Read Karbi ZEPHANIAH 1 Bible Online

ZEPHANIAH 1 - Karbi bible

ZEPHANIAH 1

¹Amon asopo Josiah, Judah arecho ahut Hezekiah asopo Amariah, la asopo Gedaliah, la asopo Kushi, la asopo Jephaniah along HEMPHU ase vang-lo.

²Ne pirthe athak pen kadokave amar an pavirkoipo; pusi HEMPHU pulo.

³Ne monit lapen pi pavedetpo; Ne tomon avo-heihei lapen talo alang a-okta pavedetpo. Ne kehingno paremdetpo; Ne pirthe athak pen monit pavir-etpo pusi HEMPHU pulo.

⁴Ne Judah abethursi neri chirungpo, lapen Jerusalem asor abeta thurpo; lapen bangso adim pen Baal aphan karcho akurusar atum lapen akumlin-heihei pavir-etpo.

⁵Hem asarnung athak pen sining achiklopi, arni, chiklolongso-heihei aphan kardomkhrup atum; kardom lapen HEMPHU amen pen seme ketang atum lapen Molek amen pen seme ketang atumta virkoipo.

⁶HEMPHU aphi phi kedun pen keche-o atum lapen HEMPHU aphan kerire atum mate Alangli se karjuje atum an aphanta pavirpo.

⁷HEMPHU Arnam angno doklipnon! Pima HEMPHU arni tebok-het-lo; HEMPHU se karkli athok pathiktang-lo, lapen Alangli alohi pangthirtang-lo.

⁸Lapen HEMPHU se karkli athok arni kam kechepahemphu lapen recho asomar aphan Ne aduk piji, lapen bang adet ape kechingchoi aphan ta lo.

⁹Halabangso arni hongthu athak kechon abangphutin aphan Ne aduk pipo. Halatum ahemphu ahem kehingno ajakong akam lapen chobei pen paplengset atum aphan ta lo.

¹⁰HEMPHU pulo, halabangso arni lang-ok anghap pen kehang ase arjulongpo, adun ahem pen keru arki thedung vangpo.

¹¹Chiru-charnapnon, O rongsopi aber kedo atum: pima kadokave kejor-kelang atum vir-et-lo, rup kelin atumta virtang-lo.

¹²Halabangso ahut Ne melur-heihei pen Jerusalem aphan ripo, lapen halatum ahor alingtai apo kecheparthat aning kedok atum lapen aning arlo HEMPHU ke keme kehingnota klemkle pu kepu atum an aphan Ne aduk piji.

¹³Halatum amar-atar thi-etpo, lapen hem do-an donodakpo. Halatum ahem chekim seta chedo longledetpo; Halatum drakha aberi e-po seta drakha alang jun longledetpo.

¹⁴HEMPHU thedung arni tebok-het-lo, tebok-het lapen paprapbomlo; HEMPHU arni ase ke hodak Nokbe hodak ase aningkethi pen chirulo.

¹⁵Halaso arni ke aningkethi arni, sungpik lapen ningdukpik arni, kephangno lapen kevir arni kangting lapen ningkethethe arni, Inghun lapen klolin arni.

¹⁶Apaisong kedo arongsopi-heihei lapen hem kangtui abe kethurjisi pong-ut arki lapen ron kechedan arki kedo arni plangpo.

¹⁷Ne monit aphan kesung vanpo, anke halatum amek kave asonsi kengkam chejorpo, athe halatum HEMPHU abe thursi pap klemlo; halatum avi longle aduk asonsi dung-etpo, lapen halatum a-ok hi ason, HEMPHU aningkethi arni plangpo.

¹⁸Halatum arup tame aser tame halatum aphan pajok un-elo, Alangli kelang un-e aningkethi ame pen pirthe adang an pacho-etpo. Pajutdetpo, la men-men amat pajutdetpo la pirthe athak kedo-an atum aphan klempo.