Read Karbi KELAKHA 4 Bible Online

KELAKHA 4 - Karbi bible

KELAKHA 4

²“Levi akhei pen Kohath aro aphuthak aphai ennon, ahemtun-heihei lapen aphusar atum ahem-heihei ateng pen,

³ningkan thomkep arta pen ningkan phokep arta an, kam keklemdunthek atum an, HEMPHU kedo A-pehem arlo akam.

⁴HEMPHU kedo A-pehem along Kohath asomar atum keklem nangji akam lahei helo: Kangthirnei akam.”

⁵Moses aphan HEMPHU lahei alam pinkhat-lo. Mukam kephriji ahut nanglelote, Aaron lapen asopomar atum Pehem arlo lutdampo, Kechejok Asinduk athengno kebeng ape pasunpo, lapen la pen Sinduk dippo.

⁶Latum ok-rengkeme la athak dippo, athaksi pe kelu purjampo, anke kepon-i abarlon kroipo.

⁷Latum HEMPHU aphan kepi ahim aphan atebul athak pekelu limjam po lapen la athak kasu-heihei, methek aharlung-heihei, Kepajir aharlung-heihei lapen drakha ahorlang athok aphan bong-heihei, batpo. Tebul athak kaiketa him doverpo.

⁸Latum la bithe bitha pe-ke-er limjampo, lapen la aputhak ok-rengkeme dippo lapen kepon-iji abarlon kroipo.

⁹Latum pekelu ensi lapen melur archok, la amelur-heihei, ade-heihei keroi-akasu-heihei, lapen kedo-an jit ajangthu abong-heihei dippo.

¹⁰Latum la telom-ipo lapen la kadokave ajohton an ok-reng adip along thappo, lapen kepon-i ahop athak batnangji.

¹¹Adunthu latum ser adovan aputhak pekelu limjampo, la athak voserli a-ok-reng pippo, lapen laso aphi kepon-i abarlon-heihei kroi po.

¹²Latum Kangthir Adim along kerim ajohton-heihei an ponpo, lapen lahei pekelu pen telompo, lapen lahei aputhak voserli a-ok-reng adip dippo, lapen lahei kepon-i ahop along batpo.

¹³Latum kechenir athek-lo dovan pen varsi la aputhak hepi arje ape pen dippo.

¹⁴La athak latum dovan along kenangji an ajohton batpo: methek aharlung, avek-heihei, bevuk-heihei, lapen phule. Anke latum lahei aputhak voserli a-ok-reng pen dippo, lapen Kepon-i abarlon kroipo.

¹⁵Mukam kephri ahut, Aaron lapen asomar atum lahei pe dip-et aphi lapen kedo-an ajohton dip-et aphi si Kohath aro vangsi kangthir ajohton an roiponpo. Kohath aro atum kangthir amar papho longle, kalite latum thinangji. Pehem kecheterek ahut Kohath asomar atum keklem nangji arpu lahei helo.

¹⁶Aaron kurusar asopo Eleazar si Pehem kangthim akam lapen melur ajangthu-heihei, methek, sok-sang adan-heihei, kepatip ajangthu, lapen Pehem along HEMPHU aphan kehodai kepangthirtang ajohton an aputhak kelang nangji arpu dolo.

¹⁷Moses lapen Aaron aphan HEMPHU pulo,

¹⁸“Kohath aro atum aphan pathilongri,

¹⁹lahei kangthir amar adung kevang pen ajok, Laso keplangple detji aphan Aaron lapen la asomar atum arlo dampo, lapen abangphutin aphan keklem nangji akam pipo, lapen halabangso amonit aphan kopisi kepon nangjima thanpo.

²⁰Bonta Kohath aso atum Pehem arlo lutsi keterekji aphan kurusar atum kangthir ajohton kerim langdunlo pulote, latum thipo.”

²¹Moses aphan HEMPHU pulo,

²²Levi atum angbong pen Gershon aro atum lapen ahemtun-heihei aphai ennon.

²³HEMPHU kedo A-pehem along kam keklemji a-ot kedo atum an pinso amonit arta ningkan thomkep pen phokep angbong amen thap non.

