Read Karbi KELAKHA 8 Bible Online

KELAKHA 8 - Karbi bible

KELAKHA 8

¹Moses aphan HEMPHU pulo,

²“Aaron aphan punon, alangli melur-archok athak throksi amelur kebat ahut lasonsi alangli bat nangji melur an athengno anat ketur thekjile pabinang.”

³Aaron kroisi klemlo, melur archok angno anat pangnosi melur bilo.

⁴Atengri pen achelon anta melur-archok kethip aserlo, la Moses aphan HEMPHU kepaklang arjan ateng-lo.

⁵Moses aphan HEMPHU pulo,

⁶“Israel arat pen Levi atum aphan papreknon lapen

⁷latum aphan lasonle pangthirnon: kepangthir alang penle latum aphan pangthirnon lapen latum abang arpum achu angmi do-an pachesoijile lapen latum ape-ari pachechokjile thannon. Anke latum aron ateng pen ingthir-etpo.

⁸Anke latum chainong aloso ejon lapen sok-sang adan aphan kenangji jit ajangthu pen kepangvui ahim aduk ponpo, lapen nanglike pap athok aphan ajon kaprek achainong alo ponpo.

⁹Anke kedo-an Israel arat pangrumnon lapen Levi atum Ne kedo A-pehem athengnole parjapnon.

¹⁰Israel arat atum ke Levi atum aphuthak ari batpo,

¹¹lapen Aaron ke Israel atum pen isi kepanong adan asonsi Nephan Levi atum nehodaipo, anke latum Nekam klem-unpo.

¹²Anke Levi atum ari chainong alo jonni aputhak batpo; ejon ke pap athok aphan lapen ajon kaprek ke kephrin athok aphan, Levi atum aphan aron ateng pen kepangthir akam aphanlo.”

¹³Levi atum ke Nephan isi kepanong adan asonle nehodainon, lapen latum aphuthak kelangji aphan Aaron lapen asomar atum aphan batnon.

¹⁴Lasonle Levi atum aphan Israel kedo-an pen paprekvinon, anke latum Nemar plangpo.

¹⁵Levi atum aphan nang pangthir-et lapen hodai-et aphi anke latum Pehem along kam keklemji a-ot dopo.

¹⁶Israel aso akleng adimsi Ne latum aphan hang-lo, lapen latum Nemarsi plangchot nangji.

¹⁷Ijip adet asokleng an Ne kepathi ahut, Israel ahemtuntin Neso akleng-lo lapen pi kechingthokcheng Nemarlo pusi Ne pangthirtang-lo.

¹⁸Israel aso-akleng alar si Ne Levi atum aphan enlo,

¹⁹lapen Aaron lapen asomar atum arideng Ne Levi atum hodailo, Israel atum pen kepanong adan ason, Israel atum aphan Pehem along kam kepaklemji aphan lapen Israel atum Kangthir Adim latum adung kevang-ra latum kevir nangji pen keparai aphanlo.

²⁰La apotsi Moses, Aaron lapen Israel arat kedo-an atum Moses aphan HEMPHU hukum kepi ateng pen Levi atum hodailo.

²¹Levi atum amethang chepangthirlo lapen latum ape-ari chechok-lo, lapen Aaron latum aphan isi kepanong adan asonsi HEMPHU aphan hodailo. Alangli latum aphan aron ateng pen kepangthir akamta klemlo.

²²Levi atum aphuthak akam an Moses aphan HEMPHU hukum kepi ateng rat atum klem lo. Ansi Levi atum Pehem along Aaron lapen asomar atum aber kam keklemji a-ot dolo.

²³Moses aphan HEMPHU pulo,

²⁴“Ningkan ingkoirapho arta pen abangphutin a-Levi aso Ne kedo A-pehem along amethang akam adeng cheklempo,

²⁵lapen ningkan phokep arta lote latum kam pen jokpo.

²⁶Laso aphi alangli aninghangte akorte Levi atum aphan Pehem along halatum keklem nangji adeng akam cherapdun untahai, bonta amethang ke la thangnat akamta klem nangne. Lasonsi nangli Levi atum adeng akam paklem nangji.”