Read Karbi KELAKHA 36 Bible Online

KELAKHA 36 - Karbi bible

KELAKHA 36

¹Gilead along aro ajalin atum, Makir asopo lapen Manasseh asupo, la Joseph asopo, atum Moses lapen akaprek ajalin atum along damlo.

²Latum pulo, “Khadot pen ajok Israel arat atum aphan longle kethakji aphan HEMPHU nanglitum aphan hukum nangpilo. Netum adon Zelophehad asopi atum aphanta longle kepiji aphan Alangli hukum nanglitum aphan nangpilo.

³Bonta chematha iktha, jongsi alanglitum akhei kaprek amonit aphan penan dolote, latum alongleke halaso akhei si cherai longpop po, lapen nelitum aphan nekethak alongleke bihek po.

⁴Kevoithu aningkan, kadokave alongle amar kejortang anta atiri ahemphu aphan voithu-et nangji, atheke Zelophehad asopi atum alongle ke kaike aphan latum penan kedo akhei atum aridengsi doverpo, lapen nelitum akhei aphan ke isi akekonlo.”

⁵Lasi Israel arat aphan Moses HEMPHU pen lahei ahukum pilo. Alangli pulo, “Manasseh akhei atum kepu alam ahok-lo,

⁶lapen la apotsi HEMPHU pulo, atheke Zelophehad asopi atum badu aphan tame aninghang aling penan dolong, bonta amethang akhei atum angbongchot nangji.

⁷Akheitin alongle amethang akhei alongsi chedochotji.

⁸Abangphutin Israel a-arloso longle chepahemphu-verji pulote amethang akhei angbongsi penan do nangji. Lasonsi Israel atum abangphutinta aphusar atum alongle chepahemphu longvetpo,

⁹lapen longle isi akhei pen akhei kaprek along damdelo. Akheitinta amethang alongle chepahemphu longrepverpo.”

¹⁰Moses aphan HEMPHU hukum kepi atengsi Zelophehad asopimar atum klemlo;

¹¹Mahlah, Tirzah, Hoglah, Milkah, lapen Noah aphan, Zelophehad asopimar atum apo akorte akorte asomar atum aphan si penan do lo.

¹²Latum Joseph asopo Manasseh asopomar atum aphansi penan dolo, lapen latum alongle apo atum akhei ahem alongsi chedovet-lo.

¹³Lahei helo Moses pen ajok HEMPHU Israel arat atum aphan kepi aron atang-lo, lahei ha Moab athoi Jordan akung Jeriko anung pensi kepilo.