan ne Kadesh Barnea pen longle kepalangdam ahut latum keklem,

⁹Latum ha Eskol Arlok an dambomsi, longle thek-long-lo, bonta latum nangke chevoithu ahut, latum aphan HEMPHU kepi alongle along kelutdamji aphan latum aning pabilo.

¹⁰Halaso arni HEMPHU aningthilo, lapen semetang-lo:

¹¹‘Pima latum Nephan kroithipthe det apotsi, Ne seme tang-lo, atheke, ningkan ingkoi arta mate akesar atum Ijip pen kevang atum an Ne Abraham, Isaak, lapen Jakob aphan kepiji pu kechak alongle along jongheseta lutdam longlelo!

¹²La ke kadokave aphan talo, atheke Ken aso Jephunneh asopo Kaleb, lapen Nun asopo Joshua apar baduta lutdun longlelo; latum banghini ke HEMPHU aphan kroithipver.

¹³Rat atum aphan HEMPHU aningthihaksi latum aphan kejejangtang ajo alangliphan aning kepangsamkrang atum thi-et-etik-ke ningkan phlikep latum aphan padamtap-lo.

¹⁴Lapen non nangtum nangpo atum adim dotanglilo, isi pap pen keplengset akemi a-ove amonit atum, Israel aphuthak puthot HEMPHU aningkethi pavang dapprangpo.

¹⁵Nangtum Reuben lapen Gad arat atum jongsi Alangliphan dun ingtungte pulote Alangli puthot lahei arat aphan kejejangtang ajo otekang-etpo, lapen latum akevir apot nangtumsi adai ennangpo.’”

¹⁶Latum Moses adung damlo, lapen pulo, “Kechengsi nelitum aphan arlong apai komchen ladak netum abiresak aphan nepabuilongtha lapen paikomchen arongso nesomar atum aphan nepakim longtha.

¹⁷Anke nelitum akorte Israel atum along ron kedunji chesikpo lapen latum kelongji alongle along dothip longletik ke nelitum ron kechedan japonbompo.

¹⁸Israel atum aphan kepiji pu alongle along latum chepahemphu longletik netum hem chevangthuthelo.

¹⁹Jordan parai alongle latum angbong pen netum cheraidundelo, pima netum kelongnangji apharman alongle ladak Jordan anihang along long-lo.”

²⁰Moses thak-lo, “Nangtum kopisi kepuma la klempo pulote ladak HEMPHU angno nangtum ron kechedanjile chesiknon.

²¹Nangtum ron kechedan amonit atum an Jordan Aroi hat nangji, lapen HEMPHU ahukum aber dosi latum ehotur aphan tengkheng nangji, ha HEMPHU latum aphan paremretik an,

²²lapen longle cherai longletik an. Laso aphi si nangtum chevoithu unji, pima nangtum HEMPHU akenang ateng klem papleng-lo lapen nang korte Israel atum aphan jokta aningpangsamlo. Ansi Jordan anihang alongle ke nangtumlo pu HEMPHU kroipo.

²³Bonta nangtum jongsi nangtum kechechak alam chebibe pulote, ne nangtum aphan pacherelo, atheke nangtum HEMPHU aphan pap klempo. Laso alam aputhak asapta tengneri; nangtum apap apot nangtum aduk phonangji.

²⁴La apotsi nangtum arongso chekimnon, lapen nang-biresak aphan apai chekimnon, bonta kopima nangtum kechechak ason klemnon!”

²⁵Gad lapen Reuben amonit atum pulo, “Akehai, nangli hukum kepi ateng nelitum klempo.

²⁶Nelitum apiso atum lapen osomar atum, chainong lapen biresak atum ladak Gilead arongso alongsi dopo.

²⁷Bonta nelitum kedo-an ke HEMPHU ahukum aber dosi ron kechedandamji aphan chesikpo. Jordan hatsi nelitum chedandampo, la nangli kepu ateng klempo.”

²⁸Lasi Moses lahei ahukum Eleazar lapen Joshua akaprek Israel ajalin atum aphan pilo:

²⁹“Gad lapen Reuben amonit atum jongsi Jordan parai kap pen HEMPHU ahukum ateng ron kechedanji aphan chesik-lo pulote lapen latum akerap pen ajok nangtum haidet-lo pulote, latum aphan Gilead alongle latum chepahemphuji aphan pacherailongnon.

³⁰Bonta latum Jordan hat-he lapen nangtum along ron kechedanji aphan nangdunde pulote, latum aphan Kanaan adet alongle pinangpo, la nangtum kelong asonthot.”

³¹Gad lapen Reuben amonit atum thak-lo, “Akehai, HEMPHU hukum nekepi ateng nelitum klempo.

³²Alangli hukum ateng nelitum Jordan kappo, lapen Kanaan adet lutdampo, lapen ron chedan dampo, anke nelitum ladak Jordan anihang alongle cherailongpo.”

³³Lasi Moses ke Gad lapen Reuben akhei atum aphan lapen Manasseh akhei achitim an aphan Amor arecho Sihon alongri an, lapen Bashan arecho Og alongri an, arongso-heihei lapen la kekomchen arong-heihei pilo.

³⁴Gad akhei atum Dibon, Ataroth, Aroer,

³⁵Atroth, Shophan, Jazer, Jogbehah,

³⁶Beth Nimrah, lapen Beth Haran arongro-heihei kimthulo.

³⁷Reuben akhei atumta Heshbon, Elealeh, Kiriathaim,

³⁸Nebo, Baal Meon (laso amen lardet-lo), lapen Sibmah arongso apaisongkomchen kimthulo. Latum kekimthu arongso-heihei amen kemi irlo.

³⁹Makir aro, la Manasseh asopo atum Gilead adet tengkheng-lo, lapen la cheraidet-lo, lapen hadak kedo Amor atum aphan phlung-et-lo.

⁴⁰Lasi Makir aro aphan Moses Gilead pilo, lapen latum hadaksi dolo.

⁴¹Jair, la Manasseh akhei, tengkhengsi ajehak arong cherailo, lapen “Jair arong-heihei” pusi irlo.

⁴²Nobah ta tengkhengsi Kenath lapen la arong-heihei cherailo, lapen la Nobah pu alangli men asonthotsi irlo.