Read Karbi MIKAH 1 Bible Online

MIKAH 1 - Karbi bible

MIKAH 1

¹Judah arecho Jotham, Ahaz lapen Hezekiah atum arni ahut Moresheth asor Mikah along HEMPHU alam vang-lo, alangli Samaria lapen Jerusalem aputhak thek-long-lo.

²Arjutha, nangtum rat kedo-an; no chedennon, O pirthe, lapen la along kedo-an; Lapen HEMPHU Arnam nangtum aphuthak haki paplangnang HEMPHU Alangli Kardomhemthepi pen.

³Athe chininon, HEMPHU amethang Kangthir adim pen vangbomlo lapen nanghirpo lapen pirthe akangtui-heihei adim dongpo.

⁴Lapen inglong-heihei Alangli ber ingjirpo lapen arlok-heihei jo-ir me angno kangjir asonsi chinghangpo lang-heihei arleng ajo kedung asonsi dungpo.

⁵La kadokave Jakob apap apot-lo lapen Israel atum apap-heihei apot. Jakob apap kopi? La Samaria kalima? Lapen Judah ahem apap kopi? la Jerusalem kalima

⁶La apotsi Ne Samaria aphan isi thek-phrong abui adet pinchongpo isi drakha ke-e adim-heihei pinchongpo. Lapen arlok ajo la arlong-heihei Ne thokpo lapen la ahemthur dipdedetpo.

⁷La kumlin arje-heihei theng-let-let po la kerong ason an me pen pacho-etpo, lapen la akumlin-heihei Ne pangsamripo: Pima abang kechojor abang pen kerongsi la halatum aphan pangrumlo, lapen abang kechojor abang kerong anatsi halatum voithupo.

⁸La apotsi Ne ningduk lapen chiru ne pe chelumsi lapen reng angsesi dampo Sirung atum asonsi ne ningduk lapen Ostrik avo atum asonsi ningripo.

⁹Athe la reng-amek me un-elo; lapen la Judah along vang-lo, la Nerat aso anghap an nangletang-lo ha Jerusalem anat anta.

¹⁰La Gath angbong than rinon, asapta chiruri, Beth-le-aphrah angbong longle aduk along nangmethang kong-longnon.

¹¹Shaphir kedo atum reng-angsele, ketherak penle damnon; Zaanan kedo atum vangvedet-lo; Bethezel akechiru la karjap adim nangtum along pen pondetpo.

¹²Pima Maroth kedo atum akeme aphansi chonghongding-lo, athe HEMPHU pen Jerusalem anghap aphan kehingno hirtang-lo.

¹³Lakish kedo atum ronhemkonglong-heihei alosei along ok-reng arvaknon; Zaion asopi aphan nanghelo chopap cheng abang pima Israel apap-heihei nanglongsi long-lo.

¹⁴La apotsi nang More-sheth-gath aphan kechekak adan-heihei pipo: Akzib ahem-heihei Israel arecho atum aphan isi chobeichot plangpo.

¹⁵Mareshah kedo atum nangphan kehaidet abang Ne puthot vangthupo; Israel adak atur Adullam along an vangpo.

¹⁶Nangning kehang asomar aphan nangtum methang phukoi cheplangnon lapen nangchu chesoi-etnon. Vo takun asonle nangtum methang phukoijoinon, pima halatum nangtum pen bang adet pondetpo.