²⁴Latum lahei amar keponji arpu enpo:

²⁵Pehem, la arlo kedip ape, athak kedip ape, la athaksi kedipji aphan voserli a-ok-reng, kelut amangho kebeng ape,

²⁶kebeng ape-heihei lapen Pehem lapen dovan komchen atikup aphan arri-heihei, tikup kelut amangho akebeng ape-heihei, lapen lahei keparjapji aphan kenang amar an. Lahei aphan keklem nangji akam an latum klem nangpo.

²⁷Moses lapen Aaron lahei Gershon asomar atum latum aphan Aaron lapen asomar atum ketoi akam adeng cheklem loma cheklemkle loma langchari nangpo.

²⁸Lahei helo Pehem along Gershon asomar atum keklem nangji arpulo; lahei latum Aaron Kurusar asopo Ithamar kethan ateng klem-ponpo.

²⁹Merari aro a-Levi atum lapen ahemtun-heihei aphai ke-enji aphan HEMPHU Moses aphan pulo,

³⁰lapen kedo-an apinso arta ningkan thomkep pen phokep angbong HEMPHU kedo Pehem along kam keklemdunji a-ot kedo an atum amen kethapji aphan pulo.

³¹Latum ahop-heihei, abarlon-heihei arpan anujok-heihei, lapen Pehem aden-heihei,

³²lapen anujok-heihei, aklong aden-heihei, kesak akhuti-heihei, lapen Pehem komchen atikup aphan arri-heihei, lapen la hei keparjapji aphan akenang amar an kepon ji arpu enpo. abangphutin amonitta amethang arpu cheklemvetpo.

³³Lahei helo Merari aro Latum Pehem along keklem nangji akam: Latum Aaron kurusar asopo Ithamar kethan atengsi lahei akam klem pachunpo.

³⁴Moses lapen Aaron lapen rat ajalin atum Kohath asomar atum aphan aro aro lapen adon adon aphai lakhalo,

³⁵latum arta ningkan thomkep pen phokep angbong HEMPHU kedo a-Pehem along kam keklemthekji pu atum an amen thap-lo;

³⁶lapen Kohath atum aphai bang surihinira pharo throksira phokep.

³⁷Kohath asomar atum aphai lahelo, latum HEMPHU kedo apehem along kam keklem atum anlo, HEMPHU Moses aphan hukum kepi atengsi Moses pen Aaron latum aphai lakhalo.

³⁸Gershon asomar atum aphai ahemtun-heihei lapen aphusar atum ahemtun-heihei pen alakha aphai,

³⁹ningkan thomkep arta pen phokep arta an pinso amonit, HEMPHU kedo A-pehem along kam keklemdunthek atum an

⁴⁰latum aphai latum ahemtun-heihei lapen latum aphusar atum ahem-heihei pen bang surihinira pharothrok ra thomkep.

⁴¹La ke Gershon asomar atum ahemtun-heihei abangphu aphailo, latum ke HEMPHU kedo A-pehem along kam keklemdun atum anlo, HEMPHU Moses lapen Aaron aphan kepi ahukum ateng-lo.

⁴²Merari asomar ahemtun-heihei lapen aphusar atum ahem-heihei pen aphai, lake

⁴³arta ningkan thomkep pen phokep angbong, HEMPHU kedo A-pehem along kam keklemdunthek an

⁴⁴latum aphai adon adon pen bang suri kethomra pharohini.

⁴⁵Lahei ke Merari asomar adon adon aphailo, Moses aphan HEMPHU hukum kepi atengsi Moses lapen Aaron aphai lakhalo.

⁴⁶Lahei Levi atum aphai Moses lapen Aaron lapen jalin atumsi latum adon adon lapen latum aphusar atum ahem-heihei ateng pen lakha lo,

⁴⁷arta ningkan thomkep pen phokep angbong, abangphutinta HEMPHU kedo A-pehem arlo kelutdunthek lapen kam keklemdunthek lapen arpu-heihei ke-endunthek an atumlo,

⁴⁸latum kelakha aphai bang suri nerkep-ra pharopho ra bang throknerkep.

⁴⁹HEMPHU ahukum ateng Moses pen ajok abangphutin aphanta akam pirep-lo. Abangphutinta akam mate kepon nangji arpu pirep-lo; lasonsi alangli pen ajok latum aphai lakha lo, Moses aphan HEMPHU hukum kepi ateng-lo.