Read Karbi HABAKKUK 2 Bible Online

HABAKKUK 2 - Karbi bible

HABAKKUK 2

¹Ne kehon adimsi karjap, lapen paisong kangtui athak Nemethang dopo, lapen Alangli nephan pi pujima chonghongdingsi cholangpo lapen ne kekhinde aputhak ne kopisi kethak nangji.

²Lapen HEMPHU nephan thak-lo; “Kethek-long an toknon; longle aplang athak paklangdaknon lasi keporhe abang prapjin pen porhe thekpo.

³Pima kethek-long alam keklangji ahut chonghonglang; Kejut an la prapjin je, la chobeibe. Jongsi la inglenhui lote laphan inghongnon; la vangvekji, la derdelo.

⁴Chininon, athik ave abang akarjong along chunchedetji, bonta athikpet abang alang akekroithip pen ajok rengji.”

⁵Lapuchot kali, horlang kepacherei abang; kecheparoka abang doverve. La aning kehang kethe chom angkang kethe ason; kethile kaita dorlo pupe ason. La amethang aphan det do-an pangrum, lapen methang arat asonsi kedo-an chopangrum.

⁶La kadokave ensi alang be latum thursi pinremredet poma, alangphan chongthuisi ingnekchoiche detpoma, lapen pupo, “Paphonang, amethang amar kalidet pen mar chepa-ong abang athe ko-an ajirdingjima? lapen preng papi bor-i pen chepaplang bomjima?”

⁷Nang keparam atum menmen thurthejima. lapen amek keprang abang nang ok paklemhurpo kalima? Anke nang latum kethipon amar plangpo.

⁸Nang ongdungsi adet amar kethipon apot ahin kedolang atum an nangmar thiponpo pima monit avi lapen pirthe, lapen rongsopi-heihei lapen hadak kedo-an aphan phangnolo.

⁹Paphonang! amethang ahem aphan kehingno pen kepalong abang kehingno kepho pen kejokjisi amethang atar angsongsi chepatarlo!

¹⁰Nang methang ahem aphan ketherak pinchong-lo ongdung arat atum aphan kepavir pen ajok nang nangmethang akai aphan chepasung-lo.

¹¹Pima arpong pen arlong hangserpo, lapen archok athengpita thengpi angbong pen thakpo.

¹²Paphonang! Vi pen rongsopi kekim abang, lapen akehingno akam pen rongsopi keseng abang!

¹³Chininon, la muluk a-HEMPHU pen kalima anke rat atum komat aphansi chepadukchot, lapen khei-heihei atum thang kalidet aphan chepalak?

¹⁴Pima lang-heihei talo keplengset ason, pirthe HEMPHU adak atur akechinithek pensi plengsetpo.

¹⁵Paphonang! bangso abang, la ketherak kelangjisi aning kesedeng aharlung pen pajunsi tebok abang aphan hor pangri.

¹⁶Nangdak nangtur alar bang nanglangrop pensi nang donangpo. Nang junra therak-non! HEMPHU ari ar-e aharlung nangdung vangpo lapen nangdak nangtur aputhak ketherak vangpo!

¹⁷Lebanon aputhak kephangnotang apot nangphan pavirpo, marat api kepavir apot nangphanta pavirpo. Pima monit avi lapen pirthe aphan rongsopi-heihei lapen la kedo-an aphan kephangno apot.

¹⁸Isi akumlin, la keselam abang soi seta isi kepachor arje, inut chobei kethan abang pen ale kopi? Pima alam kave akumlin keselamchot abang la aphan kechiki athe kopi?

¹⁹Thengpi ahormu aphan mek prangnon pu, lapen alam kave a-arlong aphan thurnon pu abang paphonang! La paklang thekjima? Chininon, la ser-rup pen ketop lapen la arlo asapta achethe ave.

²⁰Bonta HEMPHU ke amethang kangthir kardom ahem arlosi kedo; pirthe adang Alangli ingno padoklipnang.