Read Karbi MIKAH 2 Bible Online

MIKAH 2 - Karbi bible

MIKAH 2

¹Kehingno keklemji kemang atum Lapen ahongplang-heihei athak kehingno akam keklem atum paphonang! Adap kangthang ahut latum la klemlo, athe lake latum arideng kedo ajakong-lo.

²Latum hidi-heihei kelongji aphan aninghangpik lapen longletik latum aphi hung-lo; lapen ahem-heihei latum en bor-i-det; Halatum amonit lapen la ahem abangphu aphan lapen apoton aphan akejok ave.

³La apotsi HEMPHU lasonsi pulo: Chininon, labangso ahem aputhak Ne kehingno mang-lo, La pen nangchethok-heihei chephlok un-elo; Lapen nang cheparoka pen dam nangnelo, pima la isi kehingno ahut plangpo.

⁴Halabangso arni latum nangphan isi kepinrem alun lunpo, lapen aningkeduk hodak pen chirupo, lapen pupo, “Netum ru-et khangjang-lo, alangli nerat apharman larlo; la kopusonsi ne pen phloktang-lo! Netum aphan ban kepon atum angbong la netum ahidi-heihei thak-lo.”

⁵La apotsi HEMPHU asong along khadot kepathuji aphan ang-ang kevar abang avelo.

⁶“Than pachethangri” pusi halatum pachethang-lo- “jokta lason pachethang nangne; kelangrem netum aphuthak vangvelo.”

⁷Lason punangjima, O Jakob ahem? HEMPHU Akarjong chepaningding un-ema? Lahei alanglitong klemloma? Athikpet pen kengkam kechejor abang aphan nelam akeme klempipema?

⁸Bonta isi ahotur asonsi nangtum nerat abe thurlo; nang kangsamjin atum aphan pe oilo, ron mathathe pin kekroi pensi tovar kedam atum aphanta klemlo.

⁹Nangtum Nerat a-arlosomar atum aphan halatum do rengmejir ahem-heihei pen phlung-lo; nangtum kaike aphan halatum a-osomar pen Ne nong pondet-lo.

¹⁰Thurnon lapen damnon, Pima la ke kesang adim kali; athe kangthirthe apotsi isi kepavirklung pensi pavirlo.

¹¹Mane abang jongsi damra lapen tomon angbong hang lapen chobeisi pupo, “Ne nangtum aphan hor lapen arak pachethangpo,” labangsi bangso arat pachethangbang cheplangpo!

¹²O Jakob, Ne chenamsi nangtum aphan pangrumpo, Ne Israel atum ahin pangrumpo; arai kedo abiresak atum asonsi ne halatum aphan chopan adim angbong pi ahur asonsi monit hangjo armu pinchongpo.

¹³Komatma kephri-kangpu abang aphrang halatum dungpo; halatum ing-loksi lapen inghap lutpo la pen ajoksi chedamthupo. HEMPHU halatum aphan jalinsi halatum arecho halatum aphrang dampo.