Read Karbi KELAKHA 9 Bible Online

KELAKHA 9 - Karbi bible

KELAKHA 9

¹Israel arat atum Ijip adet ke-otang hini aningkan kecheng achiklo Sinai asangti ajo Moses aphan HEMPHU pulo,

²“Athik apor ahut Israel arat atum Kejok Amei padonang.

³Laso achiklo krephli arni arnikangsam nang-tum la athik apor ahut padonangji; la aron lapen la kangsai-i aron ateng pen la padonangji.”

⁴Lasi rat atum aphan Kejok Amei kepadojisi Moses pulo,

⁵lapen Sinai asangti ajo kecheng achiklo krephli arni kangsam latum padolo. Rat atum Moses aphan HEMPHU hukum kepi ateng klemlo.

⁶Bonta hadak kedo angbong ajehak amonit atum aron ateng pen kangthirthe do pima latum kethi arpum otdet-lo, lapen halabangso arni latum Kejok Amei pado un-edet-lo. Latum Moses lapen Aaron along damlo,

⁷lapen pulo, “Nelitum ingthirthelo pima nelitum kethi arpum otdet-lo, bonta nelitum aphan kopi athesi Israel kedo-an arat pen HEMPHU aphan athok kepiji pen khangpoma?”

⁸Moses thak-lo, “Neli HEMPHU pen kepinkhat alam longletik inghongtha.”

⁹Moses aphan HEMPHU pulo,

¹⁰“Israel atum aphan thannon, nangtum angbong mane jongsi mate nangso-nangsu atum kethi arpum ke-ot pen ajok ingthirthelo mate heloving adim kedam pen ajok, bonta Kejok Amei kepadoji aninghang-lo pulote,

¹¹laso alar nangtum chiklo ejon aphi hini achiklo krephli arnikangsam talon unji. La thapkave ahim lapen han keho penle talonnon.

¹²Puthot adap an thangnat kecho asonta biri lapen pi arrepi ing-lok-ri. Aron atengle Kejok Amei talonnon.

¹³Bonta badutame aron ateng pen ingthir-et, lapen kehelo adim damde lapen Kejok Amei ta talonle, lason abangphan Nerat aso angbong inut-lo pu lakhakhelo pima alangli athik apor ahut Nephan dan Nepipelo. Alangli ke apap anam chechak nangkokpo.”

¹⁴“Nangtum angbong kedo bang adet aso Kejok Amei kepadoji aning hang-lo, aron atang ateng pen alangli la ke talonji aphan klemvek nangji.”

¹⁵HEMPHU kedo A-pehem keparjap arni HEMPHU kedo A-pehem athak inghun dip-lo, lapen arnikangsam pen adap an HEMPHU kedo A-pehem athak me ason nangklang-lo.

¹⁶Lasonsi dobomlo; anerlo ke inghunsi dip-lo, lapen ajo ke me si nangklang-lo.

¹⁷Inghun kechirung ahut, Israel arat atum mukam chephrilo, lapen inghun nangkesun adimsi latum puthot mukam chekimthupo.

¹⁸HEMPHU ahukum atengsi rat atum amukam chephrilo, lapen Alangli hukum atengsi latum mukam cheparjap-lo. Pehem athak inghun sa tik ke, latum amukam alongsi chedovetpo.

¹⁹Pehem athak inghun kesa ajirdingklui ahut, latum HEMPHU aphan kroilo lapen cheterek-relo.

²⁰Ahut pen ahut ke Pehem athak inghun kesa malomsonat, lason ahut seta latum mukam along kedo nangji mate kecheterek nangji, la HEMPHU ahukum atengsi klemlo.

²¹Ahut pen ahut ke arnikangsam pen ha adap ansi inghun sachot, lapen inghun kechirung lote latum kecheterek-lo. Inghun chirung-lote latum dampo.

²²La nini non, chiklo ejon non, ningkan isinon, mate la an sose non, Pehem athak inghun satik ke latum damdelo; bonta la chirung lote, latum dampo.

²³Latum mukam cheparjap lapen chephri, Moses aphan HEMPHU kepi ahukum aputhak kekroilo.