Read Karbi KELAKHA 6 Bible Online

KELAKHA 6 - Karbi bible

KELAKHA 6

¹Moses aphan HEMPHU pulo,

²“Israel arat aphan thannon, mane apinso mate a-arloso jongsi kenangsot aseme, kepanong aseme, HEMPHU aphan chepaprekviji do pulote,

³alangli drakha ahorlang pen, arak ahor pen chepahelo nangji; alangli drakha alang-kethor lapen drakha alang ta junje detpo, lapen akecham tame akreng tame drakha choche detpo.

⁴Alangli chepaprekvitik apor an drakha pen keman ason an chochedetpo, achili seta ahu seta chochelo.”

⁵Alangli chepanongtik an aphu chesoilongle. Alangli HEMPHU aphan chehodaitik ke alangli seme abersi dover nangpo, lapen alangli chu lapen angmumta padingbom nangpo.

⁶“HEMPHU aphan kechepaprektik ke, alangli kethi arpum adung damdedetpo.

⁷Apo along tame, apei along tame, akorte mate angjir along tame, latum thilote, latum pen apot alangli chepangthirthe nangnelo; pima alangli Arnam aphan kechepaprek la ke alangli phu athak si dolo.

⁸Alangli chepaprektik ke alangli HEMPHU angno ingthir-et-lo.”

⁹Chepanong abang achu kangthir jongsi menmen kethi amonit adung kedo dunkok pen apot ingthirthe det-lo pulote alangli ni throksi inghong nangji anke alangli chu lapen angmum chesoi nangpo; lasonsi alangli aron ateng pen ingthir-etpo.

¹⁰Nerkep arni alangli vothung jonni mate thungpharlo jonni kurusar along HEMPHU kedo A-pehem amangho anat vanpo.

¹¹Kurusar abang ejon ke pap athok pipo, lapen ajon kaprek ke kephrin athok pipo, la ke aron atang pen chepangthir akam klempipo, pima langli kethi arpum pen chepateboktang-lo. Halaso arni amatsi alangli chu chepangthir-thumi nangpo,

¹²lapen alangli por HEMPHU aphan chehodai-thumisi chepanong nangpo. Aphrang apor an ke lakhakhe detpo, pima la kechehodai achu chepangthirthe-tang-lo. Adaiketu athok aphan alangli ningkan isi arta abiresak van-nangpo.

¹³Kepanong abang kechechak apor choktang-lote, alangli aron ateng cheklem nangpo. Alangli Pehem amangho along dampo,

¹⁴lapen HEMPHU aphan pi jonthom aju ave pin vanpo: ningkan isi abiresak aloso, la kephrin athok aphanlo, lapen pap athok aphan ningkan isi arta abiresak api, lapen biresak alo ejon la ke kejelang athok-lo.

¹⁵Alangli ton isi thap kavepin ahim dan pinangji: him karthat, aduk pen jit ajangthu kepangvui pen keselam ahim lapen jangthu kevit ahim, lapen abat sok-sang lapen drakha ahorlang athok van nanangji.

¹⁶Lahei kadokave kurusar abang HEMPHU aphan pajirpo lapen pap athok pen kephrin athok pipo.

¹⁷Biresak alo ke kejelang athok HEMPHU aphan pipo, lapen la hoton ahim pensi pirappetpo; alangli sok-sang lapen drakha ahorlang athokta pidunpo.

¹⁸Pehem amangho along kechepanong abang achu chesoipo lapen kejelang athok kephrin ame along phrindutpo.

¹⁹Biresak alo akengthak uptang-lote, kurusar abang la ponpo, lapen him karthat penpen birappetpo, hoton pen himkedok eplang enpo lapen ton pen himkedok eplang ensi kepanong abang arideng bi rappetpo.

²⁰Adunthu, kurusar abang lahei HEMPHU aphan isi akenangsot athok pipo; lahei ke kurusar aphan isi kangthir athok-lo, la abat aningthang lapen biresak akeng aron ateng penke kurusar apharmanlo. Laso aphi, kechepanong mate kechepaprek abang drakha ahorlang junme.

²¹Lahei helo kechepaparek abang-phan aron; bonta kechepanong abang jongsi alangli kepinangji adan apar kepiji chechak-lote, alangli kechechak atengthot chepinangji.

²²Moses aphan HEMPHU hukum pilo,

²³“Aaron lapen asomar atum Israel arat aphan ahirjume kepi ahut la aber ketokjir alam-heihei kepuji aphansi hukumpilo;

²⁴HEMPHU nangtum aphan nang pahirjume nang lapen nangpalana lonang;

²⁵HEMPHU nangtum aphan nangpanghon lonang lapen pajinso lonang;

²⁶HEMPHU nangtum aphan nangpalang lonang lapen ningkangsam nangpapi lonang.”

²⁷Lapen HEMPHU pulo, “Israel atum aphuthak ahirjume kehang ahut halatum Nemen parnolote, Ne halatum aphan ahirjume pipo.”