Read Karbi ZEKARIAH 10 Bible Online

ZEKARIAH 10 - Karbi bible

ZEKARIAH 10

¹Ningkreng ahut setame, HEMPHU pen arve hangnon, pima HEMPHU pensi sining anghun pabirlak-lo, Alanglisi monit aphan arve pajangpilo, Abangphutin amethang arit along pavang-lo.

²Pima hem angtar kalile alam ningje, lapen sangkelang atum chobei alam thek-long. Mangkeheman atum kalile alam than, lapen avepinsi aning pangsamlo. La apotsi rat atum biresak ason damtap-lo, halatum kevi abang avesi kesung phonang-lo.

³Kevi atum aphuthak jasemet Nening kethi thurlo, lapen keja atum aphuthak abiresak ahur Judah akhei laphan langpo, lapen halatum aphan alangli ningkethenei ron kechedan alosei ason paplangpo.

⁴Halatum angbong pen hemthur ano arlong lapen pehem akurdang nangklangpo, halatum angbong pen ron kechedan athai lapen halatum angbong pen rat kepangri abangphu klangpo.

⁵Pangrumpet lote halatum ron anokbe ason plangpo, tovar-heihei anghan along hotur atum aphan dongpo; halatum chedanpo, athe HEMPHU halatum along dolo, lapen losei kardon atum aphan patherakpo.

⁶Judah akhei ajakong Ne pathemuchotpo, lapen Joseph akhei Ne pajokji, Ne halatum aphan vanthuji pima Ne halatum aphan jinsopik, lapen halatum aphan Ne kekhindedepin abang ason paplangji. Pima Ne HEMPHU halatum a-Arnam lapen halatum aphan thakji.

⁷Lapen Ephraim nokbe ason plangpo lapen drakha alangpen asonsi halatum aning arongpo. Halatum asomar la thek-longsi ning arongpo, halatum aning HEMPHU along ning arong chepipo.

⁸Ne halatum aphan hangsi pangrumpo pima Ne halatum aphan pajok-lo, lapen aphrang ason thak thaksi halatum ongdungpo.

⁹Ne halatum aphan det-heihei angbong paprat-lo seta halatum kehelo adet pen Nephan chemathathupo. Lapen halatum asomar atum pen dosi chevoithupo.

¹⁰Ne halatum aphan Ijip adet pen vanthupo, lapen Assiria pen pangrumpo; lapen Ne halatum aphan Gilead lapen Lebanon adet halatum aphan adim jangjedet an vanpo.

¹¹Halatum Ijip atalo angbong kehat ahut Ne talo adihu thengpo lapen Nil arong karnukta krenghakpo. Assiria adak-atur pangdaipo, lapen Ijip adet recho achinso avedetpo.

¹²Ne halatum aphan HEMPHU pen ajok pangtangpo, lapen halatum Alangli men pen adak-atur dopo pusi HEMPHU pulo.