Read Karbi KELAKHA 5 Bible Online

KELAKHA 5 - Karbi bible

KELAKHA 5

¹Moses aphan HEMPHU hukum pilo,

²“Israel arat aphan punon, si-i keso kedo atum, a-ok-kangduk pen ateni kebu atum lapen kethitang abang arpum ke-ot pen ajok kangthirthe atum an aphan mukam pen paphlung-etnon.

³Lahei aron ateng pen kangthirthe amonit atum aphan toi-etnon, anke latum mukam pasa-ur un-elo, pima daksi Nerat atum angbong Ne dolo.”

⁴Israel atum kroisi latum aphan mukam pen phlung-et-lo.

⁵Moses aphan HEMPHU

⁶lahei Israel arat aphan papinkhat toilo. Mane jongsi HEMPHU aphan kroithipthekthe lapen mane aphan kechokche akam klemdet-lo pulote,

⁷alangli pap chekobirvek nangji lapen adai chetupame nangji, la aparta alangli keklem kechokche abangphu aphan phan pharo pen phan ingkoi abat pinangji.

⁸Bonta halabangso amonit thi-et-lo lapen kechepho adon amonit adai kedengji abang ave pulote, kurusar apharman HEMPHU aphanle pinon. Laso akepi nangke adai kedo abangphu aphan aron ateng pen kepangthir akam keklempi ahut ke-en abiresak alar abat-lo.

⁹Lapen la ke Israel atum kepanong adan HEMPHU aphan aphongtin kepi ahut koloso akurusar aphansi latum kepima halaso amar plangpo.

¹⁰Abangphutin akurusarta alangliphan kepi adan chebinangpo.

¹¹Moses aphan HEMPHU pulo,

¹²“La-heihei alam Israel arat aphan thannon, mane amonit apiso jongsi damtapvaret-lo lapen alangliphan kroithipthelo, lapen

¹³mane jongsi bangpi pen ok aphan loksi beberap-rap-lo, lapen laso alam apenan aphan patujoilo, lapen bangpi amethang abang chepasa-urlo seta jokta nepthekthedet-lo, lapen bangpi aphan ahaki avedet-lo, pima bangpi aphan akam kechoklem ahut baduta nepdunlongledet-lang;

¹⁴bonta kelangselet akarjong apenan aphu-thak vang-lo tangte, lapen apenan abang kechepasa-urtang apiso aphan langselet-lo, lapen kelangselet akarjong pinso aphuthak vang-lote, lapen alangli apiso aphan langselet-lo, seta apiso abang ke ingthir-et-lang.”.

¹⁵“Anke pinso abang apiso aphan kurusar along van nangpo, lapen bangpi aphan akenang adan vanpinangpo, atheke soktipliso ahim aduk elin; la along thangnat ajangthuta dung dun nangnelo, lapen mephik aduk ta bi dun nangnelo, pima lake kelang un-e asok-asang adanlo, mate kelet kechepamathathu adanlo.”

¹⁶Kurusar abang bangpi aphan aphrang vansi dovan angno parjap po.

¹⁷Longle aharlung arlo alangli ajehak kangthir alang dungpo lapen HEMPHU kedo A-pehem achetai kedo alongle asap enpo lapen kepahodakji aphansi lang along la jokpo.

¹⁸Anke alangli bangpi achu pajirkrapsi arideng him aduk adan pipo. Alangli ari along kurusar ke ahirjuno kevan-i lang keho aharlung otdongpo.

¹⁹Anke bangpi aphan kurusar abang semepatangpo, “Nang jongsi beisa klemklelang pulote laso alang keho kevanji ahirjuno nangpaphophenang.

²⁰Bonta nang jongsi beisa klemtang-lo pulote,

²¹nangrat atum angbong HEMPHU le nangmen hirjuno paplang-lonang. Alangli nang kengtham pathuvoknang lapen nangbang pakang-onang;

²²la ahirjuno kevan alang nang harlung-heihei arlo padamnang, lapen nangbang pakang-onang, lapen nang kengtham pathuvoknang.” Lapen arloso abangta “Amen, Amen” pupo.

²³Anke kurusar abang lahei ahirjuno loh along tok-etpo, lapen lahei langkeho arlo cham-etpo;

²⁴lapen alangli la ahirjuno kevan alang keho bangpi aphan pajunpo, lapen ahirjuno kevan alang bangpi apok arlo dampo, lapen kehodak akeso paplangpo.

²⁵Anke kurusar abang arloso ari deng pen kelang-un-e sok-sang adan endetpo, lapen HEMPHU angno soksang adan hivikpo, lapen la dovan along vandetpo;

²⁶lapen sok-sang adan chekip isi enchomsi kechematha amar paplangpo, lapen la dovan athak phrinpo, la aphi arloso aphan lang pajunthupo.

²⁷Alangli bangpi aphan lang pajundet aphi, bangpi jongsi amethang chepasa-ur lo, lapen apenan aphan kroithipthe akam klemlo, ahirjuno kevan alang bangpi apok arlo lutsi hodak akeso vanpo, lapen bangpi abang kangpringpo, lapen bangpi akengtham thuvokpo, lapen bangpi ke arat atum angbong ahirjuno abang plangpo.

²⁸Bonta arloso jongsi amethang abang chepasa-ur-e, lapen ingthirvet, pulote bangpi jokpo, lapen aso chopathe longpo.

²⁹Lahelo kelang-un-e kepho alam, piso abang apenan abersi dolo seta, damtapvaret lapen amethang chepasa-urlo,

³⁰mate kelangselet akarjong inut amonit aputhak vang-lo lapen alangli apiso aphan langselet-lo; pulote alangli apiso aphan HEMPHU angno parjappo, lapen kurusar abang bangpi aphuthak laso aron pen klempo.

³¹Pinso abang akelet pen jokpo, bonta arloso abang amethang akelet cheparpupo.