Read Karbi MIKAH 4 Bible Online

MIKAH 4 - Karbi bible

MIKAH 4

¹Mo aphi arni lahei plangvekpo HEMPHU ahem anglong kangtuinei anglong-heihei asonsi pathirpo; lapen inglongso-heihei apar rung pangtui muchotpo; lapen rat atum la along dampetpo,

²lapen adung adet atum vangpo, lapen pupo: “Vangnon, HEMPHU anglong anat etum arludam lonang. Jakob ahem a-Arnam anat; Alangli etum aphan tovar-heihei ethanji mene lapen etum Alangli atovar-heihei along kengkam chejor dun thekji mene.” Pima Zaion pensi aron dampo, lapen HEMPHU alam Jerusalem pen dampo.

³Alangli ongdung arat-heihei angbong ingsaipo lapen akehelo adet kangtang-heihei aphan pharpo lapen halatum anokjir-heihei thengsi halatum alangnoi aphal lapen halatum achir-heihei arhi selampo. Det atum nokjir rungsi det abe thurthelo, halatum ron chinine detpo.

⁴Bonta halatum anut-tin ta amethang drakha aberi arum lapen amethang athebo arumsi ingnipo lapen baduta halatum aphan paphererelo; pima muluk a-HEMPHU angho pensi ningjelo.

⁵Pima rat kedo-an la amethang a-arnam amen pensi kengkam chejorpo bonta etum ke HEMPHU etum a-Arnam amen pensi kaike apar kaike anta kengkam chejor lonang.

⁶Halabangso arni, HEMPHU pulo, Ne kengkok pangrumji lapen kephlungtang atum lapen Ne kepasungtang atum aphan pangrumpo;

⁷lapen kengkok Ne ahin arat lapen kevarchor atum isi jakong kethe adet pinchongpo; lapen Zaion anglong along HEMPHU halatum aphuthak non pen kaike apar akai anta recho chopo.

⁸Lapen nang O pi ahur hemtap kangtui, Zaion asopi anglongso, nanglong la vangpo, aphrang kepangri ajakong vangpo, Jerusalem asopi recho arat.

⁹Non nang kopi apotsi kehang ase patheloma? Nangtum angbong recho avema? Nangtum kepare abang vir-et ma, lasi aso mahang kepathek a-arloso kesung asonsi kesung nangphi phi dunloma!

¹⁰Inut oso mahang kepathek a-arloso ason, chardak-ra lapen ingrongnon O Zaion asopi; pima non nang rongsopi pen damnangpo lapen rit-lo-si donangji nang Bebilon dam nangpo. Hadak nangphan pajokpo hadak HEMPHU-si nang hotur arideng-heihei pen nangphan nang pajokpo.

¹¹Non ongdung adet atum chingrumsi nangbe thursi pulo, “La pangthirthenang; lapen etum amek Zaion aphuthak-le lang-lor lonang.”

¹²Bonta halatum HEMPHU akematha-heihei chinine, latum Alangli kemang ason chini dunde Alangli latum aphan sok keti adim sok apeng-heihei pangrumtang-lo.

¹³Thurnon lapen sok sinon, O Zaion asopi, pima Ne nangnu ingchin pinchongpo lapen nangkeng kemo ingchin-ke-er top-po; Ongdung arat-heihei aphan pangjepo, lapen halatum ale HEMPHU aphansi panongpo, latum akhi pirthe adang Ahemphu aphansi panongpo.