Read Karbi KELAKHA 35 Bible Online

KELAKHA 35 - Karbi bible

KELAKHA 35

¹Moab athoi along Jordan akung Jeriko pen Moses aphan HEMPHU pulo,

²“Israel atum aphan thannon, atheke latum kelong alongle angbong pen kedoji aphan lapen kepachopanji aphan ajehak arongsopi komchen alongle Levi atum aphan pinon.

³Lahei arongsopi ke Levi atum amarlo, lapen latum hadaksi dopo. Bap kedo alongle ke latum achainong lapen akaprek api aphanlo.

⁴Bap alongle ke rongsopi apai pen ingrup pharo sirkep an ingtan lepo, la ahintin ta lasonpo,

⁵lasonsi ahintin anat ta ingrup pharo krenerkep dopo, rongsopi abang ke angbong chitimsi dopo.

⁶Levi atum aphan nangtum chepachong arongsopi rong throk pinangji, ladaksi mathathepin pen pran karmut abang damsi chepajokpo. La apar, latum aphan rongsopi phlikep-ra hini arong pinon,

⁷bap kedo alongle pen pen pinon, kadokave rong phlikep-ra nerkep paplangnon.

⁸Levi atum arongsopi aphai kelongji apharman ke latum aro kethe kebi atengsi la arongta longpo.”

⁹Moses aphan HEMPHU pulo,

¹⁰atheke Israel arat aphan kepathanji aphan: “Nangtum Jordan Aroi hatsi Kanaan kelutdam ahut,

¹¹nangtum chepachong arongsopi-heihei ingvai nangji, atheke inut amonit matha thepinpen mane apran armut lote la hadak chepachongdam longpo.

¹²Hadak kethitang amonit adon-arap atum alar kehui arideng pen la jokpo. Inut monit kepathi amonit aphan rat ingsaisetik ke laphan pathi longle.

¹³Rongsopi rong throk ingvainon,

¹⁴kethom ke Jordan anihang anat lapen rongthom ke Kanaan adet along amat.

¹⁵Lahei ke isi Israel atum aphan kechepachong arongsopi plangpo lapen bang adet aso atum aphan malomso tame kaike kedoverji aphan tame dolongpo. Lahei along elongbak mathakrang pen monit apran karmut abangphu chepachong dam longpo.”

¹⁶“Jongsi inut amonit mane aphan ingchin amar pen arbu amat thilot-lo, labangso amonit ke pran karmut abang-lo; pran karmut abang phan pathilot nangji.

¹⁷Jongsi la mane abangphan ari a-arlong pen arbulo, la pen ajok halaso amonit thilot tahai, lapen thilot-lo, la bangso amonit ke pran karmut abang-lo; prankarmut abangphan pathilot nangji.

¹⁸Mate la thengpi amar pen mane aphan ari pen arbulo, la pen ajok laso amonit thilot-tahai, lapen la thilot-lote, la prankarmut abang-lo; prankarmut abangphan pathilot nangji.

¹⁹Kethi abang keche phonei adon atumsi prankarmut abangphan pathinangpo. Alanglitum la aphan pathinangpo pu keri pen kethek-long ahut, pathinangpo.”

²⁰Inut amonit jongsi mane amonit aphan hijimlo, lapen laphan kangbaichor pen ajok mate pine pen kevar pen ajok pathilot-lo,

²¹mate arikan pen laphan arbulo lapen ajok thilot-lote, la prankarmut adai dolo lapen lason aphan pathilot nangji. Kethi abang chephonei adon-arap atumsi prankarmut abangphan kepathi arpu dolo, laphan thek-long lote, halatumsi pathi nangji.

²²“Bonta inut amonit kehijimjepin abangphan mathakrang pen pathilot-lote, laphan kangbai pen setame, mate laphan pine pen kevar tame.

²³Mate langle pin pen inut amonit arlong varlo lapen mane amonit aphan roklok-lo, lason keklemji pu mathathe pin amonit aphan rotet amat thilot-lo, lapen kethi abang ke la ahotur kali.

²⁴Lason lote rat atum kepathitoi abangphu abe ingsai nangpo, lapen alar kehuiji pu kerivung kethi amonit adon-arap atum abe kali.

²⁵Rat atum kethitang amonit adon-arap pen prankarmut adai bangpo aphan pajok nangpo, lapen alanglitum laphan chepachong arongsopi along voithu nangji, atheke alangli chepajok adim along. Hadak Kurusar Kethenei thithetik an la donangji.

²⁶Prankarmut abang jongsi alangli kechepachong arongsopi obup-lo,

²⁷lapen kethitang abang adon-arap atum laphan thek-longsi pathilot-lote lason alar kehui akam ke pran-karmut kalilo.

²⁸Prankarmut abang chepachong arongsopi along dover nangji ha kurusar thithetik an, bonta laso aphi alangli ahem chevangmelo.

²⁹Lahei aron ke nangtum lapen nangpoton atum an aphantalo lapen nangtum nahok-le dosetame aron isinat-lo.”

³⁰Inut prankarmut keboktang amonit adai do lapen pathi unji, jongsi hini mate ansose aporman ahaki nep-long-lote; isivet apran-karmut kebok ahaki chot ke dorde.

³¹Inut prankarmut abangphan ke pathilot nangji. Laso adai la tangka kepi pen chepajok un-e.

³²Inut amonit jongsi chepachong arongsopi along katjuilote, Kurusar thithe aphrang hem kechevang longji aphan tangka papi longledet nangji.

³³La jongsi nangtum klemlo pulote, nangtum kedo adim alongle nangtum pangthirthetang-lo. Prankarmut abang longle pangthirthetang-lo, jongsi prankarmut abang thithete, inut prankarmut amonit apot longle aron atang pen kepangthirji thangnat atovar avelo.

³⁴Nangtum kedo alongle pasa-urri, pima Ne HEMPHU lapen Ne nemethang arat Israel atum angbong si do.