Read Karbi ZEPHANIAH 3 Bible Online

ZEPHANIAH 3 - Karbi bible

ZEPHANIAH 3

¹Abe kethurkhrap lapen kangthirthe abang, kechenek-ot arongsopi!

²La bang alam arjujelo, la bang kepakeng dengdelo. Ne HEMPHU aphan chikikelo, la a-Arnam adung patebokbelo.

³La angbong kam keklempi atum kangrong ateke atumlo; la kangsai atum ke arnikangsam amahar atumlo latum adap an aphan thangta bibelo,

⁴La amontri atum adeng kechinine atumlo, akekroi kave amonit atumlo. La akurusar atum kangthir ason, seta ingthirthelo, halatum aron jakong pen ingdilo.

⁵HEMPHU la angbong chok-lim, Alangli kechokche klemkle, Adapprangta Alangli ahokpet paklang-lo. Arni keklang aphongtinta Alangli chinipamelo; Bonta ahok-he atum ketherak chinine.

⁶“Ne det-heihei pavedet-lo; halatum apaisong rutang-lo; Ne halatum atovar-heihei baduta dam abang pavedet-an phangnolo; latum arongsopi-heihei rongman paplang-lo, inutnatta ave, edonbakta kedo abang ave.”

⁷Ne pulo, “Chenamsi la nephan pherepo, labangpi kepakeng alam deng-lo; latum ne kethan ason an tengnenedetpo bangpi Nehukum kepi ason an langkrangkre detpo bonta kehingno akam latum keklem pa-ongmuchotjisi aninghang-lo.”

⁸Asap inghongtha, pusi HEMPHU pulo, “Ne det atum lapen methang arat atum aphan haki kepiji arni aphan inghongtha, lahei pen ajok halatum aphuthak Nening kethi plengsetpo. Nening kethi pen la pirthe adang an me pen pavirdetpo.”

⁹Anke Ne det kedo an arat atum aphan larpo, lapen latum Nephansi ardomchotpo, lapen akaprek arnam-heihei atum aphan kalilo. Latum kedo-an Nephan kroipo.

¹⁰Kehelo Sudan kedo kepratsei Nerat aso atum Nephan dan-heihei vanpo.

¹¹Halaso ahut, nang Nerat aso atum Nebe kethur apot therakjok phlotpo. Kechepindak lapen kecheparoka abangphutin aphan Ne terek phlotpo, la pen ajok nangtum Ne inglong kangthir along nebe thurkrapkrelo.

¹²Ne hadak asotdut lapen chepabihek arat aphansi padochotpo, latum ke Nelong kerap kelongji aphansi vangpo.

¹³Israel arat kerenglang atum lahin-lahin kehingno akam klemkledetpo, chobeibedetpo lapen pachoreire-detpo. Latum chingthurji lapen jokvanji, badu aphanta phereredetpo.

¹⁴Asekethe pen lunnon, O Zaion asopi; hangnon O Israel! Chehok-ra lapen nang kedo-an pen nangning arong chepinon O Jerusalem asopi!

¹⁵HEMPHU nang pen kangsaiji pachehelo-tang-lo; Alangli nang hotur-heihei arphlung-lo. Israel arecho, HEMPHU nang angbong dolo, nang puthot kehingno phere nangnelo.

¹⁶Halabangso arni Jerusalem aphan lason pupo, “Phere nangne, O Zaion; Nang ri jakong pavebom nangne.

¹⁷HEMPHU, nang Arnam nang angbongsi do, inut kechedan abang, la nangpahai longji; Alangli kanghon pen nangliphan chethe pamithupo, Asekethe alun pen Alangli nangphuthak ning cheparongpo.

¹⁸Kecho-kejun arni ason.” “Ne nang pen kesung pakakpo lasi nang laso pen ajok kepinrem chechak nangnelo.”

¹⁹Chinitha, halabangso ahut Ne nangtum aphan kechenek atum an aphan keklem nangji akam klemvekpo. Lapen kengkok atum aphan pajokpo lapen karphlungtang atum aphan pangrumpo, lapen Ne halatum aketherak kechoro anat paprekji lapen pirthe adang an anong thepo.

²⁰Halabangso ahut hem Ne nangvanthupo, Halabangso arni Ne nangpangrumpet ahut; ahok, Ne nangtum anong pathepo lapen kechoro paplangpo Ne nangtum akopai-heihei pirthe arat atum angbong kechevangthu ahut nangtum amek angden pachingthurthuji, pusi HEMPHU pulo.