Read Karbi MIKAH 7 Bible Online

MIKAH 7 - Karbi bible

MIKAH 7

¹Ne paphonang, pima ne barla athesere kepangrum ahut ason, Drakha athe keherek ahut ason plangtang-lo: Thesere abitung kechoji aphan ave.

²Pirthe pen kekroi thirklong atum virtang-lo, lapen monit atum angbong athikpet abang ave; halatum pachobei petsi vi kepabuji aphan inghongding, lapen anut-tin alan pen akorte aphan ridam.

³Halatum hingno akam keklemjisi ari pen la otthip; rechoso lapen kangsai kehingno aning kehang alam hangser; lasonsi halatum la thak rappet.

⁴Halatum angbong mane abang ingsu top-het abap ason; halatum angbong athikpetnei abang ingsu arong aren ason, Halatum kehon atum aphan aduk kepi arni nangletang-lo; halatum manghudappo.

⁵Nangdung aphan chikiri, jirpo aphan ning chetheri; nanglong ke-i charbak abangpi pen nangho anghap-heihei chingkirnon;

⁶Pima asopo apo aphan langropsi lang-lo, asopi la apei abe thurlo, amunpi anipi abe thurlo; monit ahotur amethang ahem asangho atum thurpo.

⁷Bonta neke ne HEMPHU aphansi cholangpo, Ne ne kepajok Arnam aphansi chonghongpo; Ne Arnam ne arjupo.

⁸Ne phuthak nang chehok-ri, O ne hotur atum, Ne chingkoi seta Ne thurthuji; Ne kangting ajo ingni, HEMPHU nephan isi kethe-ang plangpo.

⁹Pima ne Alangli be thursi pap keklem apot Alangli nephan nehang pipetik lapen nephan ingsai pipetik an HEMPHU jasemet aningkethi ne chechakji. Alangli kethe-ang anat ne vangpo; Ne Alangli kepajok thek-longpo.

¹⁰Ansi ne hotur atum thek-longpo, lapen “HEMPHU nang Arnam konat-lo?” pu kepu abangphan ketheraksi dip-hetpo, ne mek la aphuthak meng po; non tovar-heihei anghan asonsi laphan donglam-lam po.

¹¹Arnisi nang paisong-heihei kekimji aphan halabangso arni ahoi pakamdetpo.

¹²Halabangso arni Assiria pen Ijip anta, lapen Ijip pen ha langroi an, talo pen talo an lapen inglong pen inglong an halatum nanglong vangpo.

¹³Bonta pirthe pangsamripo, pima ladak kedo halatum kechoklem athe apot-lo.

¹⁴Nangchin pen nangrat vinon, nang poton ahurlo, Mir aberi alongle angbong inutpet ingnam ajo kedo abang; hako ahut asonle halatum Bashan adet lapen Gilead adet pachopan nang.

¹⁵Ijip adet pen nangtum nangkebar arni ahut ason Ne halatum aphan manghumeme akam-heihei paklangpo.

¹⁶Det-heihei atum ajakong the-o seta thek-longsi therakpo; latum ari-heihei angho-heihei athak chebatpo; lapen latum ano-heihei ingthongpo.

¹⁷Pherui asonsi latum longle aduk inglekpo, keklimjam pirthe api atum asonpo; latum a-ok klemhursi akut-heihei pen latum nangbarlo, latum HEMPHU etum Arnam anat pherepiksi chetevarpo, lapen nang pen apot latum pherepo.

¹⁸Nangson kehingno adai kediya lapen alangli apoton ahin kedolang atum aron kangdi ado kelangle a-Arnam komat dolang? Pima Alangli kaike kedover akanghon kepaklangji aning dokpik apotsi Alangli ning thiverve.

¹⁹Alangli puthot etum aphan ingjinso thupo, etum kehingno adai-heihei akengber donglam lampo, etum apap do-an talo arlo Alangli varchorpo.

²⁰Hako ahut pen phusar atum aphan alangli kechak asonsi, Alangli Jakob aphan kekroi thirklong lapen Abraham aphan larle akanghon paklangpo.