Read Karbi ZEKARIAH 1 Bible Online

ZEKARIAH 1 - Karbi bible

ZEKARIAH 1

¹Darias recho kecho hini aningkan nerkep achiklo, Berekiah asopo mate Iddo asupo Jekariah montri along HEMPHU ase vangsi pulo,

²“Rat aphan kepathanjisi Jekariah aphan pulo: nangtum aphusar atum aphan Jakongkethe HEMPHU aning thipik-lo.

³La apotsi nang halatum aphan punon, Muluk a-HEMPHU lasonsi pulo: Nelong nang chiruihurnon, pusi muluk a-HEMPHU pulo, lapen Neta nangtum along vangthupo pusi muluk a-HEMPHU pulo.

⁴Nangphusar atum ason cheplangri, aphrang amontri atum halatum aphan hang-olo, ‘Muluk a-HEMPHU lasonsi pulo, nangtum kehingno atovar lapen kehingno akam pen che-onon.’ Bonta halatum ano chedende mate ne arjuje, pusi HEMPHU pulo

⁵Nangphusar atum, halatum konatsi do? Lapen montri atum, halatum kaike aphan rengverloma?

⁶Bonta Ne Neban atum atheke Ne montri atum aphan kepitekang alam lapen Ne keparaitang aron-heihei halatum, nangphusar atum chekok-kedet loma? Lasi halatum aning chiruilo lapen pulo, muluk a-HEMPHU etum atovar-heihei lapen akam-heihei keklemji kematha asonthotsi Alangli etum aphan klemtang-lo.”

⁷Darias recho kecho hini aningkan Shebat, kre-isi achiklo, niphai 24 arni, HEMPHU ase Iddo asopo Berekiah, asopo Jekariah montri along vangsi pulo,

⁸“Ne ajosi thek-long-lo, lapen chininon, inut amontri losei ake-ang ardonlo! Alangli mir-herai arong-heihei angbong arjapdingsi do, lapen Alangli nung anat losei ke-ang erring lapen losei kelok ta do.”

⁹Ansi ne pulo, “Lahei kopilo?” Nelipen kechingki apherangke neliphan pulo, “Lahei kopi piloma, neli nangliphan nang paklangpo.”

¹⁰Lasi mir-herai arong-heihei angbong karjapding abang neliphan thak-lo, “HEMPHU la-heihei pirthe kepalangtoi atumlo.”

¹¹Lapen halatum mir-herai arong-heihei angbong karjapding HEMPHU apherangke aphan pulo, “Netum pirthe lang-et-lo, lapen chini iktha, kadokave pirthe adang ing-samri pensi dolo.”

¹²Lapen HEMPHU apherangke pulo, “O muluk a-HEMPHU, ni ko-ansi Nangli Jerusalem lapen Judah arongsopi-heihei aputhak jinsosedet poma, lahei aphan Nangli ningkethi ningkan throksi kep dotang-lo?”

¹³Lapen nelipen kechingki apherangke aphan HEMPHU kangjinso lapen lamdok pen thak-lo.

¹⁴Lasi neliphan kechingki apherangke neliphan pulo, “Ase pathera hangnon, muluk a-HEMPHU lasonsi pulo; Ne Jerusalem aphan lapen Zaion aphan ningdukpik-lo.

¹⁵Lapen dorengme adet atum aphan neningthilo; pima Ne chersosi ningthichot bonta halatum an sose Ne monit atum aphan phangnolo.

¹⁶La apotsi, HEMPHU lasonsi pulo, Ne kangjinso pensi Jerusalem anat chevoithulo, Hadak Ne hemthepi kimpo pusi muluk a-HEMPHU pulo, lapen kepun-i arri Jerusalem aputhak hingdetpo.

¹⁷Ase pathera hangthunon, muluk a-HEMPHU lasonsi pulo: Ne rong-sopi-heihei puthot keplang-kephi pensi paplengsetpo, lapen HEMPHU Zaion aning pangsampo, lapen Jerusalem aphan ingvaithupo.”

¹⁸Neli ingphun chingthursi lang-lo lapen thek-long-lo, lapen chini iktha, anu hongphli dolo!

¹⁹Lapen neli nelipen kechingki apherangke aphan pulo, “Lahei kopilo?” Lapen alangli nethak-lo, “Lahei anu-ke Judah, Israel lapen Jerusalem aphan kepapratsei atum lo.”

²⁰Ansi HEMPHU neliphan banghini ahemai paklang-lo.

²¹Lapen neli pulo, “Lahei atum kopi keklemjisi kevang-lo?” Alangli thak-lo lahei anu-ke Judah atum aphan kepapratsei atumlo, lapen ajok badu amonit ta aphu chingthurthedet-lo, lapen latum ke halatum aphan kepaphereji lapen Judah atum kepapratsei-jisi Judah adet aphan anu kechirung adet-heihei anu kepavirjisi vang-lo.