Read Karbi HABAKKUK 1 Bible Online

HABAKKUK 1 - Karbi bible

HABAKKUK 1

¹Habakkuk montri aphan HEMPHU kepaklang abirta la helo.

²O HEMPHU, ko-ansi kerap aphan ne chiru nangji, lapen Nang ne arjujebom jilangma? Mate Nangnat chirupo, “Phangnotang-lo!” pu lapen Nang pajokjedetjima?

³Nang kopi athesi nephan kechokche-heihei pathek-longbom langma lapen kesung aputhak palangbomma? Kevir lapen kephangno ne ingno dolo; kechebohong lapen kechedan thurlo.

⁴La apotsi aron ajakong ave lapen ahok-akangsai kaita aphrang damde. Athe kehingno atum athikpet atum aphan komchen, la apotsi ahok akangsai kekdangsi dambomlo.

⁵Det-heihei angbong langtha, lapen langnon; Manghura lapen chepamanghu-haknon. Pima nangtum adin Ne eson akam klempo anke nangthan setta nangtum kroikredetpo.

⁶Pima chininon, Ne Chaldia atum aphan paprungji anke hodak lapen prappik akhei amethang kalidet ahem kethi ponjisi latum pirthe arpan an damdet-lo.

⁷Pherememepik lapen paphere thekpik atumlo; latum ahok-akangsai lapen ahok anam latum methang pensi barlo,

⁸Latum alosei-heihei bongkruiso apar prapmu, arnikangsam amahar apar aning sedenglang; latum alosei kardon atum un-an pangplong-lo. Kalang, latum alosei kardon atum kehelo pensi kevang vomu ejon kangchir pen kechoji asonsi latum ingjarlo.

⁹Latum kedo-an kephangnojisi kevang; latum akepherememe latum aphrang si damlo. Sangti ason thak-thaksi latum ne pangrumlo.

¹⁰Recho atum aphan latum pinrem lapen det kechari atum aphan pathilo, latum rong apaisong asitin ingnekchoilo, pima latum longle buisi endetpo.

¹¹Ansi latum tomon asonsi arkok-lo lapen dambomlo, ado kedo amonit, la amethang ajakong helo latum a-arnamlo!

¹²Nang hako ahut pen dolang kalima, O HEMPHU ne Arnam, Kangthir Abang? Netum thithe. O HEMPHU, Nang latum aphan kangsaijisi pathiktang-lo; lapen nang, O Arlong, aduk-kepijisi latum aphan pavirtang-lo.

¹³Kehingno aphan kelang apar Nang aju-kavepin amek-heihei kedo Abang lapen kechokche ason langle Abang, Kopi athesi Nang kekroi-kave amonit aphuthak kelangdingma? lapen alangpar athikmuchot amonit aphan jat-langno atum kejoi ahut Nang kedojoilangma?

¹⁴Pima talo alang-ok asonsi monit aphan paplang-lo, lapen kepangri abang kavedet keklimjam api ason thak-thak.

¹⁵La isi arhi pen latum do-an vanlo, alang alanvar pen latum aphan sanlo, alang alanjeng pen latum aphan pangrumlo; la apotsi alang chehoksi aning arong chepilo.

¹⁶La apotsi alang alanvar aphan arkli, lapen alang alanjeng aputhak mephik thor; Pima lahei pen ajok la kerengme pen reng-lo lapen alang kecho ahormuta ongdung.

¹⁷Tangte alang alanvar herekversi do poma, lapen det-heihei aphan inghonhesi kaiketa pathibompoma?