Read Karbi HAGGAI 2 Bible Online

HAGGAI 2 - Karbi bible

HAGGAI 2

¹Throksi achiklo, ingkoira isi arni HEMPHU alam Haggai montri pen ajok vang-lo,

²“Shealtiel asopo, Judah a-Govornor Jerubbabel lapen Jehozadak asopo Joshua kurusarpo, lapen kedo-an arat atum aphan punon,

³‘Bangso ahem aphrang ahir asang kethek-long abang nangtum angbong mane doma? Non nangtum la kosonsi kethek-long? Nangtum amek angden thangta kali ason, kalima?

⁴Seta non ning chepathenon, O Jehozadak asopo Joshua, kurusarpo, ning chepathenon, kedo-an arat atum HEMPHU-si kepulo; klemnon, athe Ne nangtum along dolo, muluk a-HEMPHU-si kepulo.

⁵Ijip pen nangtum kevang ahut Ne nangtum aphan kechechak ateng, Ne Karjong nangtum angbong doklung-lo; phererinon.

⁶Athe lasonsi muluk a-HEMPHU pulo: Puthot malomso aphan Ne sining lapen pirthe hijukpo lapen talo, longle,

⁷lapen khei kedo-an Ne hijukpo; anke khei kedo-an akhi vangpo, lapen labangso ahem ahir-asang pen Ne paplengsetpo, pusi muluk a-HEMPHU pulo.

⁸Rup lapen serta Ne marlo pusi muluk a-HEMPHU pulo.

⁹Bangso ahem ahir-asang aphrang apar aphi abang themuchotpo pusi muluk a-HEMPHU pulo, lapen bangso adim paplangpo, pusi muluk a-HEMPHU pulo.’”

¹⁰Sirkep achiklo, 24 arni, Darias recho-kecho hini aningkan HEMPHU alam Haggai montri pen ajok vangsi pulo.

¹¹“Lasonsi muluk a-HEMPHU pulo: Labangso akarcho alam kepharjile kurusar atum pen arjunon,

¹²Mane abang jongsi Sator ade kepanong a-ok kepon abang a-Sator ade pen him mate han mate kecho ason alingle ot lote la ingthirpoma?” Kurusar atum thak-lo, “Kali.”

¹³Ansi Haggai pulo, “Mane abang jongsi kethitang arpum-heihei ason ke-ot ajok ingthirthedet-tang-lo, la inghthirthe cheplang poma?” Kurusar atum thak-lo, “La ingthirthe cheplang-lo.”

¹⁴Ansi Haggai pulo, “Lason helo bangso arat atumta, lapen Ne ingno bangso akhei atumta lo, la HEMPHU-si kepulo, lapen latum ari akam an lason thakthak-lo, lapen latum kepajir amar anta ingthirthelo.”

¹⁵Non ardomnon, non pen anpar kopi plangjima la mathanon. HEMPHU a-Kardomhemthepi arlong aputhak arlong pangnine aphrang,

¹⁶kosonsi nangtum atovar chelang-loma? Halabangso ahut inut abang sok mon 20 abui along damlote hadak mon 10 dochotpo, lapen inut abang mon 50 adrakha alang sokpo pura drakha kesor adim damlote mon 20 dochotpo.

¹⁷Ne nangtum asok pathi-khrailo lapen prisam pen pavirlo lapen nangtum ari akam an herai pen phangnolo. Tebonseta nangtum Ne long chevoi thuthe pusi HEMPHU pulo.

¹⁸Labangso arni pen apar matha-enon, sirkep achiklo, 24 arni pen. HEMPHU kardomhemthepi ahemthur kekim arni pen matha-enon:

¹⁹Sok-chili puru arlo dolangma? Drakha arikang, thebo arong, dalim arong lapen jit arong athe pathethebom langma? Pini pen apar Ne nangtum aphuthak ahirjume nangpipo.

²⁰Isivet achiklo, 24 arni HEMPHU alam puthot batai hini aphong Haggai along vangthusi pulo,

²¹Judah a-Govornor Jerubbabel aphan lasonle punon, “Ne Sining lapen pirthe hijukji dokdok-lo,

²²Lapen Ne det-heihei arecho anghoi vardetpo; lapen det atum rat ajakong pavirji dokdok-lo, lapen ron kechedan alosei ahemkonglong-heihei lapen lahei kardon atum an lapen losei an lapen la kardon atum an ari asangho anokjir pen abangphutin klichepo.

²³Halabangso arni muluk a-Hemphu-si pulo. Ne nangtum aphan nangponpo, O Jerubbabel, Ne ban, nang Shealtiel asopo, HEMPHU-si kepulo, lapen Ne sap ketheng arnan ben ason nangpinchongpo, pima Ne nang ingvaitang-lo pusi muluk a-HEMPHU pulo.”